Fa’ailoa Vui lona popolega fa’alavelave na tula’i mai i le Pala Lagoon

Ua fa’aalia e le afioga i le Tama’ita’i Faipula ia Vui Florence Saulo sona popolega i le saogalemu o fanau aoga, talu mai le fa’alavelave lea na tula’i mai i le taelega o le Pala Lagoon Swimming Pool i Tafuna i le 2 vaiaso talu ai.

O lagona atugalu o le afioga i le tama’ita’i faipule mai le itumalo o Tualauta, sa fa’aalia lea i sana tusi sa tuuina atu i le Fa’atonusili o le Matagaluega o Aoga a le malo, Dr. Ruth Matagi-Tofiga.

O le kopi o lea tusi sa tuuina atu fo’i lea i le afioga i le ali’i Kovana ia Lolo Matalasi Moliga, Lutena Kovana ia Lemanu Palepoi Peleti Mauga, Pule o le Pala Lagoon ia Nua Salanoa, ma matua o le tama’ita’i na maliu, susuga Sililo ma Winnie Toese.

O le tama’ita’i o Tinian Toese, na maliu o ia ao i ai i se tafaoga a le Vasega 8 a le Aoga Tulaga Muamua a Pava’ia’i ia Iuni 13, 2018 i le taelega i le Pala Lagoon Swimming Pool.

Na fa’anatinati atu lona tino i le falema’i i Fagaalu, peita’i na siliga tali i seu se lavea’i mo ia.

Na taua e Vui i lana tusi ia Dr. Matagi-Tofiga i le aso 19 Iuni le fa’ateia o ia i le tala fa’anoanoa e fa’atatau i le teineititi aoga na malemo i le taimi o le tafaoga a le aoga i le 2 vaiaso talu ai.

Saunoa Vui e fa’apea, o se tulaga pagatia o loo feagai ma matua o lenei teineititi, talu ai le fa’anoanoa ua la maua e fa’atatau i le maliu o si a laua tama ulumatua. Ae i le avea ai fo’i o ia o se matua, e talitonu ai lona loto, e le mafai e upu ona fa’amatala lagona tiga ma le mafatia ua oo i ai matua o lenei teineititi.

Na taua atili fo’i e Vui lona maua o ni ripoti e fa’atatau i le mea moni sa tupu, lea na atagia mai ai le fa’atamala o le vaavaaiga lelei o fanau aoga sa i ai i lea tafaoga. O ia ituaiga fa’amatalaga salalau solo e pei ona taua e le tama’ita’i faipule, ua alia’e mai ai le anoanoaa’i o le mau fesili i tulaga o ta’iala ma faiga fa’avae a le Ofisa o Aoga i tulaga o tafaoga aoga.

E ui i le tele o fesili, ae na taua e Vui le taoto pea o le mataupu seia mae’a suesuega a le Ofisa o Leoleo o loo fa’agasolo i le taimi nei, ina ia mafai ai ona manino tonu le mata o le vai i le mafua’aga o le fa’alavelave.

“E tuu atoa mai lava e matua lo latou talitonuga i faiaoga mo le puipuia lea o le saogalemu o a latou fanau, ae a tula’i mai loa fa’alavelave fa’apenei, o le fesili muamua lea e tula’i mai, o fea sa i ai faiaoga,” o se vaega lea o le tusi a Vui.

“Tatou te iloa uma lava, o tamaiti lava ia, e i ai taimi e faigata ai ona fa’atonutonu i latou, ae maise lava pe a oo ina fiafia, ae o le mea moni lava ia, e tatau lava ona mautu le puipuia o lo latou saogalemu.”

Na taua atili e Vui i le Fa’atonusili o Aoga, lona talitonuga atoatoa, o le fa’alavelave lenei na tula’i mai i le vaiaso o fiafiaga a fanau aoga a o lumana’i ai fa’auuga a fanau aoga. E ui i lagona fiafia ona o vaitau o fa’auuga a fanau, ae le tatau ai lava ona aveesea le tatau lea ona mataala faiaoga i le fa’atinoina o le latou tiute.

“O fanau aoga e laiti, o le tatou tiute fo’i o le mautinoa lea o lo latou saogalemu. O ta’iala fo’i ua uma ona fa’ataoto e le ofisa o aoga, sa faia ina ia le gata e puipuia ai fanau aoga, ae faapea fo’i ma faiaoga latou ia.”

“Ou te tatalo ina ia maua pea e matua o le teineititi ua maliu le loto tele ao feagai ai ma taimi faigata o le olaga, ae sili ai i lo lena, ia avea lenei fa’alavelave ma lesona taua i o tatou olaga, o le ave lea o le tatou fa’amuamua i le tausia lelei o le saogalemu o fanau aoga.”

SUESUEGA A LEOLEO

O le vaiaso na te’a nei na mae’a aloaia ai le suesuega a Leoleo e tusa ai o lenei mataupu. I le mae’a ai o le suesuega, na tuuina atu ai loa se ripoti i le Loia Sili a le malo, tofa Talauega Eleasalo Ale, e talosagaina ai le fa’amatu’u atu o le tino o Tinian i lona aiga.

O le foma’i ia Dr. G. Heiderich sa fa’atinoina le suesuega ina ua taunu’u le tino o Tinian i le falema’i i le aso 13 Iuni 2018, ma fa’alauiloa aloaia ai loa lona maliu i le itula e 1:25 i le aoauli o le aso lava lea.

Na taua i le ripoti e fa’apea, e leai se gaioiga fa’asolitulafono sa masalomia na faia, na mafua ai ona oo le maliu ia Tinian, ae na maliu o ia ina ua malemo. O se suega sa faia na faailoa mai ai na malemo o ia.

FA’AMANINOINA O LE MATAUPU E FA’ATATAU I LE IFOGA A LE AOGA

Talu ai ripoti ua salalau e fa’atatau i le mataupu o le “ifoga” sa faatinoina e le Puleaoga ma Faiaoga, ua manatu ai le susuga Toese e fa’amanino lenei mataupu mo le fa’afofoga a le atunu’u.

O le mataupu e fa’atatau i le ifoga, o se tasi lea o tu ma aganu’u a Samoa e uia e le aiga na mafua ai le fa’alavelave, pe afai ua maliu se tagata o le isi aiga. O le ifoga, e aofia ai le pulolou lea o le aiga ua sese i le ietoga i luma o le maota poo le laota o le aiga o le ua a’afia, e fa’atali ai se fa’aiuga a le aiga pe talia pe teena.

O le gaioiga sa faia e le Puleaoga ma Faiaoga e pei ona saunoa Toese, e le o se ifoga, ae ua na o se fa’atoesega lava sa fa’ataunu’uina i totonu o le maota o le latou aiga.

“E leai se isi na pulou i fafo o le malae i se ietoga, e le i fa’ailoa atu fo’i e le aoga o se ifoga o le a alu atu. Pau le fa’amatalaga na tuuina atu i le matou aiga, o le latou sauniga lotu mo si o’u afafine, ae na fa’ateia lo matou aiga ina ua mae’a le sauniga lotu i lea afiafi, ae vaaia loa le tootuli o se tasi o faiaoga, e atagia mai ai le agaga na mafua ai ona oo atu, o le fa’atinoina lea o sa latou fa’atoesega, ae le o se ifoga,” o le saunoaga lea a Toese.

Na taua e le fa’atonusili o Aoga i se pepa o fa’amatalaga na tuuina mai i le Samoa News i le vaiaso na te’a nei, sa fa’atinoina e le Puleaoga ma Faiaoga le ifoga i le aiga o Tinian, e tusa ai o lenei fa’alavelave matuia.