Faaauau le poloaiga a le Kovana i le Code Red

Pago Pago - AMERIKA SAMOA

Talu ai le faaopoopo pea i luga o le aofa’i o le atunu’u ua faamaonia le aafia i le faama’i o le KOVITI-19, e pei ona i ai le aofa’i e to’a 135 talu mai le aso Lulu o le vaiaso nei, ua tu’uina mai ai le poloaiga a le afioga i le ali’i Kovana ia Lemanu Peleti Palepoi Sialega Mauga ina ia faaauau pea le Tapunia o nisi o vaega o le malo seia aulia le aso Faraile, aso 1 o Aperila.

I se poloaiga fou mai lana afioga i le ali’i Kovana i le aso Lulu o le vaiaso nei, sa ia taua ai le tumau pea ona i ai o Amerika Samoa i le Lanu Mumu (Code Red) talu mai le aso 22 o Fepuari na te’a nei, seia oo i le masina fou.

O loo tumau pea poloaiga e pei ona tuuina mai mo ituaiga galuega e faataga ona tatala i le taimi nei, faapea ai ma auanaga e le mana’omia ona tatala talu ai puipuiga o le KOVITI-19.

I lalo o le Lanu Mumu e pei ona i ai Amerika Samoa i le taimi nei, e na o auaunaga lava e taua ma moomia e mafai ona tatala ma faatino e pei o le Matagaluega o le Puipuiga o le Saogalemu Lautele; Vaega o le Soifua Maloloina; Vaega o le Eletise ma le Suavai; Faleoloa ma Fale’aiga o loo tufatufaina atu Taumafa; o Fale e Tata ma Faamama ai Lavalava; Vaega o Fesootaiga; Vaega Faasalalau; o Galuega Faufale faapitoa; o le Vaega e faia totogi o le aufaigaluega, ma isi lava ituaiga auaunaga e foliga tutusa faapea e aofia ai le Falema’i ma le EMS.

O auaunaga ma galuega e le mana’omia o loo fautuaina malosi le tatau pea lea ona tapunia mo le taimi e pei ona taua e le malo. O ia auaunaga e aofia ai Fale Siisii; Fale Teuteu Lauao ma Faleoti Ulu; Fale Fufulu Taavale; Fale Taavale; Lotu; Mafutaga to’atele; Taaloga Bingo; ma isi lava ituaiga auala saili tupe i tafatafa o le alatele.

O isi vaega o le poloaiga faalauaitele a le Kovana i le aso Lulu o le vaiaso nei, e aofia ai le taofia lea o malaga ma auaunaga i le ea ma le sami, sei vagana ai le vaalele e aumai ai le Meli o lo o mafai ona aumaia meli i le atunuu ma ni malaga faapitoa a le Militeli.

O lo o tumau fo’i le Vavao e pei ona faatula’i mai e le afioga i le ali’i Kovana mai le itula e 9:00 i le afiafi mo tagata seia oo atu i le vaveao i le itula e 4:30. A o faagasolo ai le Vavao, e le tatau ona tuua e se isi lona maota poo le laoa se’i vagana o se manaoga pito sili ona taua e tatau ai ona malaga ese atu mai lona aiga.

Mo Faleoloa uma lava ma Fale’aiga e aofia ai Fale Faigaluega o lo o faatinoina auaunaga faapitoa, o le itula e 4:00 i le afiafi e tapunia ai lea auaunaga mo le atunu’u.

O lo o fautuaina fo’i le atunu’u ina ia fa’aaoga Tali Fofoga (face mask) ma ia tausisi i le nonofo valavala mo le 6 futu, ina ia mafai ai ona puipuia le atunu’u mai le pipisi o le faama’i.

I le aso Lulu na te’a nei, e 135 le aofa’i o i latou ua faamaonia le aafia i le KOVITI-19, talu mai le aofa’i o tagata e to’a 435 sa faia a latou suega i nofoaga eseese e aofia ai Falema’i Tua i Amouli, Tafuna ma Leone, ma maua ai le aofa’i e to’a 41 o i latou na faamaonia le aafia i le faama’i.

O i latou e to’a 41 lea na maua ma faamaonia le aafia, o lo o faanofo esea nei i latou i totonu o latou Maota ma Laoa i lalo o faatonuga faapitoa mai le Vaega Faapitoa o le Matagaluega o le Soifua Maloloina e tatau ona latou usitaia mo le umi e 14 aso.

O le faamalosia o le i ai o i latou nei i totonu o Maota ma Laoa o lo o gafa lea ma le Vaega o Leoleo ma le Ofisa o Mataupu Tau Samoa, ae lagolago i ai ma le Soifua Maloloina.

O le taimi nei, ua to’a 80.4% le aofa’i o i latou ua mae’a ona faia tui o le KOVITI-19.

