Fa’ailoa i le Kapeneta amioga le fa’amaoni a ni isi tagata faigaluega malo

O le fonotaga a le afioga i le ali’i kovana ia Lolo Matalasi Moliga ma lana Kapeneta i le vaiaso na te’a nei, na fa’ailoa ai e le ali’i kovana i luma o afioga i Fa’atonusili amioga le fa’amaoni o lo o fa’atinoina e ni isi o tagata faigaluega, e aunoa ma lo latou silafia.

O ia tulaga e aofia ai le fa’aauau pea o le fa’aaoga o ta’avale a le malo i auala le tonu, atoa ai ma le fa’aauauina pea lea o le fa’afitauli i ova taimi i auala le sa’o, ma gaoi ai tupe a le malo.

E ui o lea ua taoto le tulafono e fa’asa ai ona toe ave e tagata faigaluega ta’avale a le malo i aiga, se’i vagana ai lava Fa’atonusili, ae na taua e le kovana i lana saunoaga le maitauina pea o le to’atele o tagata faiglauega a le malo e le o usitaia lea tulafono.

“E to’atele pea tagata o lo o feoa’i i ta’avale a le malo e le tatau ona feoa’i ai, o isi ua fa’aaoga ta’avale e aunoa ma se fa’atanaga poo pemita, e talosaga atu ai i le Komesina o Leoleo ina ia alofa fesoasoani mai i lenei fa’afitauli, soo se ta’avale e maua e leai se faatanaga e fealua’i ai, ave i le ofisa o Leoleo e taofi ai, ae alu atu le Fa’atonusili e totogi le $500 e tatala mai ai, afai e leai se tupe e totogi, taofi ai pea le ta’avale”, o le saunoaga lea a Lolo.

E o o foi i le mataupu i ovataimi, o lo o maitauina pea tagata faigaluega a le malo o lo o faia auala le fa’amaoni e maua ai itula ova taimi, e pei o le pani o le pepa i le 6 i le taeao ona fealualua’i ai lava lea faatoa amata galuega i le 7:30 poo le 8:00.

“O se faiga le fa’amaoni lea tulaga o le pani o le pepa i le 5 poo le 6 i le vaveao ae faatoa amata galuega i le 8, o le taimi lava e pani ai le pepa o le taimi fo’i lena e tatau ona amata ai le galuega, o le mea lea e toe fa’amanatu atu ai i Fa’atonusili, e le o fa’atagaina ni ova taimi a le malo i le taimi nei”, o le saunoaga lea a le ali’i kovana.

Sei vagana ovataimi e talia ma pasia mai e le kovana ona fa’atoa mafai lea ona fa’atino, e pei ona fa’amanino e le kovana i le Kapeneta.

“O le isi fa’afitauli lea ua maua, e feofeoa’i i le vaiaso atoa e le faia ni galuega, ae a oo i le aso Toona’i ona fa’atoa tulioso lea e fai galuega, o se tulaga e le taitai talia e le tatou malo ia amioga”, o le saunoaga lea a le ali’i kovana.

Na toe faamamafa e Lolo i lana Kapeneta e fa’apea, e mafua ona tutupu ni isi o fa’afitauli i totonu o ofisa, ona e le o mataala i latou i le vaavaaia atoa ai ma le fa’atonutonuina o gaioiga uma e tatau ona faia.

“Faamolemole atu i a outou afioga i Fa’atonusili, toe silasila i mea o loo tutupu i totonu o lou Ofisa. E mafua ona le faia galuega i le vaiaso atoa ae faatoa tulioso i le aso Toonai e fai, ona e le o lelei le fa’atulagaina o galuega fa’atino, e foliga mai e le o silafia e oe le Fa’atonu mea o loo tutupu i totonu o lou Ofisa”, o le saunoaga lea a Lolo.

“Aua le tu’u tia’iina lau matagaluega e ta’ita’i e le isi tagata, o lou tiute o le fai o fa’aiuga ma faamaonia mea uma e manaomia i totonu o le Ofisa, pe lelei pe leaga faaiuga e fai, e pau lava ia oe le Fa’atonu, e pei fo’i o le malo, o lelei ma leaga e pau ia maua ma le Lemanu”.

Na faaiu le saunoaga a le ali’i kovana i lona talosagaina lea o le kapeneta ina ia taumafai i le mea sili e gata ai lo latou malosi, e fa’asaosao le soona faaalu o tupe a le malo, ina ia mautinoa e tulaga lelei le faiuaga o le tausaga tupe lenei.

Sa ia taua e fa’apea, afai na mafai e le malo ona faalelei le faaiuga o le tausaga tupe sa sili ona faigata ua mavae atu, e tatau fo’i ona mafai ona latou faia le tulaga lena i le tausaga tupe lenei.