Fa’amalamalama Loia Sili vaega tulafono polokalama “Guest Worker Permit”

I le iloiloga a le Komiti o Fa’amasinoga a le Maota Maualuga sa faia lata mai nei, na fa’ailoa ai e le Loia Sili ia Talauega Eleasalo Ale nisi o vaega o le tulafono i lalo o le polokalama, “Guest Worker Permit”.

O lea polokalama, e pei ona fa’atulafonoina, e tele ‘ai’aiga e tatau ona fa’amalieina, ma e na o tagatanu’u mai Samoa e agava’a i lalo o le tulafono e fa’atagaina ai ona galulue i le StarKist Samoa.

Talu ai le tulaga mana’omia o tagata e fa’afaigaluegaina e le kampani a le StarKist Samoa, o lea ua faia ai le fa’a’iuga a le kovana, i lalo o le tulafono, e toe fa’atagaina ai ona aumai mai Samoa Tutoatasi tagata e galulue i le kampani ‘ia, i lalo o le “Guest Worker Permit”.

I le iloiloga a le Komiti o Fa’amasinoga a le Senate i le vaiaso ua te’a sa fesiligia ai e le afioga i le Senetoa ia Tuaolo Manaia Fruean, le tofa ia Talauega le mataupu e fa’atatau i le saunoaga a le kovana o lo’o mana’omia vave tagata faigaluega a le StarKist.

“E le o se mea fou, o le tulafono ua leva on i ai i le tatou Tusi Tulafono,” o se vaega lea o le tali atu a le Loia Sili i le fesili a Tuaolo. “Ou te le iloa lelei pe o le a le mafuaaga na toe fesili ai fua le StarKist i le kovana, ae o le tulafono lava ia lea ua ta’atia.”

“Pau lava le mea, afai e i ai tagata e apalai i le Guest Worker permit e na o le o mai lava o i latou ma apalai, e le tau fesili fua i le kovana, lea ua ta’atia le tulafono,” o a Talauega lea.

“Ae o le fa’atulagaina o le pemita lea, e na o kamupani ‘ia a tatou e agava’a ai, e le agava’a ai isi tatou kamupani. Ae o tagata ia e aumai e faigaluega, tagata e sponsor e le kamupani ‘ia. Ae tatau ona i ai ni tagatanuu o Amerika Samoa e o mai ma nonofo ai,” o se isi lea vaega o le tali a le Loia Sili.

Sa ia fa’amalamalama i le komiti e fa’apea a uma galuega e pei ona aumaia ai tagata nei, ona toe fa’afo’i la’ia e le StarKist tagata nei.

“O le agaga lena o le tuafono, ina ia maua ai ni tagata faigaluega vave” mo kamupani ‘ia, o se isi saunoaga lea a Talauega.

O se tasi o vaega o le tulafono, e pei ona saunoa i ai le Loia Sili, o le faiga fo’i la o pemita ia, po’o ID, e le alu i le Komiti Fa’afoe o Femalagaiga (Immigration Board), ae o talosaga uma e tuuina atu i le Ofisa o le Loia Sili, e fa’amaonia mai ai.

Afai loa e pasia uma talosaga - e pei ona auiliili mai i le tulafono - ona faia lea o le pemita e mafai ai ona vave ona faigaluega tagata.

O le amataga o le masina lenei sa tuuina atu ai se talosaga a Sangdong Kwon, pulesili o le StarKist, i le afioga i le Kovana Sili, mo se fesoasoani ma tulai mai ai se fonotaga i le va o sui o le faigamalo ma le StarKist.

I lea tusi sa fa’amalamalama ai e Kwon le manaomia e le StarKist o tagata faigaleuga fa’aopoopo ona o le lu’itau tele o lo’o feagai ma le StarKist ua le o atu a latou tagata faigaluega i le taimi sa amata ai galuega i e aso 7 o Ianuari talu mai le malologa masani e lua vaiaso mo aso fiafia o le Kerisimasi ma le Tausaga Fou.

Ise tusi i le aso 11 Ianuari, 2019, sa tali ai Lolo i manaoga a le StarKist. Ma ia fa’ailoa ia Kwon e fa’apea talu ai ona o le lu’itau lenei ua feagai ma le kamupani, ma o le a afaina ai galuega fa’asolo ae maise tulaga tau seleni, ae maise le faigata lea ona maua ni tagata faigaluega i totonu o Amerika Samoa; o le mea lea ua ia fa’atagaina ai ona toe fa’aaogaina le “Guest Worker Permit” e pei ona i ai i le tulafono.

O lo’o fa’ailoa foi i le tusi a le kovana e fa’apea o le auina mai o tagata mai Samoa i lalo Guest Worker Permit, o le a fa’aopoopo atili ai nisi o tautua a le malo, e aofia ai le eletise. O le mea lea, ua talosagaina ai e Lolo ia le StarKist ina ia tagai muamua i tagata mai Samoa o lo’o alala i le teritori ae maise tagatanu’u moni o Amerika Samoa, e tuu i ai le fa’amuamua mo le fa’afaigaluegaina i nei avanoa faigaluega.

E o’o mai i le taimi nei, e le o mautinoa pe to’afia ni tagata faigaluega o lo’o mana’omia vave e le StarKist Samoa, ma e le’i maua lava mai le kamupani se tali o fesili a le Samoa News sa tuuina atu i la latou so’oupu i le lua vaiaso talu ai.

Ae o le taimi nei o lo’o fa’aauau pea ona taumafai le StarKist Samoa e sailia tagata faigaluega fa’aopoopo, ae maise ai lava le vaega o fa’amama ‘ia.