Fa’aauau suesuega a le SSIC i le TALOFAPass

Pago Pago - AMERIKA SAMOA

O le aso Gafua na sei mavae atu nei, na toe amatalia ai iloiloga a le Komiti Suesue a le Senate (SSIC) e faatatau i le $6.4 miliona lea na totogi ai le TALOFAPass lea na mataituina e le kamupani mai Honolulu, o le DataHouse Consulting Inc.  

O le afioga Senatoa Togiola T. A. Tulafono, o ia foi o le taitaifono a le SSIC, sa amataina le iloiloga, lea na suesueina ai le faletua ia Saipai Cassens-A’etonu.  Ma amataina le suesuega i le ‘warehouse’ lea sa lisiina e le kamupani mai le alii faipisinisi o Peter Young, ma sa ta’ua e Cassens-A’etonu, na sainia lea lisi ia Me 2022.

Sa faamanino e Cassens-A’etonu, na filifilia le ‘warehouse’ a Peter Young, ina ua mae’a ona sailiili solo se ofisa e mafai ona faamautu iai lenei kamupani, i Tafuna.  Na filifilia le ‘warehouse’ a Young ona o le tele o le ‘warehouse’, toe fou ia ma sa sili atu nai lo isi fale na o latou tilotilo iai.

Ma e tatalaina lo latou ofisa fou, e toalima ni tagata faigaluega ua mae’a ona filifilia ma ona sa iai se faamoemoega e toe faaopoopo ni isi tagata faigaluega, o lea sa fa’aauau pea ona o latou sailiili nisi ofisa e mafai ona fa’aaogaina.

Na fesiligia e Togiola ia Cassens-A’etonu, pe na faapefea ona fai a latou fesootaiga ma Young mo le fa’aaogaina o lana ‘warehouse, na tali le faletua, sa talanoa atu Young ia te ia, e uiga i lana ‘warehouse’ ma sa ia asia le ‘warehouse’ a Young ma ia pu’eina ni ata ma faao’o atu i le ofisa autu i Hawaii.

Na toe saunoa Cassens-A’etonu, na iai seisi fale na o latou tilotilo iai, ae peitai, sa le i avanoa lea fale i lena taimi. 

Na toe fesili ia Togiola, ae e le i talanoa Cassens-A’etonu ia Peter Young e uiga i lona fale, pe sa iai se taimi na talanoa ai Cassens-A’etonu I le to’alua o Peter Young, ia Sandra King-Young.  Sa tali Cassens-A’etonu, e le i auai Sandra i talanoaga e uiga i le sailiga o se fale.  

Sa toe fesili Togiola pe na iai se taimi na talanoa atu ai Sandra Young ia te ia, e uiga i le fale a lona toalua.

Na tali Cassens-A’etonu, e leai.

Ina ua toe fesili ia Togiola pe sa iai se taimi na talanoa ai Cassens-A’etonu ma Sandra King-Young e uiga i le fale a Peter Young, ae e le i sainia le lisi.  Na tali Cassens-A’etonu, na fa’ato’a la talanoa ai lava ma Sandra ina ua mae’a ona saini le lisi, ae sa fa’aalia le le fiafia o Sandra i lea tulaga.

Ina ua fesili Togiola pe aisea na le fiafia ai Sandra, sa tali Cassens-A’etonu, e le i ta’uina atu e Sandra le mafuaaga.

Sa faamanino e Cassens-A’etonu, ina ua fesiligia o ia e le afioga Senatoa Aliitai Lili’o e uiga i lona tofiga i totonu o le kamupani, o ia o lo o gafa ma le mataituina o gaioiga uma a le kamupani i totonu o Amerika Samoa.  Ma e toalima sana aufaigaluega, ae na iai se faamoemoe a le kamupani e si’itia lena fuainumera, i le 35, e aofia ai ma ni fanau aoga mai le kolisi po o so’o se tasi e fia faigaluega i le latou kamupani.

Sa ta’ua e Cassens-A’etonu, o a latou tagata faigaluega, o lo o a’oa’oina i Hawaii ma Amerika ma e toalua ni tagata faigaluega a le malo o lo o galulue i le ofisa a le Kovana, o lo o feagai nei ma ia aoaoga, ma le faamoemoe a mae’a le latou konakarate, o le a tu’uina atu loa lenei galuega e faatinoina e le malo.

Na talosagaina e le afioga Togiola ia seisi ripoti mai ia Cassens-A’etonu, e tusa ai ma faamaumauga po o ripoti na talosagaina e le SSIC, i suafa uma o i latou o lo o galulue nei i totonu o le malo, ua mae’a ona faataunuuina aoaoga ma ua nofo saunia pe a mae’a le konakarate a lenei kamupani, ae tu’uina atu le galuega e faatino e le malo.

O le taeao ananafi na toe fa’aauauina ai iloiloga a le SSIC e faatau i le va’a o le Kiterunner, ina ua mae’a tauaofiaga masani.

TALA’AGA

Ia Oketopa 2022 sa ripotia ai e le Samoa News, se iloiloga a le SSIC na auai ai le faletua ia Tofoitaufa Sandra King-Young, ma na ia molimau ai i le tu’uaia o ia i le faia o ni tulaga faasolitulafono ma taupulepule, ona o le polokalama lenei o le TALOFAPass, ma e leai se a’afiaga o le pisinisi a lona toalua ma le TALOFAPass.

O le molimau a Tofoitaufa na tali atu ai fesili e uiga i le fale a lona toalua lea sa faamautu ai le kamupani a le DataHouse, lea manumalo i tauofoga mo le TALOFAPass, ma pe iai se faafitauli i lea tulaga ona o ia lea e faauluulu iai le ofisa a le malo lea e gafa ma le galuega e fa’aaoga ai le TALOFAPass.

Sa te’ena e Tofoitaufa i lea iloiloga a le SSIC, tu’uaiga uma ua faasaga ia te ia.  Ma sa ia molimau foi, i le leai o se sootaga o le lisiina o le fale a lona to’alua i le DataHouse ma le TALOFAPass.

Sa saunoa Tofoitaufa, e na o le pau le tulaga na a’afia ai lona toalua, o le ofoina atu o lona fale e lisi e se kamupani mai i atunuu i fafo, e pei ona naunau le malo e faatosina mai kamupani mai fafo i totonu o Amerika Samoa.

Na faamatala e Tofoitaufa i luma o le SSIC, e lua ni kamupani sa mananao e lisi le fale a lona toalua, o le NPI ma le DataHouse.  Ma e leai se vaega na a’afia ai o ia i le faaiuga a lona toalua, i le filifiliga o le kamupani e lisi iai lana ‘warehouse’.