Fa’ai’u tuliga a leoleo ma se alii i moliaga o le faatupu vevesi ma le fa’ao’olima

Pago Pago - AMERIKA SAMOA

O le aso 14 o Iuni sa telefoni mai ai se alii i le Ofisa a Leoleo i Tafuna (TPS), ona o le susuga ia Tavita Tuisalo’o, o lo’o faia ni uiga taufa’amatau ia i la’ua ma se isi alii la te galulue faatasi, i le lapisi i Futiga.

Sa ta’ua e le na valaau mai i le TPS le taumafai o Tuisalo’o e tatui i la’ua ma ina ua taunu’u foi leoleo, sa faapea foi ona oso mai le ua molia ma lana mata tao i leoleo ma fa’ai’u ai ina faia se latou tuliga ma leoleo ma nisi o tagata sa iai i lea taimi.

E tusa ai ma faamaumauga a le malo, sa faamatala e le na valaau mai i le TPS le fa’aaogaina e le ua molia, ia se la’au umi e pei se mata tao fagota, e faamata’u ai i la’ua ma seisi ali’i e la te galulue faatasi.  Ma sa o la fa’atonuina le ua molia, ina ia alu ‘ese ma le nofoaga o lafoa’i ai lapisi, i Futiga, ina ne’i manu’a seisi.

Ina ua taunu’u leoleo sa o latou talatalanoa ma le na valaau mai i le TPS ma sa faamatalaina e lea alii, o le 7:35 i lea taeao, sa paka ai se taavale pa’epa’e i fafo o le pa o le lapisi ma na aga’i atu iai le alii lea na la to’alua (molimau #2).

Sa faatonu e le molimau #2 ia le tagata sa i totonu o le taavale pa’epa’e, ina ia fua muamua lana lapisi ona fa’ato’a mafai lea ona lafoa’i.  Ae peitai, sa ta’ua e le na valaau i leoleo, e foliga mai e le i manino le faatonuga pe e le’i malamalama lelei foi ia le tagata lea sa i totonu o le taavale, i le faamatalaga a le molimau #2.  Ma o lea, na oso mai ai le ua molia mai totonu o le taavale ma lana mata tao ma amata ona palauvale leotele, ma sa faapea mai foi le ua molia, e na te tuiina se tasi e le alu ese ma le lapisi.

Sa faamatala e le molimau #2, o lona fefe tele ina ne’i tui o ia e le ua molia, i lana mata tao, o lea na ia toe faatopetope ai i le ofisa ma a’o ia aga’i atu i le ofisa, sa ia fa’alogoina le palau vale leotele o le ua molia, ma le fa’aumu.

Sa iai foi seisi molimau sa na ia molimauina le tau’aia e le ua molia, o alii ia latou te galulue faatasi.

Na fa’asino e le na valaau i le TPS, i leoleo, ia le nofoaga o iai Tuisalo’o.  Ma ona sa va’aia e leoleo le tata’eina e le ua molia o le faamalama pito i luma o lana taavale, o lea na taumafai ai leoleo e agai lemu atu ia te ia.

Ae ina ua taumafai leoleo e talanoa atu ia Tuisalo’o, sa liliu mai lenei alii ma taumafai e ta leoleo i se paipa u’amea sa ia u’uina i lona lima taumatau ma tau’ai i ma’a sa i lona lima tauagavale.

Sa taumafai leoleo e fa’ato’ato’a le mataupu, ae peitai, na savali atu Tuisalo’o ia i latou ma palauvale, ma faatonu i latou e o ese.

Na faapea ona toe fo’i leoleo i le latou taavale ma valaau le fesoasoani mai i nisi leoleo.  A’o fa’atalitali leoleo mo le taunu’u atu o se fesoasoani, sa toe savali mai ai Tuisalo’o ma fa’aauau ona palauvale leotele ma togi le taavale a leoleo i le paipa sa ia uuina.  Ae ina ua misi lana togi, sa ia tamo’e mai loa agai i le taavale a leoleo.

