Fa'afetaia Peresetene PTA - Kovana Lolo mo le galuega mae’a

Ua matagofie le galuega ua mae’a toe fa’aleleia i le afega atu o le alatele i totonu o le aoga a Marist St Francis i Lepua, ma ua le galo ai i le tina Peresetene o le PTA, Senovefa Seumanu-Pritt o Lauli’i, ona fa’afetaia le afioga le Kovana Sili Lolo Moliga ona ua mafai ona vave fa’ataunuuina lea galuega lelei.

“E tatau le fa’afetai pe a mae’a se galuega e lelei mo le to’atele o alo o le atunuu, ina ia mautinoa lo latou saogalemu i le o atu i le aoga, ma le toe fo’i mai ua tu’ua le a’oga i aso ta’itasi,” o se tala lea a Semanu-Pritt.

“E ui ina tele mea e tutupu i lenei vaitau, ma ua matele ina fia fa’alogo i ai le mamalu lautele o le atunuu, ae le tatau ai ona fa’afetaia i latou na gapatia ma i latou na faatonuina nei galuega lelei ina ia faia ma mae’a lelei. Fa’afetai lea ua le gata mai ia te a’u, ae ua avea ai ‘au e fai ma sui o le PTA atoa, ae maise le Laumua o fanau a’oga uma, le vasega o matua fegasoloa’i i totonu ma toe fo’i ese atu mai lea lotoa, aua ua mae’a ma tatalaina mo le fa’aaogaina, ae tu’ua loa le a’oga a le fanau ona o le Coronavirus.”

“Fa’afetaia fo’i le afioga Moseniolo Viane Etuale ma le pulega mamalu i lea a’oga, ona o le fa’amatu’u mai o le avanoa ou te savalia ai le ofisa mamalu o le Kovana Sili ina ia fa’ato’ai lenei fanoga i le tatou ta’ita’i mo lenei galuega.”

O le galuega ua aofia ai ma le fausia o se Nofoaga Fa’atali Pasi, toe fa’aleleia atili auvai o lea afega o le alatele ia mautinoa ua saogalemu fanau ua tulioso i pasi ma tu’ua fo’i pasi e fia o atu i a’oga, le fanau a’oga savavali, o le ala savali mo fanau savavali, ae maise o ta’avale ia mafai ona o atu isi i totonu o le Luamua ma isi e agai mai i fafo mai le a’oga.

O lona uiga o lea lava ala vaapiapi o lo’o lamatia ai le soifua o le fanau pe a fa’atamala nisi o lo’o fa’aaogaina lea ala i le taimi e tasi i aso ta’itasi.

O le galuega na fa’atonuina e le Kovana ina ia fa’atino e le M&O a le matagaluega o Galuega Lautele ma ua lua nei vaiaso talu ona mae’a, ua faia ai fo’i sina fiafia fa’atasi ona o uiga o le Coronavirus ma le fa’asa ua a’afia ai le atunuu.