Fa’aiuga o le palota fa’apitoa mo le Maota o Sui, Manu’a #1

Pago Pago - AMERIKA SAMOA

O le sui tauva tama’ita’i o Faauifono Vaitautolu, o ia lea ua manumalo le aloaia i le Faiga Palota Fa’apitoa i le Aso Lua mo le Itumalo o le vMaota #1 Manu’a - lea e aofia ai Ta’u, Faleasao ma Fitiuta - e fa’atumuina le nofoa o lo o avanoa ina ua tu’umalo ia Iuni o le tausaga nei le sui Faipule ia Alumamalu Ale Filoialii.

Na fa’alauiloa e le Ofisa o Faiga-Palota “fa’ai’uga le aloaia” o le Faiga-Palota Fa’apitoa i le te’a o le itula e 7 i le afiafi o Setema 12 ina ua tapunia fale-palota e tolu-lua i Manu’a ma le tasi i Tutuila-i le itula e 6 i le afiafi.

E tusa ai ma le “fa’ai’uga lē aloaia”, na maua e Vaitautolu palota aupito maualuga i le 203 (po’o le 48.1%) o le aofa’i o palota, mai le 422 palota na faitauina i le Faiga Palota Fa’apitoa.

O Paepaetele Mapu Jamias na maua le palota lona lua maualuga e 128, sosoo ai ma Mailo Oge T. Nua e 48 palota, ae 43 palota a Leifitele Aliitama Sotoa.

E tusa ai ma tulafono fa'alotoifale, e 7 aso e fa'atali a'o le'i fa'ailoa ma fa’amaonia aloaia le fa'ai'uga ma fa'ailoa aloa'ia e le Ofisa Sili o Faiga Palota lē ua manumalo.

Afai o Vaitautolu - lea sa avea ma sui fa’atonu sili o le Matagaluega o Aoga mo le tele o tausaga se’ia oo i le nofoaiga a le Faigamalo a Lemanu ia Ianuari 2021 - o le a manumalo aloaia ai, e na o ia lava le tamaitai faipule i totonu o le maota mo le 38 o le Fono Faitulafono o lo o i ai nei.

Sa fa’ailoa mai e sui o le faiga-palota e silia ma le 700 le aofa’i o tagata palota ua lesitalaina o lo’o i totonu o le lisi o tagata palota mo le Itumalo o Manu’a #1. Ma e oo atu i le Aso Lua pe tusa o le itula e 3 i le afiafi po o le itula e 4 i le afiafi, na amata ai loa le faitauga o fale palota e lua i Manu’a ina ua uma ona fai palota a tagata palota. O fa’ai’uga-lea e vave ona o’o atu i isi i vTutuila e ala i le telefoni ma feso’ota’iga fa’asalalau-na vala’au atu ai sui o le Palota i le Ofisa autu o Faiga-Palota.

E fa’ailoa atu e le Samoa News e faapea, e lua nofoa mo le Maota Itumalo #1 Manu’a. O le isi nofoa o lo o umia e le faipule tuai ma le Sui Fofoga Fetalai o lo o i ai nei, Fetui Fetu Jr.