Fa'alauiloa fa'ai'uga o le Suesuega Ofisa o Turisi a Amerika Samoa

O le aso Gafua na fa'aalia aloa'ia ai le fa'aiuga o le Suesuega i Tagata tafafao na ulufale mai i Amerika Samoa i le tausaga 2016-2017, ma sa tapenaina lea ripoti fa'amaumau e le Sotuh Pacific Tourism Organization (SPTO), mai Suva i Fiti.

"O lenei ripoti na fa'amaumauina lava e le tatou Ofisa o Turisi, peita'i sa fa'atupeina lea e le SPTO lea e avea ai Amerika Samoa ma se tasi o totino. O le susuga fo'i a David Vaiafe, le fa'atonu o le tatou Ofisa o Turisi, o se tasi o totino o le Komiti Fa'afoe a le SPTO ma o le latou failautusi fo'i,” o se tala mai lea a le susuga Christopher Cocker, le CEO o le SPTO i Suva.

Na fa'ailoa e David Vaeafe, "E $US 18,000 na toina mai e le SPTO ina ia fa'atautaia ai lenei suesuega fa'apitoa, ina ia mafai ona va'ai patino Amerika Samoa i se aotelega o le tupe ua maua mai e le latou Ofisa o Turisi mo le atunu'u, o ala o maua ai ma fa'amaumau ai, ma le aotelega o tagata na ulufale mai fa'aalu a latou tupe i le tatou malo nei, atoa ai ma umi o nonofo ma alaala iinei, ae pe toe manana'o fo'i e toe fo'i mai i se isi taimi ona ua fiafia e maimoa ia Amerika Samoa."

O le tausaga 2017 le tausaga ua avea nei ma tausaga ua amata fa'amaumau, e fa'atusa i fa'amaumauga i le tausaga 2016. O se tala fiafia, ua va'aia ni si'itaga lelei o le aotelega o le tupe ua maua mai i turisi asiasi mai, e fa'ateleina fo'i le aotelega o i latou na asia le tatou atunu'u, ma ala fo'i sa malaga mai ai, po'o ai fo'i le malo e tele ai tagata e ulufale mai i Amerika Samoa."

"O lo ua avea fa'amaumauga nei, ma ala e fa'aosofia ai le fiafia o nisi e fa'aauau latou pisinisi e feso'ota'i ma le vasega o turisi e asia le tatou malo, fa'aosofia ni lagona o nisi e fa'atula'ia pisinisi fou i le atunu'u ae tautuaina turisi, ae silisili ia fiafia i tatou uma e tautua le vasega o turisi e asiasi mai i taimi uma,” o se tala lea a Vaeafe.

O mea taua nei sa fa'amauina i lea lipoti:

O le aofa'i o tagata malaga mai i totonu o Amerika Samoa e toatele ai lava i latou e asiasi mai Amerika ona soso'o lea ma i latou e asiasi mai isi malo uma o le Pasefika lea e aofia ai Samoa, Tonga, Fiti, Niu Sila ma Ausetalia.

E to'a 69.5% e malaga mai e asiasi i aiga ma uo, ae o le 54.9% lea o le aotelega o tagata malaga mai i totonu o Amerika Samoa i le tausaga atoa. O mea e fia asia lava e i latou a'o tafafao ai i Amerika Samoa e numera tasi ai le a'ai i fale'aiga tetele, lea e tula'i mai i le 60.4% ae o le faiga o fa'atauga e aotelega i le 46.5% i latou  e fiafia tele i ai.

O le lisi mai o mea e 10 e ao ina faia e i latou ma ave i ai le latou fa'amuamua e faia a'o i ai i Amerika Samoa nei, ua tula'i mai ai e lalamua lava le maimoa i le talafatai o Amerika Samoa i ona itu uma lava, savalivali ma matamata i nu'u ma afio'aga, asiasi i aiga ma uo ma e masani ua leva ona le toe feiloa'i, tafao fa'asamasamanoa i le faletalimalo o alaala ai ma fiafia i le to'afilemu, asiasi i se fale fa'afiafia e fetaui ai ma uo ma e masani, o nisi na o mea sa fa'ailo mai lea suesuega.

