Fa’aauau ona pasia e le Maota o le Senate ia Faatonu fou

Pago Pago - AMERIKA SAMOA

O le vaiaso ua mavae, sa pasia ai e le Senate ia sui filifilia a le Afioga i le kovana, e avea ma Faatonusili fou o le Ofisa a le OPAD (Protection and Advocacy for the Disabled, Ofisa o le Soifua Maloloina faapea le Ofisa o Faatoaga.

DR. SAIPALE FUIMAONO

O le aso Lulu o le vaiaso ua mavae, na pasia ai e afioga i Senatoa ia le susuga i le alii fomai ia Dr. Saipale Fuimaono, e avea ma Faatonusili o le Ofisa o le Soifua Maloloina, i se palota e 16 ioe, ae leai se na fa’atu’i’ese.

I le iloiloga a le Komiti a le Falemai ma le Soifua Maloloina, i le taeao o lea aso, lea na fa’afoeina e le sui Taitaifono o le Komiti, le Afioga i le Senatoa ia Gaoteote Palaie Tofau (ina ua le auai le Afioga i le Taitaifono, Senatoa Misaalefua J. Hudson), e leai ni fesili na fesiligia ai le sui filifilia.

E pei ona sa saunoa le Peresetene o le Senate, le Afioga i le Senatoa ia Tuaolo Manaia Fruean, o le susuga ia Dr. Fuimaono o se tama fanau a le afioaga o Pago Pago, ae e le o se popo na tafea mai i le galu ma ola i luga o laufanua.

Sa ia fa’aleoina le agaga fa’afetai i le afioga i le kovana mo le filifiliga o se alo o Pago pago e na te ta’ita’ia le Ofisa o le Soifua Maloloina ma o lea saunoaga sa fa’aluaina e le Afioga i le Senatoa ia Muagututi’a M.T. Tauoa.  Sa saunoa Tuaolo, ua o’o i le taimi e avea ai alo ma fanau o Amerika Samoa ma taitai mo le fauina o le malo.

Ma na ia u’una’ia Afioga i Senatoa ina ia pasia le tofiga a le susuga ia Dr. Fuimaono.

Sa faapea foi ona lagolagoina e Muagututi’a le mau na fa’atu e Tuaolo ma ia toe faaleoina le manatu lava e tasi, e uiga i le ta’ita’ia e alo ma fanau o Amerika Samoa ia le malo.

Na ia saunoa foi i le faataunu’uina e le Ofisa o le Soifua Maloloina, o la latou misiona ina ia tulaga maualuga ia la latou auaunaga aua le tausiga o le soifua maloloina o le atunu’u, e ala lea i a latou falemai tua, i Leone, Amouli ma Manu’a.

Sa faapea ona tu’uina atu e le Afioga Muagututi’a se faamanuiaga mo Dr. Fuimaono i lona tofiga fou, ma ia fa’atuina ai loa se mau ina ia tu’umuli atu le molimau.  Faapea ai ma le palotaina o Dr. Fuimaono e ala i le si’i o ‘a’ao, ae le o se palota fa’alilolilo.

Ae e le’i fa’aluaina e le Afioga i le Senatoa ia Magalei Logovi’I ia le mau sa fa’atula’i e Muagututi’a, na ia fa’ailoa atu ia Dr. Fuimaono le faigaluega o se tasi o ona alo i le Ofisa o le Soifua Maloloina, ma se vaegatupe e $400,000 e mafai ona fa’atauina ai taavale falemai ma se taavale tinei mu.

Na saunoa Magalei i le aoga o lenei tulaga mo le Afioga Muagututi’a, ona o lo o manaomia tele nei auaunaga i le Falelima i Sasa’e.  Atoa ai ma le fa’alagolago o tagata i lea itu o le motu, i taavale afi ma taavale falemai mai i le ogatotonu o le motu, ae e pe a ma le itula i le itula ma le afa, e faimalaga atu ai nei taavale mai i Faga’alu.

