Fa’agata, Setema 01, lesitala sui tauva palota mo Novema 2022

Pago Psgo - AMERIKA SAMOA

 Le aso muamua o Setema sa fa’agata ai ona talia pepa lesitala mo i latou ua fa’amoemoe e tauva i tofi i le palotaga a Amerika Samoa ia November o le 2022. 

Fa’ailoa e le Ofisa o Palota, e tatau ia i latou e fia tauva i tofi ona vave fa’auluina pepa talosaga e avea ai ma sui tauva, ona e tatau - i lalo o le tulafono - ona siaki uma i latou e sainia pepe lesitala. 

I pei ona taua i tulafono tau palota, o le sui tauva mo le tofi o Amerika Samoa i le Konekeresi a le Iunaite Setete, e tatau ona sainia e tagata palota e 300 le pepa talosaga a le sui tauva. 

Mo tofi faipule o le Maota o Sui o le Fono Faitulafono a Amerika Samoa, e tatau ona sainia e tagata palota e 25 le pepa talosaga a le sui tauva mai le itumalo o lo’o tauva ai i le tofi. 

O lo’o fa’ailoa foi i le tulafono e faapea o le Komesina o Palota na te fa’amaonia ma aloaia le agava’a o sui tauva ma ia lomia pepa palota o lo’o i ai suafa o sui tauva. 

I se fa’aaliga fa’alauaitele ia Aukuso 16, ma ina ia talafeagai ai ma tulafono, ua fa’alauiloa aloaia ai e le Komesina o Palota ia Dr. Lealofi Uiagalelei e fa’apea o le palotaga i Amerika Samoa mo le 2022 e faia lea ia Novema, 08, 2022 mai le itula e 6 i le taeao e o’o atu i le itula e 6 i le afiafi, i fale palota fa’atulagaina i itumalo eseese i Amerika Samoa.

E pei ona i ai i tausaga palota ua fano, o le lisi o fale palota fa’atulaga e le Ofisa o Palota, e fa’alauiloa ae le’i o’o i le aso o le palota. O le tele o fale palota o “hall” a ekalesia po’o faletalimalo a aiga. 

Ua fa’alauiloa foi e Uiagalelei e fa’apea, i le aso o le palota o le a palotaina ai mataupu nei:

• faipule o Amerika Samoa i le Konekeresi a Amerika mo le nofoaiga amata mai ia Ianuari 03, 2023 e oo atu ia Ianuari 03, 2025;

• nofoa uma o faipule o le Fono Faitulafono a Amerika Samoa a le Maota o Sui, mo le nofoaiga amata mai ia Ianuari 03, 2023 e oo atu ia Ianuari 03, 2025;

• suiga o le Fa’avae Toe Teuteuina o Amerika Samoa ia talafeagai ai ma tulafono. 

Mo suiga o le fa’avae, e valu mataupu o lo’o talanoaina ma iloiloina i le Fono Aoao o le Fa’avae, o lo’o faia i le vaiaso lenei i le Fale Laumei i Utulei. Ma e ma’ea ia Setema aso 2. 

O suiga uma e pasia ma fa’amonia i le Fono Aoao, o le a tuuina atu loa i le au palota e palota i ai ia Novema.