Fa’amanino aia e le o agava’a ai tagatanu’u o Amerika Samoa

O se tasi o tulaga na fa’amanino e le afioga a Tapaau Dr. Daniel F. Aga i lana folasaga e fai ai ma sui o tagatanu’u ma ta’ita’i o Amerika Samoa, lea na usuia i le masina na te’a nei i le malo o St. Vincent and the Grenadines, o ‘aia i lalo o le Fa’avae o Amerika e le o maua e tagatanu’u o Amerika Samoa, se tasi o teritori o le Iunaite Setete o Amerika.

O ia ‘aia e pei ona taua e Tapaau i lana folasaga e aofia ai le ‘aia e ta’ua ai tagatanu’u e fananau i totonu o Amerika Samoa o sitiseni o Amerika; o le ‘aia e palota ai mo le tofi Peresetene o Amerika; ma le aia e palota ai le sui faipule a Amerika Samoa i totonu o le Konekeresi a le Iunaite Setete i taimi e palotaina tulafono taufa’aofi i totonu o le Konekeresi.

E ui i nei tulaga e pei ona taua, e le o fesiligia le fa’aauau pea lea o le tautua a tagatanu’u o Amerika Samoa i totonu o le malo tele o Amerika, e pei ona i ai le tautua a ana fitafita tuai lea e tatau ona ave i ai le fa’aeaea e tusa ai o le latou tautua, atoa ai alo ma fanau o lo o tautua i vaega ‘au eseese a le malo tele.

Soo se taimi e ulufale ma talia ai alo ma fanau a Amerika Samoa i totonu o vaega ‘au a le malo tele, e fa’atautoina ai i latou ma latou fa’apena ane ai, “o le a latou lagolago ma puipui i le Fa’avae o le Iunaite Setete ..”. O le latou tautua e avea ai i latou ma fitafita e puipui fetu e 50 o lo o fai ma sui o setete uma i le tagavai a le malo tele, e aunoa ma se fetu e fai ai ma sui o teritori o le Iunaite Setete.

“E fa’apefea ona ofoina atu e ali’i ma tama’ita’i Amerika Samoa o latou ola e puipuia ai le Fa’avae e le o mafai ona tu’uina atu aia uma mo i latou”, o se vaega lea o le folasaga a Tapaau.

Afai o lo o talisapaia uma e tagatanu’u uma na soifua mai i eleele ma laufanua o Amerika le aia e avea ai ma sitiseni, aemaise ai le to’atele o tagata eseese o le lalolagi o lo o latou fia maua lea avanoa e avea ai ma sitiseni o le Iunaite Setete, aisea e le tu’uina atu ai se talosaga i le Konekeresi a le malo tele ina ia talia le avea o tagata Amerika Samoa ma sitiseni o le Iunaite Setete, e pei ona faia i teritori uma o Amerika.

Ae pei ona manino i le folasaga a Tapaau, o se tasi lea o fesili na aofia i le tagi sa fa’aulu i le va o Tuaua ma le malo tele o Amerika, lea na fesiligia ai, po o alaga tatau i lalo o le “14th Amendment Citizenship Clause” le tu’uina atu o le avanoa i tagatanu’u na fananau i Amerika Samoa e avea ai i latou ma sitiseni o le Iunaite Setete.

O lo o teena e ta’ita’i filifilia o Amerika Samoa le tu’uina atu o le aia e avea ai ma sitiseni i latou uma e fananau mai i Amerika Samoa.

E talitonu le afioga i le ali’i kovana ia Lolo Matalasi Moliga, o le tu’uina mai o le aia e avea ai ma sitiseni tagatanu’u o Amerika Samoa, o le a tatala ai le avanoa i tulaga fa’apolokiki ma a’afia ai le soifuaga o tagata atoa ai ma ona eleele, ma le mafai ai loa ona ausia le ituaiga soifuaga ma le faigamalo o lo o naunau i latou e tatau ona i ai.

Ona o ia fo’i tulaga, o lo o mafua ai ona fa’aeteete lava Amerika Samoa i le pulea lea e le malo feterale o lana fa’amasinoga atoa ai ma tulaga tau femalagaaiga. E na o Amerika Samoa lava le vaega o Amerika e le o i ai le fa’amasinoga feterale, e le o puleaina fo’i e le malo tele ana tulafono tau femalagaaiga.