Fa’aaliga galuega fa’asaeanisi Aoga Maualuluga i Amerika Samoa

I lenei tausaga ua matauina le fiafia o fanau a'oga i aoga maualuluga i le teritori e fa'ailoa mai a latou suesuega eseese na fa'atino mo le fa'aaliga o galuega fa'atino fa'asaeanisi lea o lo’o faia i le Army Reserve Center i Tafuna.

I suesuega a le fanau na matauina ai galuega fa'atino:

• "Pe Mata e fa'aleagaina Me'ai ua ma'ea Kukaina e Ave o le La". O lea suesuega sa faia e le tma'ita'i o Andrea Amor de Cruzman, Vasega 9 mai le Fa'asao Marist High. O le tali mai ana suesuega sa faia, ioe e matua fa'aleagaina vave lava pe afai e toe sulugia i ave o le la se mea'ai ua mae'a kukaina.

• O le galuega suesue i alofilima o tagata e aiga, sa taumafai ai le ali'i o Tupolesala Leasiolagi mai Tafuna High School, Level 11, e sailia pe tali tutusa tulaga lima o tagata pe afai e aiga pe uso fo'i. O lana suesuega, sa fa'atautaia, ae ua manino ia te ia, pau lava lea o se mea e le mafai ona tutusa i so'o se tasi ua fanau mai, ae i ai ituaiga o tulaga lima e tali tutusa mamanu. O lana suesuega, na iloa ai, e talitutusa mamanu o tulagalima o le auuso teine pe afai e tutusa fo'i o la'ua matua, e fa'apena fo'i i mamanu o tulaga lima o tama pe afai e auuso lelei lava. Peita'i e eseese uma lava tulaga lima, e o'o lava i le masaga e talsi lo la'ua aso soifua, toe foliga tutusa, e eseese lava tulaga lima i o latou alofilima.

• O se tasi o ali'i e iloga e fiafia tele i tomai tau Inisinia o Masini sa ia tapena lana folasaga tau Eletise e mafai ona maua mai i le Malosi o Galu, ae fa'aaogaina ai le Wells Turbine, ona e le o taimi uma e galu ai le sami. A o'o i le taimi o le tau pe, e matua le migoi lava galu o le sami, se'i vagana le tai a'e ona fa'ato'a le mo'omia lea o le Turbine lea. O le ali'i lea o Hosea Schroeder e a'oga i Leone High, Vasega 11. Ua iloga mai, e naunau o ia e suia le faaaogaina pea o le suau'u e fa'auia mai ai se sapalai o le eletise a le tatou Malo, ma ua ia tapena ai lana ela folasaga fa'asaeanisi.

• O le tama'ita'i o Raquel Mamea o le tausaga fa'au'u lenei mai le Manumalo Academy sa ia saunia se folasaga e fa'ailoa ai, afai e eseese ituaiga mata'itusi e fa'aaogaina i le taina o tala po'o ulutala i nusipepa, e eseese fo'i le tele o le vaitusi e fa'aaluina ai. O lana poloketi fa'atino fa'asaeanisi na ia fa'aulutalaina, “Extra Extra, Read ALL ABOUT IT”.

• Mai le Pacific Horizons High School na tapena ai e le susuga Wen Hoo Heu, vasega 12, lana galuega, o le gaosia lea o le masini e foliga o se ta'avale, ae mafai ona seu ese mai i so'o se mea e tali feto'ai ai ona ua mae'a i ai lona mafaufau, e fa'atonua le masini ina ia alo ese o le a ia so'aina se mea i lona ala. O lona uiga, o le ituaiga o mea nei e fa'aaoga i va'alele ma ta'avale e mafai ona fa'atonutonu lava e i latou le alu e le tau i ai se ave ta'avale.

