Fa’aauau Faiga Pa’aga i le Soifua Maloloina va o Samoa e lua

O le “Fa’aauauina o Faiga Pa’aga i le Soifua Maloloina” i le va o Samoa ma Amerika Samoa, o le autu lea o se fonotaga e 3 aso ua fa’amoemoe e tatalaina i le taeao nei i le maota o le Fale Laumei i Utulei, mo le fa’amoemoe e fa’aauau ai feutanaiga ma talanoaga i le va o Samoa e lua, i auala e foia ai fa’afitauli o lo o a’afia ai le soifua maloloina o tagata, aemaise ai fo’i o le sailia o auala e fesoasoani ai i le si’itia maualuga o le tulaga i le soifua maloloina o tagata.

O le aso 11 ma le 12 Novema 2015, na usuia ai le Fonotaga lenei i le Faletalimalo o le Tanoa Tusitala i Samoa, ma ua manatu ai loa sui o le Vaega o le Soifua Maloloina a malo e lua ina ia fa’aauau pea nei talanoaga i le vaiaso nei, ina ia mafai ai ona si’itia pea i luga le tulaga maualuga o le puipuiina o le soifua maloloina o tagatanu’u.

O le tausaga e 2010 na amata mai ai talanoaga i le va o Samoa e lua, ona o le fa’anaunauga o ta’ita’i o atunu’u aemaise ai matagaluega taitasi ina ia saili ni auala e fesoasoani ai le isi malo i le isi malo, i le soifua maloloina o tagata fa’apea ai tulaga i atina’e, pisinisi ma le ola manuia o tagata lautele.

I se pepa o fa’amatalaga o lo o saini ai Fa’atonusili o Vaega o le Soifua Maloloina a Samoa ma Amerika Samoa, o lo o fa’amanino mai ai le tulaga taua o le fonotaga ua fa’amoemoe e usuia i le taeao nei.

O le afioga ia Motusa Tuileama Nua, o ia lea o le Faatonusili o le Soifua Maloloina a Amerika Samoa, ae o Leausa Toleafoa Dr. Take Naseri, o ia lea o le Fa’atonusili o le Matagaluega o le Soifua Maloloina a le malo o Samoa.

I le mae’a ai o le fonotaga sa faia i le tausaga na te’a nei i Samoa, na malilie ai itu e lua ina ia taumafai e saili lu’itau e foia ai fa’afitauli o lo o a’afia ai le soifua maloloina o atunu’u ta’itasi, ia fa’aleleia fuafuaga fa’ataoto i tulaga tau soifua maloloina i totonu o Samoa e 2 mo le isi 50 tausaga o lo o lumana’i, ma ia fa’amausali auala e atina’e ai talanoaga mo le fa’amalosia o le soifua maloloina i tagata Samoa.

“O fonotaga o lo o fa’aauauina i le va o Samoa e lua i mataupu tau soifua maloloina, ua atagia mai ai le taua o auala ua mafai ona maua e fa’amalosia ai faiga fa’a pa’aga i le va o tagata ma sui o Vaega o le Soifua Maloloina a le malo fa’apea ai Fa’alapotopotoga Tumaoti, ina ia fa’aauau ai pea ona galulue e saili auala e mafai ai ona si’itia le soifua maloloina i Samoa”, o se vaega lea o le pepa o fa’amatalaga sa tu’uina mai e le Komiti Fa’afoe o le Soifua Maloloina a atunu’u e lua.

O fonotaga ua mae’a ona fa’atinoina e uiga i le soifua maloloina, ua mafai ai ona maua le taua o le faia o fesootaiga a Samoa, Amerika Samoa ma Faalapotopotoga Tutotonu o le Soifua Maloloina a le Lalolagi, i auala e mafai ai ona puipuia tagata mai tulaga o fa’ama’i le pipisi ua to’atele tagatanu’u ua a’afia ai.

O le taua o le lava o mea faigaluega e fa’atino ai galuega mo le puipuia o le soifua maloloina o tagata, aemaise ai o le maua o le avanoa fetufaa’i ai atunu’u e lua i fa’amatalaga ma metotia, o se tulaga sili lea ona lelei mo le si’itia pea i luga o le soifua maloloina o tagatanu’u.

“O fonotaga ua mae’a ona fa’atinoina ua mafai ai ona matou mauaina auala eseese e mafua ai ona a’afia tagatanu’u i fa’ama’i eseese e pei o fa’amali le pipisi, fa’ama’i e tutupu i suiga o le tau, aemaise ai o auala e mafai ona fa’atinoina e foia ai le fa’aauau o le pipisi pea o nei gasegase”, o se vaega lea o le pepa o fa’amatalaga.

O ni isi la o gaioiga o lo o galulue ai pea atunu’u e lua e fa’atinoina ina ia mafai ai ona fa’atumauina tulaga maulauga i le soifua o tagatanu’u, ia sailiili i auala e fa’aleleia ai togafitiga ma puipuia ai tagata mai le a’afia i fa’ama’i eseese, ia mautinoa e fa’ataoto alafua ma ta’iala e fa’atinoina ai togafitiga mo i latou ua a’afia, fetufaa’i fa’amatalaga ma metotia mo togafitiga, ma fa’aauau pea suesuega i taumafa ua masani ai Samoa atoa ai ma auala o lo o fa’aaogaina e le to’atele e fai ma vailaau e togafitia ai gasegase, ina ia mautinoa e tupu tele le silafia o tagata i ia fa’amatalaga.

O le itula e 8:00 i le taeao nei lea ua fa’amoemoe e tatala aloaia ai lenei fonotaga, i se sauniga lotu o le a ta’ita’ia e le susuga Rev. Elder Ioane Evagelia, o le Faifeau o le Ekalesia EFKAS mai Utulei, sosoo ai loa lea ma le saunoaga mai le afioga i le Faatonusili o le Matagaluega o le Soifua Maloloina a Amerika Samoa, tofa Motusa T. Nua, ae fa’ai’u i le saunoaga fa’apitoa o le aso, lea o le a saunoa ia i le afioga i le ali’i kovana ia Lolo Matalasi Moliga.

O le itula e 9:30 ua fa’amoemoe e amata aloaia ai loa le fonotaga, ma maua ai loa avanoa o Matua o Faiva e folasia ai a latou saunoaga fa’apitoa i mataupu eseese ua vaevaeina i ai lenei polokalame.

O le fa’aiuga o le fonotaga i le aso Faraile o le vaiaso nei, o le a mafai ai loa ona tauaofa’i fa’amatalaga eseese uma na mafai ona fetufaa’i ma fa’asoa e ui usufono faapea ai Matua o Faiva, mo le tu’u fa’atasia o se ripoti e taualuga ai lenei fonotaga taua.