Faalauiloa le lagolago a Pisinisi i le atina’e o ta’aloga i AS

A o fa’agasolo ai tapenaga a le Komiti o Ta’aloga a le  Olimipeka a Amerika Samoa (ASNOC) mo le auina atu o le au ta’aalo a le atunu’u e tausinio i ta’aloga a le Pasefika lea ua e talimalo ai Samoa i le masina o Iulai o le tausaga nei, ua fa’aalia le lagolago a ni isi o pisinisi tetele i le atunu’u i le atina’eina o ta’aloga mo tupulaga talavou.

O se feiloaiga faapitoa i le vaiaso na te’a nei, na fa’alauiloa aloaia ai e ia kamupani tetele e tolu e aofia ai le Bluesky, Asco Motors ma le GHC Reid Co. Ltd le latou lagolagoina malosi o le atina’eina o ta’aloga i le atunu’u.

O lenei feiloaiga sa auai sui o kamupani eseese nei faatasi ai ma le pulega a le ASNOC e aofia ai le susuga ia Etisone Ed Imo o le Peresitene, faapea ai le susuga a Ethan Lake o le Failautusi Aoao.

Na taua e Lake i lea feiloaiga le talia aloaia lea e kamupani e tolu o le talosaga ina ia avea i latou ma lagolago autu mo le tapena atu o au ta’aalo a le atunu’u i taaloga a le Pasefika i Samoa.

Na taua e le sui o le ASCO Motors ia Maiava Pani Ng Lam lona agaga fiafia ina ua mafai ona avea le kamupani ta’avale lauiloa i le lalolagi, le Toyota ma se tasi o kamupani e lagolagoina malosi le atina’eina o ta’aloga i le atunu’u, atoa ai ma le auina atu o au ta’aalo a le atunu’u i Samoa.

Sa ia faailoa, o le kamupani ta’avale a le Toyota e pei ona lauiloa ai i le lalolagi atoa, o le kamupani lea o loo lagolagoina malosi le Asosi o Ta’aloga a le Olimipeka i le lalolagi (IOC), atoa ai ma le avea ma lagolago autu o ta’aloga uma lava i le lalolagi.

Na taua e Maiava le sauni o le Asco Motors e auina mai ta’avale tetele e tolu (3) e fesoasoani ai i le la’uina o ‘au ta’aalo i soo se tapenaga e moomia, a o sauni ai mo a latou tapenaga mo Samoa. O ta’avale ua fuafua le Asco Motors e auina mai mo le ASNOC, o le a amata fa’aaoga e le Ofisa o le ASNOC seia oo atu i le tausaga e 2020 lea e sauni atu ai au taaalo uma a atunuu eseese o le lalolagi mo ta’aloga a le Olimipeka.

“O se fiafiaga i le kamupani a le Toyota i le lalolagi, atoa ai ma lona lala i Amerika Samoa nei, le Asco Motors, le mafai lea ona avea ma se tasi o kamupani e lagolago malosi i le atina’eina o ta’aloga i Amerika Samoa. O la matou tatalo, ia avea la matou lagolago o se auala e faaleleia atili ai le atina’eina o ta’aloga i le atunu’u, ma ia mafai ai fo’i ona fesoasoani i le au ta’aalo o le a masi’i atu mo Samoa, ina ia maua ni pine mo le tapuaiga a le atunu’u,” o le saunoaga lea a Maiava.

O le susuga a Latu Kupu sa fai ma sui o le kamupani a le GHC Reid Co. Ltd e fa’alauiloa la latou tautua. Na taua e Kupu e fa’apea, ua tele tausaga o fa’aauau pea le lagolago a le GHC Reid i le atina’eina o ta’aloga i Amerika Samoa, e ala i le ofo fua mai lea o vaiinu e pei o le Powerade ma le Vaimalu mo au ta’aalo.

E le gata i le GHC Reid, ae sa ia taua fo’i le lagolago faifaipea a le Leala Foundation, e pei ona foa’i ai le silia i le $100,000 talu mai le tausaga e 2012, e fesoasoani ai i le atina’eina o ta’aloga i Amerika Samoa, aemaise ai au ta’aalo masi’i atu i soo se tausinioga faavaomalo.

O le tele o taimi e fa’atino ai sailiga tupe a le ASNOC e pei ona saunoa Kupu, e saunia ai lava e le GHC Reid vaitaumafa ina ia fesoasoani i le fa’amoemoe o le atina’eina lea o ta’aloga i le atunu’u.

I le kamupani telefoni a le Bluesky, na avea ai le tama’ita’i o Sherry Sele ma sui e fa’alauiloa la latou fesoasoani mo le ASNOC i lenei tausaga. Na taua e Sele e fa’apea, o le fesoasoani a le Bluesky e aofia ai le ofo fua mai o auala o fesootaiga ma le Ofisa a le ASNOC e aunoa ma se totogi, ina ia mafai ai ona fa’atino fesootaiga ma faa faigofie ai tulaga uma e moomia e au ta’aalo.

E le gata i lea, ua sauni fo’i le Bluesky e ofo mai le toniga mo le silia i le to’a 350 o le a malaga atu e fai ma sui o Amerika Samoa i ta’aloga a le Pasefika, atoa ai ma le ofo fua mai o telefoni feavea’i e 30 e fa’aaoga e sui o au ta’aalo o le a malaga atu i Samoa, ina ia fa’afaigofie ai fesootaiga i soo se taimi e mana’omia ai.

“Ia avea le galuega ua faatinoina e kamupani nei e tolu (3) e unaia ai loto o isi fo’i kamupani i le atunu’u, ma naunau ai e ofo mai lo latou tamaoaiga e fesoasoani ai i le atina’eina o ta’aloga i le atunuu’. E pei ona tatou iloa ma talitonu, o le atina’eina o ta’aloga mo tupulaga talavou, o se atina’e sili lea ona lelei mo le lumana’i o fanau talavou i Amerika Samoa,” o le saunoaga lea a Sele.

Na faafetaia e le susuga a Imo le lagolago a kamupani e tolu mo le atina’eina o ta’aloga i le atunu’u.

“E le o se taimi muamua lenei ua tuuina mai ai le lagolagosua a nei kamupani e 3 i le atina’eina o ta’aloga i le atunu’u, atoa ai ma le tele o isi fo’i kamupani i totonu o le atunu’u. E le mafai e le ASNOC ona galulue na o i latou e atina’e ta’aloga ma auina atu au ta’aalo e tausinio i ta’aloga eseese a le Pasefika ma le lalolagi, pe afai e leai se lagolago mai a kamupani i totonu o le atunu’u,” o le saunoaga lea a Imo.

O se taimi o le vaiaso fou lea ua fuafua le Asco Motors e tu’u aloai atu ai loa ta’avale ua latou filifili e ofo atu mo le ASNOC, ae mo le GHC Reid ma le Bluesky, o lea ua amata se tasi o vaega o le latou fesoasoani mo le ASNOC, e pei o le tauaaoina atu o vaitaumafa mai le GHC Reid atoa ai ma le auaunaga tau initaneti lea ua fa’aaoga e le Ofisa a le ASNOC mai le Bluesky.