Fa’aauau pea le sailiga o Suatipatipa Su’a

Pago Pago - AMERIKA SAMOA

O le aso ananafi sa fa’asalalau ai i luga o a’upega tafa’ilagi se talosaga mai i le tina o le susuga ia Suatipatipa Iosefa Su’a, lea na to’esea mai i lona aiga talu mai le aso Lulu, Tesema 13, 2023, mo nisi e fia fesoasoani i le sailiga o Suatipatipa, i gatai o Vaitogi faapea ma ona laufanua.

E faapea se ripoti, na ripotia mai e sikulaki i Vaitogi, i le 6 i le afiafi o le aso Lulu o le vaiaso ua mavae, le tu o le ta’avale a le aiga o Su’a lea sa fealua’i ai Suatipatipa, talu mai le 2 i le aoauli o lea lava aso.  Ae ona o tulaga faaletonu o le tau i lea po, sa le mafai ai e leoleo ona faia se su’esu’ega i gatai o Vaitogi, ona o le popole i le saogalemu.

O le taeao na soso’o ai, i le aso Tofi, Tesema 14, 2023, na maua ai e se tasi o le aiga a Suatipatipa, ia nisi o ana meatotino, e aofia ai se’evae, o le ki o le taavale ma lana sikaleti (vape), i autafa o se tofe.

Sa fa’ailoa atu e sui malu o le malo i le aiga o Suatipatipa, e tatau ona fa’atali mo le 24 itula, ona mafai lea ona amataina se su’esu’ega.  Ae peitai, ina ua maua meatotino a Suatipatipa, sa faapea loa ona logoina le Vaega Sailiili ma Lavea’i, mo le amataina o a latou su’esu’ega i le taeao o le aso Tofi.

Sa faapea foi ona fa’asalalauina i luga o a’upega tafailagi ia ni talosaga mo se fesoasoani i le sailiga o lenei alii.

Na taofia su’esu’ega o le aso muamua, i le 4 i le afiafi ma na fa’ailoa atu e le alii kapeteni o le vaega Sailiili ma Lavea’i, le susuga ia Ina Ulberg, i le aiga o Suatipatipa, le mauaina e vaega maulu, ia se ofuvae pu’upu’u lanu enaena o lo o pipi’i ai se fusipa’u.

Na ta’ua e Kapeteni Ulberg, sa ia fa’afeso’ota’iina foi sana uo o lo o pailateina se va’alele i le va o Samoa ma le teritori, ina ia va’ava’ai ifo i ni mea o opeopea i le sami, ae peitai, e le i faamanuiaina lea taumafaiga.

Na fa’amaonia e le tina o Suatipatipa, o lavalava ia na maua mai i totonu o le sami, o lavalava ia a lona alo.

Sa ta’ua e kapeteni Ulberg, ona sa tuai ona amataina su’esu’ega, sa faafaigata ona o le tatafe o le sami.  Sa ia ta’ua foi, e ova loa ma le lima itula ia le sailiga o se tagata i le sami, e fa’afaigata lava ona toe maua nisi o mea totino a lea tagata.

Ae peitai, sa fa’amalosi’au atu pea le alii kapeteni i le tina o Sutipatipa ma lona aiga, e faapea, o le a fa’aauau pea ona faia a latou su’esu’ega.

O le aso Faraile, Tesema 15, 2023, na amata ai su’esu’ega i le gataifale i le 10:30 i le taeao ae na faamae’aina i le 3 i le afiafi. 

Ae na ripotia mai le fa’aauau pea ona iai aiga ma uo a lenei alii i Vaitogi, e tapuaia le su’esu’ega a sui malu o le malo ae o se fa’amalosi’au foi i aiga ma e pele.

O le aso Toonai, Tesema 16, 2023 na toe amataina ai su’esu’ega i le 8 i le taeao ae fa’amae’aina i le 5:30 le afiafi.

O lo o fa’aauau pea ona lototetele le aiga ma uo a Suatipatipa, a’o fa’atalitali pea mo se tala mai i su’esu’ega a le Vaega Sailiili ma Lavea’i.