Fa’ai’u fusuaga a ni alii se to’alua i le falepuipui o le to’atasi

Pago Pago - AMERIKA SAMOA

E tusa ai ma faamaumauga a le malo, o le afiafi o le aso 2 o Iuni, 2024, na vala’au mai ai se alii i le Ofisa a Leoleo i Tafuna ona o ni alii se to’alua o lo’o fufusu i totonu o se faleoloa, i Se’etaga.

Ina ua taunu’u leoleo, sa faamatalaina iai e le alii na valaau mai i le ofisa a leoleo, e le’i iai o ia i le nofoaga na tupu ai le misa, ae sa faamatala atu e lana uo e ana le faleoloa, o le Alataua Mart, le fusuaga a alii e to’alua sa fai i totonu o lana faleoloa.  Sa ta’u fo’i iai e lea alii ia suafa o i la’ua na fufusu, o Sipaia ma Gafatasi, ma e le mamao mai i le faleoloa, le mea o iai o la fale.

E na’o le tasi le faleoloa i Se’etaga ma sa agai iai leoleo ma o latou talatalanoa ma le pule o le faleoloa, lea foi sa molimauina le faafitauli na tupu.  Sa ia ta’ua e faapea, na alu atu se alii i totonu o lona faleoloa, ae o lo’o talanoa mai i se tagata i fafo o le faleoloa.

Na ta’ua e le pule o le faleoloa lona fa’ate’ia ina ua ulufale mai leisi tamaloa i totonu o lona faleoloa ma taumafai e titina le ua o le alii lea o lo’o totonu o le faleoloa ma amata ona o la fufusu.  Sa faatonuina e le pule o le faleoloa ia le to’alua lea e ave i fafo le la fusuaga ona ua amata ona pa’u’u mai lalo oloa mai fata.

Ina ua o i fafo ia alii ia e to’alua, na valaau loa e le pule o le faleoloa ia lana uo, lea na valaau i le ofisa a leoleo ma faamatala iai le mea na tupu.

Sa fa’aali foi e le pule o le faleoloa, i leoleo, ia le ata vitio na pu’eina i lona faleoloa, lea na va’aia ai se alii lapo’a o lo’o talanoa i se tagata i fafo o le faleoloa. Ma na vaaia seisi alii o savali mai totonu o le faleoloa ma kola atu le ofu o lea na i totonu o le faleoloa ma taumafai e titina.  Ona fa’aauau ai lava lea o le la fetosoa’iga lavalava, se’ia o’o ina la toe ulufafo atu ma le faleoloa.

Ina ua fesiligia e leoleo se tasi na i totonu o le faleoloa, o lo’o fai sana faatauga, pe na te silafia nei alii e to’alua, sa fa’ailoa mai e le tagata lea, o Sipaia Vivi lea na a’afia, ae o Gafatasi Taveuveu lea ua molia nei i le tulafono, ma e le mamao tele le mea e nonofo ai mai i le faleoloa.

Na aga’i atu loa leoleo i le maota o Taveuveu ma valaau atu i totonu o le fale ma fa’ailoa atu i la’ua.  O le taimi lea na savali ai le tasi o leoleo i tua o le fale ma fetaui ai ma se tamaititi i fafo o le fale, ma fesiligia ai e le leoleo le tamaititi pe na te silafia ia Taveuveu.  Sa tali le tamaititi, o lona tama lea.  Na toe fesiligia e leoleo ia le tamaititi, po o iai i le fale lona tama, sa tali le tamaititi, ioe, ma faapea atu le tamaititi i leoleo, e mulimuli atu ia te ia, i totonu o le fale.

Ina ua ulufale atu leoleo i totonu o le fale, sa va’aia se tamaloa o tu mai i le umukuka ma ina ua fesiligia po o ia o Taveuveu, na tali mai ioe, ma na lokaina mai ai loa o ia e leoleo.

A’o ta’ita’i mai e leoleo ia Taveuveu i le taavale a leoleo, sa lagonaina e leoleo le manogi pia o lea alii.

Na faapea ona toe aga’i atu leoleo i le fale a Sipaia Vivi ma fa’atalanoaina ai o ia ma sa faamatalaina e Vivi le fa’ate’ia tele o ia ina ua alu atu le ua molia i totonu o le faleoloa ma taumafai e titina o ia ma tu’i ona foliga, ma tulei solo o ia.

Na ta’ua e Vivi, na mafua ona faia e le ua molia lea tulaga, ona o le lotoleaga, i lona (Vivi) talanoa i lona (Taveuveu) to’alua a’o latou fa’atali pasi faatasi, i le fale faatali pasi i tafatafa o le pamu kesi a Alamai i Leone. 

Sa toe fo’i atu leoleo i lo latou ofisa ma fa’atalanoaina ai le ua molia ma e tusa ai ma le faamatalaga a Taveuveu, sa ia faamaonia ai lona faaoolima ia Vivi ona sa vaai o talanoa Vivi ma lona toalua ma tutupu mai ai ni ona masalosaloga.

Ina ua fa’aali atu iai e leoleo ia Taveuveu ia le ata vitio mai i le faleoloa, ma na fa’amaonia e Taveuveu, o Vivi lea sa i totonu o le faleoloa ma o ia lea sa fa’ao’olima ia Vivi.

Na molia ai loa ia Taveuveu i moliaga o le Faatupu Vevesi i Nofoaga Faitele – o se vaega ‘B’ i solitulafono mama, e mafai ona nofosala i le falepuipui i le ono masina po o se sala tupe e $500; po o faasalaga uma e lua.

E $1,000 le vaegatupe sa faatulagaina e tatalaina ai le ua molia mai i le falepuipui, e faatali ai ona faamasinoga.