Fa’alautele tautua Vaega Ti’eti’e Uila Afi a le Ofisa o Leoleo

Ua tu’uina atu nei e le Komesina o le Matagaluega o le Puipuiga o le Saogalemu Lautele sana tusi fa’alaua’itele i ali’i ma tama’ita’i leoleo uma, ua mae’a ona fa’atauto ma o lo o galulue i vaega eseese o le Ofisa o Leoleo i le atunu’u e fia tautua i le Vaega Ti’eti’e Uila Afi a le Ofisa, ina ia fa’afeso’ota’i atu lona Ofisa mo le fa’atalatalanoaina o lenei mataupu.

I sana tusi sa tu’uina atu i le aso 2 Iuni 2017, na viia ai e le tofa Le’i Sonny Thompson le tulaga mataina ma le maualuga o lo o i ai le tautua a le Ofisa o Leoleo i le atunu’u, e mafua mai i tautua a vaega eseese i totonu o le Matagaluega, e aofia ai ma le Vaega Ti’eti’e Uila Afi, lea o lo o latou fa’atinoina se tasi o tautua e sili atu ona taua e ala i le tautuaina lea o tagatanu’u o Amerika Samoa.

Sa ia taua atili lona fa’afetaia o i latou uma o lo o tautua i lea Vaega taua a le Matagaluega, ona o le tautua matavela o lo o mafai ona latou fa’atinoina e fesoasoani ai i le puipuia lea o le saogalemu o le atunu’u.

O le tulaga maualuga o lo o i ai le fa’atinoina e i latou nei o le latou tautua, ua atagia mai ai lo latou fa’atinoina lea o le auaunaga ua mae’a ona fa’atautoina ai i latou, e le gata i tausaga ua mavae ae oo mai fo’i i le taimi nei, ma ua mausali ai le tulaga maualuga o le tautua a le Matagaluega o Leoleo, o le mautinoa lea o lo o i ai le agava’a i ali’i ma tama’ita’i leoleo uma e tautua i vaega ta’itasi a le matagaluega.

“O le taimi nei, ua i ai se taumafaiga ina ia mafai ai ona fa’alautele ma fa’amalosi atili le tautua a le Vaega Ti’eti’e Uila Afi i totonu o le Ofisa o Leoleo, o le mafua’aga lena ua ou tusia ai lenei tusi e valaau fa’aaloalo atu ai i ali’i ma tama’ita’i Leoleo uma e fia tautua i lenei Vaega o le Matagaluega, ina ia fa’afeso’ota’i mai lo’u Ofisa ia le silia ma le aso 16 Iuni 2017, pe afai e i ai sou lagona e te fia tautua i le Vaega Ti’eti’e Uila Afi a Leoleo”, o se vaega lea o le tusi a le ali’i Komesina o Leoleo.

Sa ia talosagaina fo’i Ta’ita’i uma o le Matagaluega o Leoleo ina ia mautinoa e fa’ao’o atu lenei tusi i leoleo fa’atauto uma o lo o galulue i vaega eseese o le matagaluega, ina ia latou silafia lenei fa’aaliga taua.

Na taua e le tofa Le’i i se fa’atalatalanoaga ma le Samoa News i le masina na te’a nei e fa’apea, o le vaega o lo o ave i ai lana fa’amuamua talu ona mae’a mai le filifilia atoa ai ma le fa’amaoniaina o ia e avea ma Komesina fou o le Ofisa o Leoleo, o le a’oa’oina lea o ali’i ma tama’ita’i Leoleo ina ia si’itia lo latou silafia i auala e fa’atinoina ai la latou tautua i le atunu’u.

Saunoa Le’i e fa’apea, afai e maualuga le tulaga e i ai aoaoga mo ali’i ma tama’ita’i Leoleo, o le lelei fo’i lena o le fa’atinoina o le latou tautua i le atunu’u, ma avea ai ma auala e si’itia ai le tulaga lelei ma le fa’aaloalogia o le latou tautua.

O se tasi o lu’itau o lo o fetaia’i pea ma le Ofisa o Leoleo mai le tele o nofoaiga ua mavae atu, e le gata i le le lava o Leoleo latou te fa’atinoina le galuega, ae le o lelei fo’i tulaga o latou totogi, peita’i na saunoa Le’i e fa’apea, e le gata o lo o la galulue vavalalata pea ma le afioga i le ali’i kovana ia Lolo Matalasi Moliga e saili se vaega tupe e fa’aleleia ai totogi o Leoleo, ae o lea fo’i ua maua mai le isi alaga tupe fesoasoani e fa’atino ai le Vasega lona 26 a Leoleo i le fa’aiuga o le tausaga nei.