Fa’ailoa i le fa’aiuga e le aloaia toe manumalo Lolo ma Lemanu

E pei ona fa’ailoa mai i fa’amaumauga e le aloaia a le Ofisa o Palota a le atunu’u i le po anapo, i le mae’a ai lea o le sailiga tofi a Amerika Samoa i le aso ananafi, ua toe tula’i mai ai le toe manumalo o le paga a Lolo Matalasi Moliga ma Lemanu Peleti Mauga, o le ta’ita’iina o le faigamalo a Amerika Samoa mo le isi 4 tausaga o lo o lumana’i nei.

O le nofoaiga lona lua lea a Lolo ma Lemanu mo le ta’ita’iina o le faigamalo a Amerika Samoa, talu mai le taimi na la manumalo ai i le palota o le 2012.

E pei ona taua i le fa’aiuga ua tuuina mai e le Ofisa o Palota, o le paga a Faoa ma Sanitoa, e 4,305 le aofa’i o palota na maua, tusa lea o le 35.8% palota na maua, Lolo ma Lemanu e 7,235 palota na maua, tusa lea o le 60.2% o palota na maua, ma Tuika ma Maeva e 484 palota na maua, tusa lea o le 4.0% o le aofa’i o palota na maua, ma tula’i mai ai le aofa’i o palota na mafai ona faitauina mo le tausinioga i le tofi kovana ma le lutena kovana e 1,2024.

I lalo o tulafono tau faiga palota a Amerika Samoa, o le fa’aiuga aloaia o le faiga palota a le atunu’u o le a mafai ona tu’u aloaia mai, i le tuana’i ai o aso e 3 talu mai le aso na mae’a ai le faiga palota.

Pe tusa o le itula e 2:00 i le aoauli ananafi na taunu’u mai ai pusa palota mai Manu’a i le nofoaga autu o le Ofisa o Palota i Tafuna, ma sauni ai loa le aufaigaluega a le Ofisa o Palota mo le faitauina o palota mai Manu’a atoa ai ma palota a i latou o lo o alala i fafo, fa’apea ai i latou ua malaga ese ma le atunu’u (absentee ballot).

Pe tusa o le itula e 9:00 i le po anapo na fa’alauiloa aloaia ai loa i le nofoaga autu o le paga a Lolo ma Lemanu le manino o le latou manumalo, ma fa’ai’u ai loa le latou fa’amoemoe i se sauniga lotu sa fa’atautaia i le maota o le afioga i le Maopu ia Fano i Fagaalu.

I lana saunoaga i le mae’a ai o le sauniga lotu, na fa’afetaia ai e le afioga i le ali’i kovana ia Lolo le atunu’u atoa e tusa ai o le latou faiga filifiliga.

“E leai lava se isi a’upega e sili atu ona faigofie ai ona manuia se fa’amoemoe ua na o le loto maualalo ma le galulue fa’atasi, o lea ua tu’uina mai e le Atua le tali o le sailiga malo a le atunu’u i lenei afiafi, tatou fa’afo’i lea o le fa’afetai i le Atua”,  o le saunoaga lea a le ali’i kovana.

“E momoli atu fo’i le agaga fa’afetai i isi paga sa tatou tauva i lenei fa’amoemoe, i le afioga ia Faoa ma Sanitoa, fa’apea ai Tuika ma Maeva, atoa ai ma i latou uma sa lagolagoina lo latou fa’amoemoe, o lea ua mae’a le palota a le atunu’u, o mai laia tatou galulue fa’atasi mo se manuia o Tutuila ma Manu’a”, o le saunoaga lea a Lolo.

O le tofa Tuaolo M. Fruean na fai ma fofoga o le Komiti sa tu’u fa’atasia le fa’amoemoe a Loloma Lemanu, e fa’afetaia ai Komiti uma sa galulue mo lenei fa’amoemoe, ae faapitoa lava i le au palota.

“O le manumalo a Lolo ma Lemanu i lenei aso, na mafua mai ona o outou uma sa palota ma galulue i Komiti, e ui e le faigofie lenei fa’amoemoe, ae fa’afetai i le Atua ua ia aumai le tali fa’aaliali”, o le saunoaga lea a Tuaolo.

I le fa’aiuga o le sauniga, na lolofi atu ai le to’atele o le atunu’u sa lagolagoina le fa’amoemoe a Lolo ma Lemanu ma latou feiloa’i atu i ta’ita’i o le atunu’u, ina ua mafai ona toe filifilia i laua e avea ma ta’ita’i mo le isi 4 tausaga.

E ui i le fa’aiuga o le palota mo lenei tausaga, ae na molimauina i le nofoaga autu a le paga a Faoa ma Sanitoa, i le maota o le tofa i le Matua ia Savea Rev. Tavita Loseti i Matu’u ma Faganeanea le fiafia o tagata uma.

Saunoa le afioga i le Tama Fa’agalia e fa’apea, o le fa’aiuga o le palota ua tu’uina mai, o le tali fa’aaliali lea a le Atua i le sailiga tofi a le atunu’u. Sa ia fa’afetaia fo’i le atunu’u atoa sa palota ma lagolagoina le la fa’amoemoe ma le susuga a Sanitoa.

Ae i le saunoaga a Sanitoa, sa ia fa’amanuia ai i le toe filifilia o le faigamalo a Lolo ma Lemanu e avea ma ta’ita’i o le atunu’u mo le isi fa tausaga.