O lo o faaauauina pea Tui mo le KOVITI-19 i le Fale Taalo a le Aoga Maualuga i Samoana; o le Ofisa a Tupulaga Talavou i Tafuna ma le Maota o le Ekalesia Katoliko i Leone i aso Tofi o vaiaso ta’itasi mai le itula e 8:00 i le taeao e oo atu i le itula e 2:00 i le aoauli.

Mo i latou uma e fia faia suega o le KOVITI-19, o lo o faaauau pea lea auaunaga i le aso Gafua, aso Lulu ma le aso Faraile mai le itula e 8:00 i le taeao e oo atu i le itula e 2:00 i le aoauli.

O le a faataunuuina fo’i le Suega mo le KOVITI-19 e faaaoga ai Taavale i le nofoaga masani o le Malaevaalele i Tafuna i le aso Toona’i nei, Mati 5 mai le itula e 8:00 i le taeao seia oo atu i le itula e 2:00 i le aoauli.

O nisi o fautuaga ma lapataiga mai le Vaega o le Soifua Maloloina mo le silafia e le mamalu o le atunu’u, e aofia ai le tausia lelei lea o lou soifua maloloina ma ia e alofa lava ia te oe. Ia faamaoni i le faaaogaina o le Tali Fofoga (mask) ma ia faaauau pea le nonofo valavala mo le va e 6 futu i soo se nofoaga e aofia ai totonu o le aiga.

Ia lava lau malologa ma ia taumafa i mea’ai paleni e aoga mo lou soifua maloloina. Ia maua se taimi e faamalositino ai, ma ia faaitiitia le faaaogaina o le ‘ava malosi poo isi ituaiga fualaau oona, e ono vave ona aafia ai lou soifua maloloina.

Ia toaga e tatalo ma ia fiafia e saasaa i nisi o taimi, ma ia maua le avanoa e faafofoga ai i Vaega Faasalalau mo le tuuina atu o ripoti i le tulaga ua i ai fuafuaga a le malo mo le Faama’i atoa ai ma puipuga talafeagai e moomia e soo se tasi.

O le lisi lenei o afioaga ua faamaonia le maua ai o le faama’i o le KOVITI-19, e pei ona tuuina mai e le Vaega o le Soifua Maloloina, i le mae’a ai lea o suega sa faia e alii ma tamaitai foma’i.

E to’a 2 ua aafia i le afioaga i Atu’u; to’atasi Aua; to’a 2 Faga’alu; to’a 6 Fagasa; to’atasi Failolo; to’a 2 Faleniu; to’a 8 Iliili; to’a 1 Leloaloa; to’a 25 Leone; to’a 1 Malaeloa; to’a 1 Matu’u; to’a 30 Nu’uuli; to’a 4 Pago Pago; to’a 14 Pavaiai; to’a 1 Puapua; to’a 25 Tafuna; to’a 4 Utulei; to’a 2 Vaitogi ma le to’a 5 mai Vatia.

FALE LAUAIGA O MALIU

O se tasi lenei o mataupu sa fesiligia ai e nisi o aiga o le atunu’u Taitai o le malo faapea le Komiti o le KOVITI-19, mo se fuafuaga e faataga ai aiga ona faataunuu sauniga o maliu mo e pele ua motusia le mafutaga.

Na taua e se tasi o aiga i le Samoa News e faapea, ua tele le fia faatino o le faamoemoe o le latou Tama ae faigata o lo o tapunia ofisa ma Matagaluega a le malo latou te faamatuuina mai pepa faamaonia e faataga ai ona ave i tua le latou maliu.

Mo se faataitaiga o le Ofisa o Faamaumauga ma Ripoti a le Matagaluega o Leoleo lea o lo o tatala i le taimi nei, o le Ofisa o le Loia Sili mo le tuuina mai o lana saini e faataga ai le tino maliu ona ave i tua, atoa ai ma le saini a le Foma’i o le Falema’i o le LBJ e faamaonia ai le tagata ua maliu.

Na taua e se sui o le aiga e faapea, e oo mai lava i le taimi nei o lo o latou faatali pea i se tali mai le malo e tusa ai o lea manaoga, e ui ua mae’a ona tuuina atu i ai sa latou talosaga. 

Ae na taua e sui o le Komiti Faafoe a le KOVITI-19 i se latou faalauiloa i le vaiaso nei e faapea, ua a’e se finagalo o le Kovana ma le Komiti Faafoe e faataga aiga ona faatino a latou maliu i lalo o tuutuuga faapitoa e tatau ona usitaia.

E na o le to’a 10 lava le aofa’i o i latou e mafai ona auai i le Fale Lauasiga; e aveese sa’o atu lava le Pusa maliu mai le Fale Maliu ave sa’o loa i le Tuugamau mo toe sauniga, ae to’a 10 fo’i tagata e faataga ona i ai. Ia tausisia i le faaaogaina o le Tali Fofoga ma ia nonofo valavala mo le va e 6 futu.