O le susuga i le alii foma’i e na te umia se fa’ailoga o le ‘Bachelor’ fa’afoma’i ma le foma’i tipitipi, mai i le Aoga Fa’afoma’i i Fiti, faapea ma le ‘Master of Arts’ i le aoaoina o le Biology, faapea ma le ‘Bachelor’ o mataupu faa Saienisi mai le Iunivesite o Notre Dame i Kalefonia.

Na amata galuega Dr. Fuimaono i le Ofisa o le Soifua Maloloina, i le tausaga e 2006, i tofiga ‘ese’ese.  Ae o le taimi nei o lo’o avea o ia ma Faatonusili o le ‘Community Health Centers’, o se tofiga sa ia umia talu mai le tausaga e 2012.

I lana toe saunoaga i luma o le Senate, na fa’aleoina ai e Dr. Fuimaono le agaga faafetai i Afioga i Sentoa mo la latou fa’atuatuaga ua tu’uina atu e na te ta’ita’ia ai le Ofisa o le Soifua Maloloina.  

Na ta’ua e le alii foma’i lona sau saunia i lena taeao e tali fesili a afioga i Senatoa, ae peitai, ua fa’agae’etia o ia ona o le lagolago ma faamanuiaga sa ia mauaina i lea taeao.

Peitai, i le iloiloga a le maota o Sui i le aso na soso’o ai, sa faapea ona tele ni fesili na fesiligia ai le Faatonu fou, ae na i’u lava ina pasia lona tofiga, i se palota e 11 ioe, ae 6 leai.

DORA J. AH SUE:

O le aso Faraile foi o le vaiaso ua mavae, sa fa’ataunu’uina ai le iloiloga o Dora Ah Sue, le sui filifilia mo le tofi Faatonu i le Ofisa o Puipuiga ma le Lagolagoina o tagata e iai mana’oga faapitoa i le tino (OPAD), i luma o le Komiti o Atina’e o Tamaoaiga a le Senate, i lalo o le ta’ita’iga a le Afioga i le Senatoa ia Gaoteote Palaie Tofau.

Sa le’i nanaina le agaga fiafia o le Afioga i le Senatoa ia Muagututi’a M.T. Tauoa, i lona fa’alauiloa mai le itumalo e malaga mai ai le sui Faatonu ma o se tasi e na te ta’ua o sona afafine.

Na ia fa’aalia foi le agaga fa’afetai i le afioga i le kovana ma le lutena kovana, mo le filifilia o Ah Sue, e avea ma se sui o le la kapeneta, ua aloaia ai lo latou aiga faapea le itumalo.

Sa faapea ona faamanuia atu le Afioga ia Muagututi’a i le sui Faatonu ma ia fautuaina o ia ina ia faamaoni, usiusita’i ma alofa i le faia o ana fa’ai’uga.  E le gata i lea, sa ia fautuaina foi Ah Sue, ina ia aua ne’i ona faia se tulaga e na te lagona e le sa’o, e tusa lava po o ai e fa’atonuina o ia.

Ina ua saunoa le Afioga i le Senatoa ia Magalei Logovii, sa ia fa’aalia ai le ava fatafata ma le tama matua ia Muagututi’a, ma ia fa’atula’i ai se mau ina ia tu’umuli atu le molimau, ae pasiaina loa lona tofiga.

O lea mau sa faapea ona fa’aluaina e le Afioga i le Senatoa ia Togiola T.A. Tulafono, lea foin a saunoa i le le tau fa’alauiloa mai o Ah Sue, ona ua loa lana tautua i totonu o le malo.

Sa lagolagoina foi e le Afioga i le Senatoa ia Utu S. Poasa le fautuaga a Magalei ma Togiola ma na ia fa’asoa mai foi le leva ona galue o le tina a le sui Faatonu i lana kamupani.

E na’o le tasi le fesili na fesiligia ai Ah Sue i lea taeao, e mai i le Afioga i le Senatoa ia Levu Sa Iosia jr., lea na fia malamalama po o fa’amalosia e le aufaigaluega a le OPAD ia avanoa o pakaga taavale mo i latou o lo’o iai mana’oga faapitoa faaletino. 

