Fa’afetai aloaia Jeremiah Masoli i le lagolago a Amerika Samoa

Ao lei toe malaga ese atu le susuga ia Jeremiah Masoli ma lana aumalaga ma le atunu’u i le po anapo, sa ia fa’aalia i se fa’atalatalanoaga ma le Samoa News lona agaga fa’afetai i le lagolago sa mafai ona tu’uina atu e fanau aoga ma faiaoga, fa’apea ai le Matagaluega o Tupulaga Talavou, Tina ma Tama’ita’i, i le lagolagoina lea o le polokalame sa latou fa’atinoina mo aoga maualuluga uma i le atunu’u i le vaiaso atoa na te’a nei, lea na fa’ai’uina i le taeao ananafi i le aoga maualuga i Leone.

O le vaiaso atoa na te’a nei na fa’agasolo ai e le susuga ia Jeremiah Masoli ma lana au malaga fa’apitoa mai Amerika, se polokalame o aoaoga mo fanau aoga mai aoga maualuluga a le malo, e fesoasoani ai i le fa’atauaina o tu ma aganuu a Samoa, o le fa’amalosia o tulaga tau aoaoga mo fanau, aemaise ai o le fesoasoani lea ina ia fa’alautele lo latou silafia i le ta’aloga Football.

“O le agaga atoa o le polokalame e pei ona matou malaga mai ai la’u au malaga, o le ofoina mai lea o le fesoasoani i fanau a Amerika Samoa, ina ia fa’amalosia i latou i le aoga atoa ai ma le fesoasoani e fa’alautele lo latou silafia i le ta’aloga football, le ta’aloga ua to’atele alo ma fanau a Amerika Samoa ua manuia ai i totonu o Amerika”, o se vaega lea o le saunoaga a Masoli, o se tasi o alo o le atunu’u ua lauiloa i le ta’aloga football a Amerika.

“O le agaga fiafia ia te a’u ma la’u aumalaga ina ua matou molimauina le to’atele o fanau aoga fa’apea ai ma faiaoga sa mafai ona tali fiafia mai e lagolagoina la matou polokalame, ma ua oo mai ai le lagona o le naunau lea e toe fo’i mai i le lumana’i e fa’aauau atili pea lenei polokalame mo fanau aoga a le atunu’u”, o le saunoaga lea a Masoli.

Na fa’amanatu e Masoli i fanau aoga le taua o le fausia lelei o le fa’avae o latou olaga, aua o i latou o loo fa’amoemoe i ai le lumana’i o aiga, nu’u, ekalesia, malo ma le atunu’u atoa.

O le polokalame atoa sa fa’agasolo e le susuga a Masoli ma lana aumalaga, sa lagolagoina malosi e le Matagaluega o Tupulaga Talavou, Tina ma Tama’ita’i a le malo, i lalo o le ta’ita’iga a le Fa’atonusili, le susuga a Jonathan Fanene ma lana aufaigaluega.

I se fa’atalatalanoaga ma Fanene i le taeao ananafi, na taua ai e le afioga i le ali’i Fa’atonu lona lagona fiafia ina ua mafai ona ofo atu e lana aufaigaluega la latou fesoasoani e lagolago ai i le polokalame a le susuga ia Masoli ma lana aumalaga, mo le fa’ataunu’uina lea o le latou polokalame sa malaga mai ai.

I le avea ai o le susuga a Fanene o se tasi o tama fanau a le atunu’u ua tele tausaga o taalo i le NFL ma malolo litaea mai ai, sa ia fa’afetaia ai le susuga a Masoli ma lana aumalaga, i lo latou naunau lea e ofo mai lo latou tomai, taimi , atoa ai ma le tamaoaiga e fesoasoani ai i le atina’eina o le lumana’i o tupulaga talavou a le atunu’u.

Saunoa Fanene e fa’apea, o galuega lelei o loo fa’aauau pea ona fa’atinoina e le toatele o alo a Samoa o loo taaalo i Amerika e pei o Troy Polamalu ma Masoli, lea ua toe fo’i mai i le atunu’u ma ofo mai le fesoasoani mo fanau aoga, o se ata vaaia lea o le fiafia o i latou e toe fa’afo’i mai le agaga fa’afetai ia Amerika Samoa ma ona ta’ita’i, e tusa ai o le tapuaia o a latou faiva ao fai ai latou ma sui o le atunu’u i ta’aloga i fafo.

O le po anapo na toe malaga atu ai i Amerika le susuga ia Masoli ma lana aumalaga, ma le fa’amoemoe o le a toe taliu mai i le atunu’u i le tausaga fou mo le toe fa’aauauina o lenei polokalame taua.