Faailoa malo mafuaaga na maliu ai se tagata faigaluega Titanic Cooperation

Pago Pago, AMERIKA SAMOA - O le ulua’i iloiloga i le mataupu o lo o molia ai le susuga a Tusi Fala lea sa faia i luma o le afioga i le ali’i Fa’amasino ia Elvis P. Patea i le vaiaso na te’a nei, na faamanino ai e le malo le mafua’aga na ala ai ona maliu le ali’i lea na maua lona tino i totonu o se tama’i fale i le afioaga i Vaitogi.

E pei ona taua e le molimau e to’atasi a le malo na valaau e molimau i le ulua’i iloiloga, le tamaitai Leoleo Satini ia Sgt. Claudya Mamea, e tusa ai o le taotoga faapitoa sa faia e se foma’i mai le Falema’i o le LBJ Hospital, o le mafua’aga na maliu ai le alii na aafia, ona o se pu na aafia ai lona mama agavale.

O le pu na aafia ai le mama agavale o le alii ua maliu, na mafua mai ina ua ulu i ai le itu maai o se aupega sa fa’aaoga e faaoo ai le solitulafono. E le gata i lea, ae na maua ai foi i totonu o le tino o le alii ua maliu le isi vaega o le tamai naifi lea e masalomia na fa’aaoga e faaoo ai le maliu ia te ia, o loo mau i se tasi o ona ivi asoaso.

O Fala, lea o lo o taofia pea i le Toese i Tafuna ina ua le mafai ona ia totogi le $20,000 na faatulaga e tatala ai o ia i tua, o lo o molia i le moliaga e tasi o le fasioti tagata pa’i valea.

O le ali’i loia fautuaga lagolago ia Bob Stuart na tula’i mo Fala, ae o le tamaitai loia sili lagolago ia Laura Garvey na tula’i mo le malo. 

Na taua e Sgt. Mamea i lana molimau e fa’apea, pe tusa o le itula e 3:20 i le vaveao o le aso Toona’i, Me 16, 2020 na maua ai e le Ofisa o Leoleo i Tafuna se telefoni mai se tagata faigaluega a le Titanic Cooperation mai Vaitogi mo se fesoasoani, ona o se isi alii faigaluega a le kamupani na maua lona tino o loo taoto i luga o se moega i totonu o se Fale Tuufua faatasi ai ma se vaega tele o le toto ua lilofia ai se vaega o lona tino.

O Sgt. Mamea ma isi Leoleo Suesue e to’alua na to’atolu i ai Leoleo Suesue na galulue mo le suesueina o lenei mataupu. 

E taunu’u atu Sgt. Mamea i le Ofisa o Leoleo i Tafuna , e to’atolu alii o loo nonofo mai ai, o i latou ia o tagata faigaluega a le Titanic Cooperation mai Vaitogi. O i latou e to’atolu e aofia ai le alii ua molia ia Fala, o Tiute Paolo ma Sone Salatielu. 

O le mae’a ai ona fesiligia e Sgt. Mamea i latou nei e to’atolu e tusa ai o le faalavelave na tula’i mai, na ia aga’i atu ai loa i le nofoaga na tula’i mai ai le fa’alavelave i Vaitogi mo le tau sailia mai o a’upega na fa’aaoga i le fa’alavelave. Na taua atili e Sgt. Mamea i lana molimau e fa’apea,  e na o le sipika ma le tama’i naifi na uu e le ua maliu na maua, ae le’i maua le tama’i naifi na fa’aaoga e Fala e faaoo ai le maliu i le na a’afia, o ia lea o Filiki Tupuola.

FESILIGIA MOLIMAU

Na taua e Paolo i Leoleo e fa’apea, o le aso Faraile, Me 15 i le va o le 4:30 ma le 5:00 i le afiafi, na aga’i atu ai le Pule o le kamupani a le Titanic Cooperation ma nisi o tama faigaluega e to’alima, e aofia ai le ua molia ma le ali’i ua maliu e tala a latou siaki i se tasi o Faleoloa, e ala i le faatauina o a latou pia ma sikaleti. 

O le isi to’alua o alii faigaluega na aga’i atu e tali i le valaau mai le Vaega a le Suavai ma le Eletise (ASPA), e fesoasoani lea i le faaleleia o se paipa sa faaletonu. O le isi to’alua e aofia ai le ali’i ua maliu na aga’i atu i le nofoaga o lo o i ai le Laulau Piliati ma ta’aalo ai. O Fala na toe fo’i i le fale ina ua mae’a ona tala lana siaki.

Na taua e Paolo e faapea, sa aitalafu e Fala le $20 mai le alii ua maliu i le vaiaso ua tuana’i. Sa i ai la le manatu o le alii ua maliu e tatau ona toe totogi uma atu e Fala lana tupe atoa e $20 pe a maua lana siaki. Ae ina ua maua le siaki a Fala, e na o le $5 na ia toe totogi i le alii ua maliu.

