Faamamafa e Taotasi Le Iai o Itu e Lua i So'o se Mataupu

Pago Pago - AMERIKA SAMOA

O le to’atele o i latou na molimau i le fonotaga lea sa faia i le Fale Laumei i le aso Lulu o le vaiaso ua tuanai, lea na soalaupuleina ai le mataupu i le eliina o sami tu lata i le teritori (deep sea mining), sa o latou fa’aleoina lo latou tete’e malosi i so’o se ituaiga galuega, e ave’esea ai mineral mai i sami loloto, ia o lo’o latalata mai i Amerika Samoa.

Ae peitai, i le molimau a le susuga ia Taotasi Archie Soliai, sa ia ta’ua ai e faapea, e lua lava itu o se mataupu ma ia faamamafaina le tu’uina atu i le mamalu lautele, o se avanoa, e latou te faafofoga ai i leisi itu o le mataupu.  Ma sa ia fautuaina le auai atu o nisi o sui o kamupani e iai ni o latou sootaga i alagamanuia o le sami, e mafai ona fai ni a latou folasaga, e mafai ona fesoasoani i le nofo malamalama o le atunu’u.

O se tasi na fa’aleoina lona tete’e, na aofia ai le Komesina o Leoleo, le susuga ia Ta’aga Saite Moliga, i lona tulaga faalupe o se to’oto’o o Manu’a.  Ma ia ta’ua ai le tete’e malosi o Manu’a i lenei fuafuaga.  Ma sa faamamafaina e Ta’aga le a’afia o motu e tolu o Manu’a pe afai ae tupu lenei tulaga, aemaise lava o le a’afiaga i suiga i tulaga o le tau.  

Sa molimauina e le to’oto’o ia le fa’alagolago o tagata o Manu’a, i ona sami – e le gata mo meataumafa ae faapea, o se faavae o lo latou faasinomaga fa’aleaganu’u.

I le molimau a le tina ia Kerolina mai i Auasi, sa ia faaleoina ai lona popolega i le lumanai o nai ona tamaitai e to’alua, ia na o latou auai atu i le fonotaga.  Sa saunoa Kerolina, o le mafuaaga ua auai atu ai i lenei fonotaga, ona o se mataupu e ‘oga’oga lona tulaga.  Aua o le lumana’i lea a lana fanau.  

Ma i le avea o ia ma se tasi sa faiaoga i le mataupu o le Saienisi, o sana fautuaga malosi, o le aoaoina o fanau, i a’afiaga o sami loloto mai i le eliina (deep sea mining), i a’au, sami ma figota o lo’o nonofo ai.

Na faamamafa e le tina ia le tumau pea o sami loloto ma se tasi o siosiomaga e le’i o’o iai le loloto o le malamalama o tagata.  Ma afai ae amata ona eliina (deep sea mining), o le a ono a’afia ma fa’atama’ia ai vaega ‘ese’ese o iai, ua faitau afe tausaga o ola ma tuputupu a’e.

Sa faapea ona lagolagoina e le susuga ia Ma’atulimanu Sausi Maea, se vetereni o le Ami, ae o se faifa’atoag ma se faifaiva mai i Pago Pago, ia le molimau a le tina na saunoa mai Aoa.  Na lapata’i mai ia Ma’atulimanu i le a’afiaga o le eliina o ogasami loloto, e le gata i ‘amu, I’a ma figota o lo’o nonofo ai, ae faapea foi tagata o Amerika Samoa.

Na toe faaleoina e Ma’atulimanu ia se vaega o le lapataiga a le tamaitai o Dr. Mahuka, i le a’afiaga o le “pefu” e sau mai i le eliina o vaega loloto o le sami (sidement plumes), i i’a o le sami.

Sa ia molimauina foi le taua o le tiute o le faigafaiva i lona soifuaga, i le aganu’u ma lona faasinomaga.  Ma ia ta’ua ai e faapea, a aunoa ma le sami, ua mea noa i tatou.  A aunoa ma alagamanuia o le sami, e le mafai ona o tatou ola.

I le fa’aleoina o le fa’atui’ese a le susuga ia Tamatoa Tony Langkilde, sa ia u’una’ia ai le mamalu o le atunu’u, ina ia fa’amausali lo latou aia i le puipuiga ma le faasaoina o le EEZ a Amerika Samoa (American Samoa’s Exclusive Economic Zone).  Ma sa fautuaina e Tamatoa le iai o se tiutetauave i le malo feterale, e tausi ma si’itia ia nei aia tatau, aemaise pe afai e ono a’afia ia le aganu’u, siosiomaga ma tamaoaiga o le teritori, i a latou faaiuga fai.

I le saunoaga a Musuaina Collins mai i le afioaga o Pago Pago, e tula’i mo lana aufaigaluega (ASRO-American Samoa Resilience Office) ma le autalavou a Samoa, sa ia faamamafaina le taua o le puipuiga o alagamanuia i le sami, aua tupulaga o le lumanai.

Sa ia faapupulaina mai e faapea, o kamupani autu lava e lua lea o lo’o mauaina mai ai le tele o tupe maua mo Amerika Samoa, o kamupani i’a (va’a fagota) ma turisi – lea o lo’o loloto so latou so’otaga i le soifua maloloina o le sami.  Ma e tatau ona taofia so’o se gaioiga e ono afaina pe faatama’ia ai le sami ma mea o lo’o ola ai.

Ae i le manatu fa’aalia a le susuga ia Taotasi, lea na avea ma Faatonusili o le Matagaluega o Alagamanuia o le Sami ma le Togavao, sa ia faaleoina ai le agaga fa’afetai i le tamaitai fomai ia Dr. Sabrina Suluai-Mahuka ona o lana folasaga sa faaleoina i le a’afiaga o le sami i le galuega lea ua fuafua e faia.

Sa ia ta’ua ni vaega taua se lua sa o’o mai i lona mafaufau, i le fa’atonuga aloaia a le alii peresetene o Amerika, Donald Trump, e tusa ai ma le eliina o le sami loloto (deep sea mining), o le tasi o le puipuiga faavaomalo (national security) ma le initeresi faavaomalo (national interests).  Ma i sona talitonuga, o mafuaaga autu ia o lo’o ta’ita’iina ai lenei fuafuaga.

Sa saunoa Taotasi, e mafai ona o tatou finau, ae i le i’uga, e fai lava e Trump le mea o finagalo iai.  Ae na saunoa foi Taotasi, e taua tele le fa’aauau pea ona o tatou u’una’I ma faalua’itele a tatou fa’asoa.  Ma ia u’una’ia ai le tatau ona aofia o sui o kamupani o lo’o a’afia i nei fuafuaga, i nisi fonotaga i le lumanai.  Ina ia mafai ona nofo malamalama le mamalu lautele i itu uma o le mataupu, aua le faia o ni faaiuga tonu ma le atamai.