Fa’afiafia fitafita Samoa “Polynesian Ball” i Fort Sill, Oklahoma

O le fa’afiafiaga matagofie sa alofaiva i ai le vasega o Fitafita Samoa, i le siva na fa’aautu, “Lo Tatou Tala’aga So’ofa’atasi”. O lea taumafaiga na aofa’i potopoto i ai fitafita Samoa uma, o latou aiga ae maise o nisi o latou uo sa latou vala’auina fa’apitoa i le Siva Tele a le Atu Polenisia sa faia i le nofoaga a le militeri i Fort Sill, Oklahoma.

O le susuga Lilolelagi Leasi Solomona Nuusa, na tuufa’atasia lenei fa’amoemoe, ma na matua maofa ai le to’atele o Taitai o le US Army, o latou aiga, ae maise uo mamae, sa maimoa i fa’afiafiaga fa’a-atumotu o le Passfika na alofaiva i ai fanau a Samoa na mafai ona latou mauaina e fesoasoani i ali’i ma tama’ita’i fitafita Samoa i lea nofoaga.

“Ua le uma le fesili, o le fia asiasi atu i nei atumotu i le Pasefika, aua o le to’atele, e latou te le’i oo atu ae maise, e le’i va’ai i a tatou tu ma aga faasamoa ma isi atumotu o le tatou vasa to’afilemu. Lea la ua latou va’ai, ua le uma le fesilisili ma fa’ailoa mai, e fia o atu e tiute i le tatou vaipanoa o le lalolagi. Ua toe fia va’ai i siva ma nei ituaiga teuga felanulanua’i ua maimoaina e i latou,” ose tala fiafia lea na tusia fa’apitoa mai e Nuusa i le Samoa News.

“O le matou fofoga fa’apitoa mo lea po, o CSM Young, sa tula’i o ia ma fa’afetaia le vasega o fitafita Samoa ma nisi o matou uo ma aiga sa vala’auina e fa’afiafia fa’atasi ma i matou, aua o le taimi muamua lea ua ia va’aia ai ni fa’afiafiaga fa’apenei mai atumotu. Ua le uma le naunau o lenei ta’ita’i ina ia toe faia fo’i e i matou se isi siva tele i le lumana’i,” o se isi lea fa’amatalaga a Nuusa.

“Ia i matou o fanau a Samoa iinei, ua ese fo’i le matou lagona ua oo mai, e ese mai ala o le matou tautua masani i le vaega au, ae o lea ua maua se isi fo’i aoga o le matou autova’a mai ma galulue ai iinei. Tula’i mai e mafai ona fesoasoani fo’i matou nei fa’atinoga o le tatou aga ma tu i nu’u mamao e mafai ai ona fa’aosofia lagona fia asiasi atu i nei tagata i le tatou alunu’u pele e tafafao ma mamoa ai.”

“Ua le gata i lena, ae ua ese le silasila a le mamalu o lenei nofoaga ia i matou, ua sili atu ona amanaia i matou ma ua tula’i mai le lagona, e toe tofia fo’i i matou e toe fa’afiafia i nisi aso fa’ailogaina i totonu lava o le matou nofoaga i Fort Sill, Oklahoma.”

O se mea e maofa ai le ali’i fitafita Samoa, ona e le gata ina leiloa fa’atasi tu ma aga a le Pasefika, ae leiloa fo’i e le to’atele o fitafita ma ta’ita’i le tala’aga o le atumotu, e aofia atu ai ma Maori i Niu Sila. E manatu i latou o Niu Sila o le nu’u papalagi ae leiloa e i latou na muai nofoia Aotearoa e le vasega o tagata folau Polenisia. Matua matagofie  le fa’atinoga o le Hula a Tahiti, Hawaii ma Maori fa’apea le Atu Kuki. O le siva Samoa ma Tonga, sa matagofie.

“O se tala moni lava, ua matua naunau le vasega o ta’ita’i ma o latou aiga, e fia asia i tatou i Saute o le Vasa Pasefika, ona ua matou fa’amata’aia i latou i a matou fa’afiafiaga ma le lalelei fo’i o ali’i ma tama’ita’i talavou ina ua teteu mai i a tatou teuga fa’ale-atuvasa. Ua fa’amama’i o latou lagona, e fia asiasi mo taimi o malologa mai tiute i le militeri, ma o se sao aoga fo’i lea o le matou nopia ai i’inei, ma tautua le malo tele e ala i lana vaega au,” o se tala lea a Nuusa.

“O le tamia nei, ua le toe iloa e se tasi le Haka a le Manu Samoa, ae ua ova atu i luga le fiafia o Fort Sill i le Haka a Fitafita Samoa, ae na i ai nisi o matou uso a fitafita mai isi setete o le malo tele sa matou a’oina fa’apitoa e auai ma i matou i lenei fo’i siva fa’a-Maori,” o se tala ata lea a le ali’i o Nuusa.

O fa’afiafiaga na faia, o pesega ma siva fa’asamoa, fa’a-Hawaii, fa’a-Tonga, Fa’a-Fiti, Fa’a-Rarotonga, Tahiti ma Maori. Na faia lea fa’afiafiaga i le Hilton Garden Inn Lawton i Fort Sill. O latou fa’afiafiaga sa a’oina i aso Toona’i ta’itasi mai le 1:00 se’ia oo 5pm mo le lua masina a’o loma le fa’amoemoe.

Mo lenei lava fa’atinoga o le aganu’u fa’aatumotu ma toniga uma sa fa’atino ai, ua fa’afetaia fa’apitoa ai e fitafita Samoa i Fort Sill tama’ita’i o Loloma ma Britney mo le tapenaga maeaea o lea fa’amoemoe, “Ua matatumua mea uma ona o le alofa le fa’atuaoia o nei tuafafine Samoa.”