O le mae’a ai o le tusa ma le 2 itula talu ona taalo piliaki le ua maliu, na toe fo’i ai loa i le fale e taele ma fai sina meaai. Sa ia taunu’u i le fale ma ia vaaia ai Fala o loo i ai fo’i i le fale, ona ia fai lea ia Fala poo fea lana tupe sa ia aitalafu, ae na tuli ese e Fala le ua maliu ina ua mae’a ona ia tuu atu i ai na o le $5 ma fai i ai e alu ese ma ona luma.

E le i alu ese le ua maliu mai luma o Fala ae sa fa’aauau pea ona ia fesiligia Fala e totogi atu lana tupe, ae sa finau fo’i Fala e alu ese ma ona luma. O iina lea na mafua ai loa ona tula’i mai se taugaupu i le va o Fala ma le alii ua maliu ma toeitiiti ai lava pa’i lima i laua, ae na vave ona taofi ina ua oso atu Paolo ma fai i ai e soia le pisa.

Na taumafai Paolo e aveese le ua maliu mai le fale, ma fai i ai la te toe fo’i i le Laulau Piliaki la te eva ai. O le taimi fo’i lea na savali ese ai Fala mai le vaega na tau tula’i mai ai le vevesi ma aga’i atu i lona fale, peita’i na toe fo’i mai Fala ma le ita ina ua valaau atu i ai le ua maliu ma faapea atu, “lou mea ai gaoi”.

Na toe fo’i mai Fala ma se naifi o loo uu i lona lima ma faalala i le ua o le alii ua maliu ma fai i ai, e toe tautala atu loa ona ia tui ina loa lea o ia i le naifi. Na tula’i mai fo’i le alii ua maliu ma lana fo’i tama’i naifi i lona lima ma faalala i le ua o Fala ma fai i ai, na te tui ina fo’i o ia i le naifi pe afai e toe fai atu sana tala ia te ia. 

Na mafai ona vaovao e se alii faigaluega sa i ai i le taimi lea le vevesi na tau tula’i mai i le va o Fala ma le alii ua maliu. 

Ae o le taimi na savali atu ai Fala i le pusa aisa e aumai sana faguvai, na faafuase’i ai ona savali atu le ua maliu ma tu’i o ia na ta’e ai lona mata agavale. Na vaaia e Fala le alii ua maliu o loo ia uu se naifi i lona lima, ae o le taimi fo’i lea o loo uu fo’i e Fala se tama’i naifi i lona lima. O le taimi lea na aapa atu ai loa Fala i le sipika sa taatia i ona tafatafa ua uu mai i lona lima, le lima lea o loo ia uu ina ai le naifi ma togi ai loa le ua maliu i le sipika ma la naifi. 

Na alu atu le naifi ma tu i le fatafata o le alii ua maliu ma pau ai loa i lalo o le foloa o le fale. 

Na fesili Garvey i le molimau, poo le a le gaioiga a Fala na fai i le taimi na ia vaaia ai Tupuola ua pau i lalo faatasi ai ma le puna a’e o le toto i lona fatafata. Na tali le molimau e fa’apea, na savali ese Fala mai le vaega na taatia ai le tino o Tupuola e pei lava e leai se mea o tupu.

Na ta’ita’i e Paolo ia Tupuola i le fale tuufua ma faataoto i luga o le moega, ona alu lea i lona fale ma aumai le mea’ai ma le vai mo Tupuola. E le i manatu Paolo e matuia manu’a na aafia ai le fatafata o Tupuola, o lea na ia faataoto ai pea o ia i luga o le moega ae toe aga’i atu i le Laulau Piliaki e taalo ai. 

O le vaveao o le aso na sosoo ai na maua atu ai e le isi alii faigaluega a le Titanic ia Salatielu ia Tupuola ua maliu i luga o le moega ma logoina ai loa Leoleo mo se fesoasoani.

FAAIUGA O LE TAOTOGA SA FAIA

O le taotoga lea sa faia e se foma’i faapitoa a le Falema’i o le LBJ i le vaiaso na te’a nei, na iloilo ai le mafua’aga o le maliu o Tupuola. O le faaiuga e pei ona taua e le molimau a le malo, na maliu Tupuola ona o se pu na aafia ai lona mama agavale, e mafua mai ina ua ulufia i se mea ma’ai. 

E le gata i lea, ae na maua ai fo’i i le taimi o le taotoga se vaega maai o se naifi o loo maua i se tasi o ivi asoaso o le fatafata o Tupuola.

O le aso Faraile na te’a nei na tula’i ai Fala i luma o le Fa’amasinoga Maualuga ma ia teena ai tu’uaiga faasaga ia te ia. O le aso 23 o Iulai lea ua fa’atulaga e toe valaau ai lana mataupu.