Fa’afefeina le faifeau i se aga’ese a’o faia le BINGO a le aulotu

Pago Pago - AMERIKA SAMOA

O le masina o Aperila o lenei tausaga, na valaau atu ai se tasi mai i le afioaga o Amaua, i le ofisa a leoleo i Fagatogo, mo se fesoasoani ona o se alii 31 tausaga, o lo’o faatupu vevesi ma ua aga’i atu i le fale o faifeau ma se agaese.

Na faapea ona agai atu leoleo i Amaua ma ulua’i talatalanoa ma le alii na valaau mai i le ofisa a leoleo.  Ma sa ia faamatalaina le faatupu vevesi o le susuga ia Clinton Tofaeono, a’o faia se gaioiga a le ekalesia ma na tuli’esea e le faifeau ia Tofaeono, ae peitai, na toe fo’i atu ma se agaese.

Sa faamatalaina e le faifeau e faapea, na mafua lenei faalavelave ona o se fe’ese’ea’iga i le va o Tofaeono ma lona atalii, i totonu o le umukuka o le ‘hall’ a le ekalesia.  Ae o le taimi lea o lo’o fai ai le Bingo a le ekalesia.  Ina ua amata ona leotele le taugaupu a Tofaeono ma lona atalii, sa faapea loa ona agai atu iai le faifeau ma otegia i la’ua, ae tago Tofaeono u’u mai se fagu vai sa i luga o le laulau a se tasi o tina matua, ma toe togi i luga o le laulau.

O iina na tuli’ese ai loa e le faifeau ia Tofaeono ae peitai, na ia toe fo’i atu ma se agaese ma fa’alala le agaese i le faifeau ma valaau atu iai, e sau.  Na tago loa le faifeau i le nofoa ae feosofi atu tagata o le au lotu sa i le Bingo ma taofiofi Tofaeono.  Na toe foi Tofaeono i lona fale, ae faatonu loa e le faifeau ia se tasi, e valaau le ofisa a leoleo, ina ia ave’ese Tofaeono mai totonu o le nu’u ae na te le’i faia se tulaga e ono afaina ai.

Ina ua aumai e leoleo ia Tofaeono i lo latou ofisa, sa le i finagalo o ia e faia sana faamatalaga e tusa ai ma le faalavelave na tupu.

Ae ua molia nei o ia i moliaga e lua;

Faitauga 1:  Faatupu vevesi i nofoaga faitele – o se vaega ‘B’ o solitulafono mama, e mafai ona loka ai se tasi i le ono masina, po o se sala tupe e $500; po o faasalaga uma e lua.

Faitauga 2:  Fa’ao’olima i lona tulaga e tolu – o se vaega ‘C’ o solitulafono mama, e mafai ona nofosala ai se tasi i le falepuipui, i aso e sefululima (15), po o se sala tupe e $500; po o faasalaga uma e lua.

E $1,000 na faatulagaina mo le tatalaina o le na molia mai i le falepuipui, e faatali ai lona faamasinoga.