Fa’ailoa fa’aiuga toe filifilia o Aumua Amata mo Uosigitone

O le mae’a ai o le sailiga tofi a le atunu’u i le aso ananafi, mo le sailia o sui Faipule i le Maota o Sui a le Fono Faitulafono a Amerika Samoa, fa’apea ai le nofoa o le Konekeresi i le Laumua i Uosigitone, ua tula’i mai ai le fa’aiuga e le aloaia mo tofi a le atunu’u e pei ona taua.

Mo le nofoa i le laumua i Uosigitone, ua toe manumalo ai le tofa a Aumua Amata mai le tausinioga sa latou tauva ai ma isi sui tauva e to’afa, i le aofa’i o palota e 8,923, tusa lea o le 75.4% o palota sa mafai ona faitauina. O le nofoaiga lona 2 lea a Amata mo le nofoa a le atunu’u i le laumua i Uosigitone.

Ae mo le tausinioga mo le maota o sui i le Fono Faitulafono, e to’a 6 faipule fou ua manumalo mai i nofoa a latou itumalo, ma le to’a 15 o faipule tuai ua mafai ona latou toe manumalo i nofoa o a latou itumalo.

TOFI FAIPULE MO LE KONEKERESI

E pei ona silafia, e to’alima sui na tausinio mo le nofoa a le atunu’u i le Konekeresi, ma o i latou ia e aofia ai Aumua Amata, Meleagi Suitonu-Chapman, Paepaetele Mapu S. Jamias, Tim Jones ma Vaitinasa Salu Hunkin-Finau.

O le aoauli ananafi na amata faitauina ai palota na mafai ona maua mai i le mamalu o le au palota o lo o alala i fafo, atoa ai ma i latou na malaga ese ma le atunu’u i le aso o le palota, ma tula’i mai ai fa’aiuga nei. Aumua 1,077; Meleagi 26; Paepaetele 105; Jones 15 ma Vaitinasa 195.

O le fa’aiuga la o le tausinioga mo le nofoa i le laumua i Uosigitone, ua tula’i mai ai Aumua i le manumalo i le aofa’i o palota e 8,923, o Meleagi e 181 ana palota, tusa lea o le 1.5%; o Paepaetele e 978 ana palota, tusa lea o le 8.3%; o Jones e 171 ana palota, tusa lea o le 1.4%, ma Vaitinasa e 1,581, tusa lea o le 13.4%.

O le aofa’i o palota sa mafai ona faitauina i le tausinioga i le konekeresi, tusa lea e 11,834.

MAOTA O SUI I LE FONO FAITULAFONO

I le tauvaga mo nofoa o itumalo taitasi a le atunu’u i le maota o sui o le Fono Faitulafono, ua atagia mai ai le toe manumalo o le tofa i le Tootoo ia Savali Talavou Ale, lea fo’i o lo o avea ma Fofoga Fetalai o le maota o sui, mo le nofoa o le itumalo o Alataua, ina ua leai se isi la te tauva mo le tofi a le itumalo i le aofa’i o ana palota na maua e 408.

E ui e leai se sui na tauva ma le tofa Savali, ae na fa’ataunu’uina lata le palota mo le Itumalo #14 a Alataua, ma ia maua ai palota e 408.

O faipule fou e to’a 6 ua manumalo mai i nofoa a latou itumalo e aofia ai le sui pito i laititi mai le itumalo o Tualauta, susuga Samuelu Ioka Ale Maleisea, lea ua to’alua mai ma le afioga ia Vui Florence Saulo.

O isi faipule fou e aofia ai Kitara Vaeau lea ua faiaina ai Talaimatai Elisara Su’a mai le itumalo o Saole, Vailiuama Steve Leasiolagi lea ua faiaina ai Maugaoali’i L. S. Anoai mo le Maoputasi #2, Sataua Dr. Mataese lea ua to’alua mai ma Manumaua W. Wilson mo le Itumalo o Ituau, ma ua faiaina ai le afioga Vaiaitu Mulinu’u Filo Maluia, o le afioga Fagaotaua D. Salavea lea ua faiaina ai Puletuimalo D. Koko mo le nofoa o le afioaga i Leone, ma Gafatasi Afalava lea ua faiaina ai Atalina Asifoa mo le nofoa o le itumalo o Leasina.

O le fa’aiuga la lea e le o aloaia mo le tausinioga i le maota o sui a le Fono Faitulafono a le atunu’u.

Itumalo #1 - Manu’a #1: Fetu Fetui Jr 500 ma Vesi Talalelei Fautanu Jr 374

Itumalo #2 - Manu’a #2: Toeaina Faufanu Autele 153

Itumalo #3 - Vaifanua: Lavea Fatulegae’e Palepoi Mauga 408

Itumalo #4 - Saole: Kitara Vaiau 169

Itumalo #5 - Sua #1: Puleleiite Li’a Tufele Jr 161

Itumalo #6 - Sua #2: Matagi David Sialega Mauga 170

Itumalo #7 - Maoputasi #1: Vailoata Eteuati Amituana’i 332

Itumalo #8 - Maoputasi #2: Vailiuama Steve Leasiolagi 224

Itumalo #9 - Maoputasi #3: Ve’evalu Meauta L. Mageo 287

Itumalo #10 - Maoputasi #4: Vaetasi Tuumolimoli S. Moliga 148

Itumalo #11 - Maoputasi #5: Faimealelei A. F. Allen 220

Itumalo #12 - Ituau: Manumaua Wayne Wilson 1,037 ma Sataua Dr. Mataese Samuelu 766

Itumalo #13 - Fofo: Fagaotaua Dorian T. Salave’a 348

Itumalo #14 - Alataua: Savali Talavou Ale 408

Itumalo #15 - Tualauta: Samuelu Ioka Ale Meleisea 978 ma Vui Florence Saulo 760

Itumalo #16 - Tualatai: Timusa Tini Lam Yuen 278

Itumalo #17 - Leasina: Gafatasi Afalava 272

Motu o Swains - Su’a Alexander Eli Jennings.