Fa’aaliga fa’ato’aga, fefa’atauaiga oloa, soifua maloloina

O le malae o Suigaula, ua fa’atautaia ai fa’aaliga e tolu mo le mamalu lautele o le atunu’u latou te fa’aaogaina a latou tautua eseese.

I le itu o fua o fa’aeleeleaga o le fa’aputuga talo, ua na’o le $10 le maualuga, ae mafai ona maua talo i le ta’i $5.

Ua i ai fo’i la’au toto teuteufale ua fa’atauina, e i ai ituaiga Oketi felanulanua’i ua fa’atau mai e le tina o Donna Gurr mai Maloata, ma lona fale Fugala’au lea e i Faga’alu, o le Island Flowers.

E le gata i lena itu ae ua maua fo’i le pai fala suamalie ma le lelei gaosia e le tina o Rose Gurr mai Tafeta. Ua fa’aluaina fo’i lana auaunaga ua fa’aalia i ana la’au toto e felanulanua’i manu o latou lau, e aoga tele i le toto ai o pa la’au i autafa o lou maota ma tuamaota fo’i.

O nisi e to’atele o le au faifa’ato’aga, ua ia i esi pula, fai pula, maukeni ma isalaelu, tipolo ma le tele o Pi mo le fofoga taumafa lava o le atunu’u.

“O lenei avanoa ua maua e fa’atau atu ai matou fua o fa’aeleeleaga, ae maise ia maua fo’i se avanoa e fetaui atu ai nisi o faifaatoaga i le isi itu o le motu, ua sili lava lea, nai lo lota nofonofo ma fa’atau atu au oloa i lo’u tulimanu i Nuuuli,” o le tala ata lea a Ula Fesola’i mai Futiga.

Na vaaia le matagofie fo’i o Ufi mai le fa’ato’aga ale tama mai Vaitogi, sa na’o le ta’i $10 i le fa’aputuga ufi. Ua ia fa’ailoa mai, ua toeititi atoa le 10 tausaga talu ona toto, ma o lea fa’ato’a manatu e eli mai aua le fa’aaliga a faifa’ato’aga i lenei tausaga.

“O lenei tausaga ua tagi atu le malo, ia sapaia lo latou fa’amoemoe, e leai se mea e fai e le tagatanu’u faifa’ato’aga na’o le sapai lava o le fa’amoemoe, ia fa’ailoa atu lou loto i lou malo,” o se manatu lea o lenei ali’i faifa’ato’aga.

“E le tu se malo, pe afai e le tasi le loto, tasi le fa’amoemoe ma ia tatou tiga faatasi, peita’i, ua na’o nai mafaufauga lava o tama Farmer, ae le fai a’i,” o se tala ata lea a le faifa’ato’aga mai Vaitogi.

I le itu o fefa’ataua’iga, sa iloga ona pisi le Island Business Center, lea e matua fa’atautau uma atu ie o ‘auva’a ta’itasi o lo’o tauva i le filigamaea i le tai i lenei tausaga. E le gata i ie ae o lo’o ua i ai fo’i ma latou pulou i ‘auva’a uma fo’i, fa’apea ma mitiafu felanulanu ai.

O le itu a le Tool Shop ua fa’ailoa mai, ua ave’ese uma ta’i 10% i tau o oloa o lo’o fa’aalia i Utulei, o lona uiga, e eseese uma tau o lo’o fa’atau atu ai i latou faleoloa e lua, Tafuna ma Fagatogo. Ua iloga ua aumaia lava oloa e masani ona fa’aaoga i fa’ato’aga ma le tausia lelei o laufanua o aiga. Ona o lenei e lualuagia ma le Fa’aaliga o Fua o Fa’aeleeleaga a le atunu’u, lea fo’i ua fa’aoso mai ai lava masini fagavao, sapelu ma ili afi ae maise o tolopa ma isi ituaiga oloa uma e fa’aaoga e le aufaifa’ato’aga i le fa’ato’aina o le laufanua.

Ua tele fo’i isi faleoloa mo teuga eseese ua fa’aalia ai latou oloa, ae maise o faleoloa mo lavalava o so’o se ituaiga. Ua matauina fo’i ua toesea mai tau i nei oloa, ona o le faaaliga mo fefa’ataua’iga.

Sa i ai fo’i le vaega gaosi oloa taulima a le TAOA, ma fa’atau mai a latou Ie Elei ma ie Tie Dye, o Pulou ma Ula felanulanua’i. Ua matua iloga fo’i ona fa’atau ai a latou fa’atagata ma tanna ‘ava, ma isi oloa e mafai ona avea ma ni meaalofa mai le tatou atunu’u.

I le pitola’au a le Matagaluega o le Soifua Maloloina, sa latou fa’aaoga lea avanoa e talatalanoa ai ma tagata lautele e tusa o le ma’i danesa, o ona auga, ae maise o ala e iloa ai ua amata ona maua sou itutino i le kanesa.

Ua latou fa’ailoa fo’i le leaga o le ulaula tapa’a, atoa ai ma gasegase fita e mafua mai ai. O le taumafaiga fo’i ina ia tima’i tagata i lenei vaitaimi e fa’asaoina mai ai se ola. Ua fa’ailoa mai le polokalama o le Tausiga lelei o Fanau a’o pepe i latou se’ia o’o ina atoa le 7 tausaga le matutua. O lea polokalama o lo’o fa’amalosia lava ma ua fa’ailoa fo’i meaa’i paleni e ao ina tausia lelei ai lou tino.

Ua i ai fo’i le situ ua fa’ailoa maia le tele o ala e tausia lelei ai le soifua maloloina o tagata uma i lou aiga, ma ia le maua se tasi i ma’i fatu.O le tatou malo lea ua matua iloga ona to’atele le fanau talavou ua matauina ua a’afia o latou fato, ma ua taumafai ona avatu i latou i fafo mo togafitiga.

O lea fo’i le Malae o lo ua avea ma nofoaga fa’apitoa e fa’atautaia ai fa’afiafiaga uma mo le Sisigafu’a 2017 ma ua faatautaia e amata mai i le itula e 6:00 i le affiati. O afiafi e lua ua mavae, sa tai 9 ai autalavou ua fa’afiafia ai, peita’i o le afiafi a nanei ua na’o le to’a fitu.