O le mea e sili ona fiafia ai tagata maimoa mai sa fa'atutumu a latou pepa mo lenei suesuega, sa matua tusia e i latou, "Tausa'afia o tagatanu'u o Amerika Samoa, talimalo lelei ma le fa'amasani ma le fiafia tagata uma." O le mea tonu lea na sili ai ona fiafia ai i latou na asia i tatou i le 2017.

Mai le to'a 20,969 tagata na ulufale mai i Amerika Samoa, e $3,432,117. miliona le aofaiga o le tupe ua mae'a fa'amauina sa latou fa'aalu i Amerika Samoa.

O le aotelega o lea tinoitupe e tusa ma le 57% o le aofaiga o le tupe na fa'aaluina lea i le totogi ai o nofoaga e nonofo ai i le vaitaimi a'o tafafao i Amerika Samoa nei. O isi ala na fa'aalu ai e i latou le tele o lea seleni o fa'alavelave o aiga, fa'atauga, feoa'iga i le atunu'u, ma le fa'atauga o oloa taulima a le atunu'u e fai ma latou fa'amanatu po'o fa'amomoli i aiga pe a toe taliu le malaga.

O se isi tala fiafia ua fa'amauina, e tusa ma le 70% ua latou ta'utino, e latou te fa'alauiloa atu i nisi e fia tafafao mai, tala fa'amama'i ina ia tumau ai le latou naunau e asiasi mai.

Mai nei faamaumauga aoga tele, e mafai ona fa'aaoga e le malo ina ia talosaga ai nisi fesoasoani tau tupe mo le fa'amoemoe o le fa'aleleia atili o le Turisi i totonu o Amerika Samoa, ae maise e mafai ona fa'aaogaina e i latou e fai pisinisi e fa'aleleia atili ai le auaunaga mo Turisi po'o tagata asiasi mai i le atunu'u.

O se fa'aiuga o le saunoga a Cocker sa ia fa'ailoa mai ai, "O lo'o aga'i i luga le taumafaiga a le Ofisa o Turisi a le tatou malo nei. I le gasologa o polokalama fa'alauiloaina o Amerika Samoa o lo ua matua'i lelei lava aua e tele tautua e feso'ota'i ma le Malo o Amerika, o le malo tele i le lalolagi. O le atina'e sili lea e ao ina fa'ataua e Amerika Samoa ma fesoasoani atu ai fo'i i le tatou vasega o malo fa'aatumotu laiti, e sili ona mana'omia le tatou galulue fa'atasi ai, ia tau fai aga'i uma i luga fa'atasi.”

Ua iloga mai i lenei suesuega, o le "Aganu'u fa'apasefika o le Aiga, e tetele lona aoga i le una'ia o tatou fa'alauiloaga o tatou malo ina ia asiasi mai nisi. O le ola fiafia ma le fa'amasani gofie fa'atasi ai ma le laufofoga fiafia ua tumati'a i le mafuaga e toe fia asiasi mai ai nisi, atoa ai ma le 'fiafiaga sili'o le sui na asiasi mai."

O lo'o fa'aauau ona faia isi fonotaga fa'aleaoaoga a le aufaipisinisi e fesoota'i ma le tautuaina o tatou Turisi i le Lupelele Room a le Faletalimalo Tradewinds i le aso, pe afai e fia maua se feso'ota'iga ma fesiligia nisi ala e fesoasoani mai ai le tatou Ofisa autu South Pacific Tourism Office mo lau pisinisi.

Ia mautinoa, "Fa'aali mai ou lagona po'o se fa'aletonu o feagai ma oe, ona taumafai atu lea i se auala e fa'afo'ia ni fa'afitauli ae folau saogalemu lau pisinisi mo se tamaoaiga tausi o ana tagata faigaluega ma sou sao i le tatou malo, ae maise le aiga."