Na saunoa Ah Sue, o lo’o lagolagosua ia le Ofisa a leoleo i lana aufaigaluega, i le faamalosia o lea tulaga.

I le saunoaga a le Peresetene o le Senate, le Afioga ia Tuaolo Manaia Fruean, sa ia ta’ua ai le ta’ua ai le loa o le tautua a le tua’a a le sui Faatonu, i totonu o le malo.  Sa le gata ina sa avea o ia ma Faatonusili o le Ofisa a Tagata Faigaluega o le Malo, ae faapea foi le avea ma Faipule i totonu o le Maota o Sui.

Ma sa ia saunoa foi i le vaitaimi na tautua ai Ah Sue i totonu o le Maota Fono ma le Ofisa a le Senatoa ia Daniel Inouye, ae le’i maliu o ia.

O lo’o umia e Ah Sue ia fa’ailoga o le ‘Bachelor of Arts’ i mataupu faapolokiki (Political Science) mai i le Iunivesite o Hawaii, Hilo faapea se ‘Masters’ i Aoaoga mai le Iunivesite o Hawaii, i Manoa.

Sa avea o ia ma Faatonusili o Polokalama a le OPAD mai ia Ianuari 2012 se’ia o’o mai ia Ianuari 2024, ma sa avea foi o ia ma sui tauva i le Tofi Faipule mo le Itumalo o Sua #5, i le palota na se’i mavae atu.

Na pasiaina e le Maota o le Senate ia le tofiga a Ah Sue, i le latou palota 16-0.

DANIEL E. HELSHAM:

O le iloiloga mulimuli a le Maota o le Senate, o le iloiloga o le susuga ia Daniel Helsham, i le tofi o le Faatonu mo le Ofisa o Faatoaga, ma sa faapea foi ona ‘aufaatasi Afioga i Senatoa, i le pasiaina o ia.

I le saunoaga a le Afioga Tuaolo Manaia Fruean, le Peresetene o le Senate, na ia ta’ua ai e faapea, o le ulua’i taimi lenei ua ia feiloai atu ai i le sui Faatonu ma ia fesiligia ai Helsham, pe sa galue i le Ofisa o Faatoaga.

Na tali mai Helsham, sa galue o ia i le vaega a le Land Grant i le ASCC.

Sa saunoa Tuaolo i le talavou o le sui Faatonu, i le na’o le 37 tausaga o lona soifua, ae matagofie lona tala’aga fa’aleaoaoga.  O lo’o umia e Helsham ia fa’ailoga o le ‘Bachelors’ i ‘Mass Communications’ mai i le Iunivesite a Chaminade i Hawaii, ma se ‘Master’s’ i Feso’ota’iga tau Fa’atoaga, mai i le Iunivesite a le Matata Ese’ese i Texas.

Sa avea o ia ma sui fa’asalalau a le Land Grant i le Kolisi a le ASCC mai i le tausaga e 2013 se’ia o’o ina filifilia o ia i le tofiga o le Faatonusili.

Na fa’aleoina e le Afioga i le Peresetene o le Senate lona fiafia tele e molimauina ia le i’u manuia mai o alo ma fanau a Amerika Samoa, na malaga atu i fafo mo aoaoga.

Sa fesiligia e Tuaolo ia Helsham po o iai sana fuafuaga e fa’ataunu’u le fuafuaga a le Faatonu o le Ofisa o Faatoaga ua malolo, mo le aumaia o manu papalagi mai i Samoa.  Na tali mai le sui Faatonu, ua iai se faamoemoega e agai i luma ma le fa’aeteete i lea fuafuaga, ia faamautuina uma faamaumauga, e puipuia ai le mamalu lautele ma le siosiomaga.

I le saunoaga a le Afioga i le Senatoa ia Olo Uluao Letuli, na ia fa’alauiloa mai ai, o Helsham o se tasi lea o lupe faalele a le itumalo a Fofo ma e ui i lona talavou ae peitai, e le taua tausaga pe afai ua valaauina se tasi e le Atua.