• Tama'ita'i o Yasminna Sanchez mai Samoana High Level 11, sa ia fa'aalia lana suesuega, "E i ai se feso'ota'iga i le Sami Mama & I'a Mama?" O se suesuega e lima masina o faatautaia ana fagotaga, e o'o i le a'oa'oina o ia ina ia iloa ona fagota sa fa'atino uma lava, ina ia taumafai Yasminna e fa'atino lava e ia lana galuega fa'atino fa'asaeanisi. E fa ogasami sa ia fagota mai ai i'a - Pago Harbor, Fagasa, Faga'alu, ma Auma & Afao.  Ua fa'ailoa mai, o i'a na maua mai Pago Pago, ua i ai anufe i o latou totoga, ae o ia uma lava na maua mai Fagasa, Afao ma Auma e matua leai se fa'aletonu. Peita'i o i'a fo'i mai Faga'alu e matauina e a'afia o latou totoga e fai si uliuli tele.

• Poloketi a le tama'ita'i o Courtney Masunu mai le a'oga ua level 9 nei o ia i le Samoana High e fa'aaogaina le palasitika e fausia ai ala laupapa i le atunu'u. O le tapenaga o le palasitika lea e fa'aaogaina mo le fausaga o ala laupapa, ua fa'ailoa mai e le tama'ita'i, e ao ina fa'anini'iina atoatoa lava ma ua tali tutusa lava ma le pefu lea e fa'aaogaina e palu ai le sima. E tatau fo'i ona matua saeu fa'atasi lea, ma avane loa le vaivevela e palu ai, sasa'a loa i nofoaga ua fa'atulaga e utu i le sima lea ua fa'atasi ma le palasitika. E mago ane, ua malo fa'asoloatoa ai ma le palasitika i le sima ua mae'a fausia lelei ai ala laupapa ma ala savali.

• "O le a le Ituaiga Suavai e fa'aopeopea, Malulu po'o le Le Vevela?' O le isi lea suesuega na fa'ailoa ni tali i le fa'aaliga a le tama'ita'i o Celestrial  Teutoli mai le Aoga Maualuga Nuuuli VocTech High ma ua ia fa'ailoa mai, "O le Vai vevela e fa'aopeope pe afai e te ligia i le suavai auili e le'i fa'apunaina. O le Suavai vevela ua mae'a ave'esea ai le ea sa filogia ai, ae afai fo'i e te tu'ua atu le 'aisa poloka i totonu o le suavai auli ua e taumafai e fa'amalulu, e te va'aia lava e opeopea foi, o lona uiga, le suavai vevela ma le suavai ua ova le malulu ua liu aIsa e tau fai opeopea uma lava.”

• Tama'ita'i o Luciana Tofaeono, vasega 10 i le Pacific Horizons, o lana poloketi, "Pe Aisea e So'ona Atugalu ai le Tupulaga Talavou?". O lana tali i lana suesuega, ua tele na'ua meaa'oga, ma ua lutia fa'atasi ma isi mea e fa'atino e talavou i totonu o latou aiga, ma mea e fai i le ekalesia, ua le lava ai se taimi e malolo ai mafaufau o le fanau a'oga talavou. Ae o'o atu loa ma a'afiaga tau le fia fai uo, ova ai loa iina le talanoa umi i le telefoni, ae le maua atili ai se taimi efa'amae'a ai galuega fa'atino o le a'oga ma isi fe'au uma ua ta'ua i luga.

• O le ali'i o Minjea Kweon, Level 12 i le South Pacific Academy sa fa'atinoa le gaosiga lea o Kuki e fa'aaogaina ai le Falaoamata mai le Ulu. O ana kuki na saunia na matua alumia. Fai mai a ia, "E matua manaia mamao atu lava Kuki e gaosia i le falaoamata o le Ulu, nai lo isi ituaiga o falaoamata ua leva ona fa'aaoga mai ma gaosia mai le araisa."

• Poloketi a LJ Apisala mai Fagaitua High Level 10 ua ia fa'ailoa ai, e mafai ona fa'aitiitia le ga'o e tausami e so'o se tasi pe afai e te inumia fo'i ma Fuala'au fa'apitoa ua maua ma fa'alauiloa e aoga i lea foi taumafaiga.

O nisi na o galuega na fa'aalia, ae anoanoa'i isi galuega uma sa fa'atinoa e le fanau. Na i ai fo'i se sueuega sa fa'aalia ai, o lo'o i ai ma le LEAD i le tele o le suavai o lo'o fa'auia atu i o tatou maota ma laoa mai le sapalai o le suavai a le ASPA.