Fa’afeiloaia suiga fou a le US Coast Guard i Amerika Samoa

O le taeao ananafi na fa’afeiloaia ai e fa’auluuluga o le Pulega o Uafu ma Malaeva’alele a le atunu’u le susuga a Lt. Tanne Stiehi, o le taitai fou lea mo le Ofisa o le Pupuipuiga o le Gataifale a le malo o Amerika i le teritori (US Coast Guard).

I lona soifua a’e ai i lona aiga i Florida, sa avea ai o ia ma sui o le US Coast Guard reserve mo tausaga e tele, sa fa’aauauina ana aoaoga i le Iunivesite i New Orleans i mataupu e fa’atatau suesuega mo va’a folau i le sami, a o le i toe siitia atu i le aai o Niu Ioka e fa’aauau ai ana aoaoga e aofia ai le a’otauina o ia i tulafono a le US Coast Guard mo le puipuiga o le gataifale.

E 26 tausaga o le tautua a Lt. Stiehi i le US Coast Guard, e aofia ai tausaga e 4 na mavae atu nei na tautua ai i le setete o Hawaii, ma atagia mai ai le leai o se tulaga fesiligia o lana tautua.

“Ou te mana’o ina ia faia ma le amiotonu mea uma e tusa ma le tulafono a le US Coast Guard, ina ia fa’aleleia sootaga uma i le va o kamupani va’a ma tagata folau, fa’apea ai tulaga o le aumaia o oloa ma meatotino e aofia ai uta i le va o malo ina ia mautinoa o lo o saogalemu”, o se vaega lea o le saunoaga a Lt. Stiehi i le aso o le feiloaiga.

Na taua e se tasi o sui o le US Coast Guard ia MST1 Jarrod Bohler e fa’apea, o Lt. Stiehi, o le lona tolu ai lea o latou ta’ita’i ua malaga mai i le atunu’u i lenei vaitau, ma ua iloga fo’i lona tomai i le fa’atinoina o ona tiute fa’atino.

E to’atele sui sa auai i lenei feiloaiga taua, e aofia ai ma le susuga ia Frank V. Thompsen, o se alo o le atunu’u ua silia i le 20 tausaga o lana tautua i le Ofisa o le malo tele i tulaga o Laufanua, faapea ai sui o kamupani va’a i le atunu’u, mo le fa’amaninoina o ni isi o tulafono e fesootai ma galuega i luga o uafu a le malo.

Na fesiligia e le sui o le Polynesia Shipping ia Sala Peter Te’o le sui fou o le US Coast Guard, poo ai tonu e i ai le vaega o lo o i ai le malosi e tu’uina mai ai le fa’atonuga mo le faaaogaina atoa ai ma le tapunia o le uafu, ma fa’alogo uma i ai ofisa uma a le malo o lo o galulue i le faaaogaina o le uafu, ma fa’ailoa ai e sui o le US Coast Guard, o le latou ofisa e faia le fa’aiuga fa’ai’u mo lea tulaga.

Na faamanino fo’i e le sui o le Ofisa Vaaitau a le atunu’u ia Elinor Lutu-McMoore le taua o le malamalama i ripoti e fa’atatau i suiga o le tau e tu’uina mai e le Ofisa, ona o loo feteena’i pea faasalalauga o le tau atoa ai ma faaiuga e faia i taimi e tutupu ai fa’afitauli faapenei.

I le faaiuga o le fonotaga, na faia ai loa se maliliega ina ia fesootai muamua le Ofisa Vaaitau a le atunu’u i Tafuna mo se ripoti o le tau, fa’atoa faafesootai tu’u sa’o atu ai i Hawaii mo ni isi ripoti e tusa ai o fa’alavelave faalenatura ma le tulaga o le tau pe a fa’aletonu mai.

O le Harbor Master e tatau ona sainia le faaiuga faatasi ai ma le Faatonusili o le Pulega o Uafu ma Taulaga, a o lumana’i ai le faia o le fa’aiuga e tapunia aloaia ai le toe fa’aaogaina o le uafu i taimi o fa’alavelave faalenatura e pei ona fesiligia.