Fa'amanatu le 242 Tuasaga Maligi Koa i Amerika Samoa

Na sisi le fu'a a le US Marine i le aso fa'apitoa mo Fitafita Tuai 2017 i Tafuna, e o latou sui tofia: MSGT [Ret] Alex Suafo'a ma SSGT Penitila Leapaga. O le aso o le toe tepa ma le agaga fa'afetai o tagata uma, ia i latou o soifua pea, i latou ua maliliu, ae maise o fitafita o taua uma o lo'o tautua pea i so'o vaipanoa o le lalolagi e fa'afetaia le  tautua matavela.

O Novema 10 i lenei tausaga sa fa'amanatu ai fo'i le atoaga o le 242 tausaga o le US Marine Corp. "I tausaga ta'itasi, e fa'amanatu fa'alauaitele lava e le US Marines i so'o se mea o le lalolagi o alaala ai ni fitafita sa tautua i le Maligi Koa, e auai e na te fa'amanatuina leaga o le agaifanua tamau lea a le Maligi. Afai o oe o se Maligi, e fa'avavau lava lou lea tofi! E leai fo'i se maligi e litaea, e na'o Maligi Taui,” o se fa'amatalaga lea a Tusipasi Suiaunoa, o se tasi o Maligi Tuai.

"I le tautua a le Maligi lava ia, o le latou 'au'au ‘Ia fa'amaoni! Semper Fidelis’. A'o le fa'alagiga e fa'alauiloa ai le latou auaunaga, ‘Na'o se Toaitiiti Agava'a’ po'o le ‘A few Good Men’ i le fa'aperetania. E iloga i le tautua lea, e le fa'atemeteme pe fa'atagafai ae ia fa'amaoni e o'o i le i'uga, e le to'atele ae na'o se to'aitiiti ae uma le tautua o fa'atino ma le loto,” o se tala lea a Suiaunoa.

I se fe'au fa'amalosi'au a le ali'i Commandant a le US Marines, Robert B. Neller, mo Maligi i lenei itu o le auaunaga, sa ia toe faatepa ai Vetereni Maligi i Amerrika Samoa i le sao o Maligi i le taua i Guadalcanal i le Pasefika i le 1942. "O le fuafuaga na fa'atulaga e le vaega a le Maligi e osofa'ia ai le itu a le fili i le aso 10 Novema 1942, o le fuafuaga lena na mulimulita'ia e autau uma na tutu faatasi ma Amerika ma sa manumalo a'ia'i ai Amerika ma ana pa'aga i lenei taua. Aua ne'i galo ia i tatou, ia fa'amaoni i le fuafauga fa'ataoto!" e maua ai malo."

"A'o tatou fa'ailogaina la lenei aso fanau e patino i le US Marine Corps, ia mua'i lagona e o tatou fatu taito'atasi le taua o lou vala'auina fa'apitoa o le Maligi. Ia mua'i manatua o oe o le Maligi, o le a lou vala'auina ma le fa'amoemoe o lo'o e aga'i atu i ai! O le Maligi e le mafai ona tautua, ae le'i mua'i tu'uina i ai ma lona fatu i lana auaunaga. Ia tumau ma fa'amaoni i lau tautua!"

Mo le fa'amanatuga o le 242 tausaga o le Maligi Koa, sa auai ai i latou i le aso Vetereni 2017 i le Malae i Tafuna. Soso'o lea i le afiafi na fa'atasia ai i le Toa Restaurant Bar & Grill ma latou aiga i le latou Aiga Fiafia.

Ona sa i ai fo'i nisi o tama fanau a Amerika Samoa sa tautua i le Maligi ua asiasi mai i aiga mo le ulua'i taimi talu ona tu'uva'a ese atu i le tautua , le susuga Fofomaitulagi Tuitele, o lea sa auai fa'atasi mai i latou na tu'uva'a ese atu, Vailuu Ma'anaima Lang mai Leone fo'i ma Ketesemae Meaole mai Auto.

"O i latou nei na toe fa'atepa ai Maligi Samoa uma i le taimi tonu o le taua i Vietnam. O i latou sa tofu sao i osofaiga a Amerika i Vietnam, ae soso'o ai loa ma le vaega e 68 na fa'ato'a ulufale ma auina atu mai iinei i le tausaga 1973, o i matou na sa o atu i Viet Nam e la'u mai tagata sulufa'i ma nisi fo'i lava o fitafita na fa'ato'a maua atu ae ua mae'a le taua,” o se tala lea a Suiaunoa.

"Ua le taofiofi lava i latou ua fa'amatala lea mea ma lea mea sa latou va'aia ma lavevea ai. E ui ina faigata i na taimi, ae o lea e soifua mai ma toe talanoa i ai, ona ua fa'atasia i latou ma ua iloga atu ai e i matou uma le tigaina o Amerika ma ana vaega au i lena taua, na manatu Amerika e vave ma faigofie."

O nisi o sui sa malaga i le 1973 na aofia ai Tusipasi Suiaunoa, Patolo Mageo, Meauta Mageo, Joe Yandall, Iakopo Faleafine, Iakopo Maiaa, Fa'avae Mageo, Sitivi Faiai ma isi. I le tatou ofisa o lo'o fa'aulu atu ai fanau i le US Marines iinei, ua fa'auluulu lea i le susuga SSgt Leapaga,Penitila.

"O lenei tausaga i le matou 'aiga, sa matou toe manatua ai nisi o tama iloga o le atunu'u sa avea fo'i ma matou ta'ita'i i le vaega a le Maligi Koa iinei i Samoa, le susuga Tuiteleleapaga Peseta Ioane Fue, le tama matua fo'i o Tusipasi Aumavae, ae maise o le susuga le Tama Matua Tuilefano Vaela'a Maloata. Fa'afetai mo le latou tautua,” o sana toe upu lea.