Na solomuli leoleo, e tusa ai ma faamaumauga a le malo, ona o lo’o faamoemoe i le taunuu atu o ni isi leoleo e fesoasoani.

A’o solomuli mai le taavale a leoleo, sa toatele nisi o taavale sa agai atu e lafoa’i a latou lapisi ma na taofia i latou e leoleo ma faatonuina i latou ina ia agai atu i se nofoaga e saogalemu ai.

Ae o le taimi lea ua tamo’e atu ai Tuisalo’o i se pikiapu na tu i luga o se mati’e, ma ia taumafai e tu’i le avetaavale, a’o ia u’uina ni ma’a i ona lima.  Ae ina ua taumafai leoleo e tosina atu o ia, na liliu Tuisalo’o ma tuli ni isi tagata se to’atolu ma tau’ai latou i ma’a.

Ina ua le maua e Tuisalo’o ia tagata sa ona tulia, sa ia liliu loa agai i le pa a le ASPA o lo’o iai nisi o ana tagata faigaluega, ma amata ona tau’ai latou i ma’a ma so’o se mea na tau iai lona lima.  Ae o le taimi lea ua tau fa’alatalata atu leoleo ma taumafai e pu’eina lenei alii.  Ae na iloa mai e Tuisalo’o le o’o atu o le taavale a leoleo, ma ia tamo’e mai aga’i i le taavale ma toe fa’aauau ona taua’i i ma’a.

Sa taumafai leoleo ina ia fa’aaoga le taavale a leoleo e fai ma tali pupuni i le va o Tuisalo’o ma tagata sa iai i lea taeao.  Ae na avea lea ma tulaga na taia ai Tuisalo’o i le ta’avale ma pa’u ai ma mafai ai loa ona pu’eina o ia e leoleo, faatasi ai ma le fesoasoani mai i le aufaigaluega a le ASPA.

O lo’o ta’ua foi i faamaumauga a le malo, le fa’afaigata foi ona taofiofi e leoleo ma le aufaigaluega a le ASPA o Tuisalo’o, ae sa i’u lava ina mafai ona lokaina o ia ma ave’eseina mai loa o ia e leoleo, ma auina atu i TPS, lea na togafitia ai ona manu’a e le vaega a le EMS.

Na talosagaina e Tuisalo’o le fia aveina o ia i le falemai ma sa faapea ona aveina o ia i le falemai ma taofia ai o ia i le falemai i le 9:16 o lea taeao.  Ae o le 5:10 i le afiafi, i le mae’a ai ona siakiina o ia e foma’i, sa faamaonia ai ni nai ma’osia ma le tina o lona tino.

Sa faailoa mai ai foi e le fomai i leoleo, le fa’amaonia o le a’afia o lenei alii i vaega o fualaau faasaina.

Na toe aveina atu Tuisalo’o i le TPS mo le fa’aauauina o su’esu’ega a leoleo, lea na ta’ua ai e Tuisalo’o, na mafua lona to’atama’i i lea taeao, ona o ni fa’afitauli i totonu o lona aiga.

Ua molia nei Tuisalo’o i moliaga e lua, e aofia ai;

Faitauga 1:  Faatupu Vevesi i Nofoaga Faitele – o se vaega ‘B’ o solitulafono mama, e mafai ona nofosala ai i le falepuipui mo le ono masina po o se sala tupe e $500; po o faasalaga uma e lua.

Faitauga 2:  Fa’ao’olima i lona tulaga e tolu – o se vaega ‘A’ o solitulafono mama, e mafai ona nofosala ai i le falepuipui, i le o’o atu i le tasi (1) tausaga po o se sala tupe e $1,000; po o faasalaga uma e lua.

E $2,000 le vaegatupe sa faatulagaina, e tatalaina ai le ua molia, e fa’atali ai lona faamasinoga.