Fa’aalia fiafia o le atunu’u i le fa’amanatuina o le 117 tausaga o le fu’a

Na fa’aalia lagona fiafia o le atunu’u i le fa’amanatuina o le atoaga o le 117 tausaga talu ona sisi le fu’a a Amerika i laufanua o Amerika Samoa, e ala i latou lolofi atu e molimauina sauniga sa fa’agasolo i le malae taalo i Tafuna i le taeao ananafi, lea fo’i sa molimauina e ta’ita’i o le atunu’u fa’apea ai malo valaaulia.

O le itula e 6:30 na amata fa’atulaga ai solo o savali a autalavou, aoga fa’apea ai fa’alapotopotoga kamupani eseese na maua le avanoa e fai ai so latou sao i le fa’amanatuina o le fu’a o lenei tausaga, lea na ta’ita’ia e le savali fa’aaloalo a malu o le malo, i lalo o le ta’ita’iga a le afioga i le Komesina o Leoleo, tofa Le’i Sonny Thompson, fa’apea ai fo’i ma le Vaega o le Ami Fa’aleoleo.

E pei ona masani ai i sauniga fa’apitoa fa’apea a le malo, o le mae’a ai ona taunu’u i le malae o le Ao Mamalu o le malo Tuto’atasi o Samoa, afioga Tui Atua Tupua Tamasese Efi, fa’apea ai le kovana o Amerika Samoa ia Lolo Matalasi Moliga, o le taimi fo’i lea e amata aloaia ai le polokalame, e ala i le taina o vi’i a atunu’u e lua, sosoo ai loa ma le asia e le kovana o le tula’i fa’aaloalo a malu o le malo.

Sa auai fo’i i le au valaaulia le masiofo a le Ao Mamalu o le malo o Samoa ia Filifilia Tamasese Efi, o le afioga i le ali’i Palemia, susuga Tuilaepa Lupesoliai Sa’ilele Malielegaoi, fa’apea ai le susuga a Nikolao Pula, o le sui o le Ofisa o le Initeria, fa’apea ai ta’ita’i o le tafatolu o le faigamalo a Amerika Samoa, o ta’ita’i fa’aleaganu’u, atoa ai ma le mamalu lautele o le atunu’u i matua ma fanau na mafai ona fa’atumulia ai itu e fa o le malae i Tafuna.

Na fa’amamafa e le susuga Faifeau Tiakono ia Malaki Aukusitino Timu le taua o le fa’amuamua ona a’oa’o o tupulaga talavou, ina ia atagia mai ai tulaga manuia o le atunu’u i le lumana’i.

Saunoa atili le susuga a le Tiakono e fa’apea, soo se malo lava ma se atunu’u, e fa’alagolago lona tulaga manuia i le lelei lea o le a’oa’oina o ona tupulaga.

O le mae’a ai o le sauniga e tatala aloaia ai le sauniga o le fu’a o lenei tausaga, na sosoo ai loa ma le faitauina o le poloaiga fa’alaua’itele a le kovana, atoa ai ma le sisiina o tagavai a Amerika fa’apea ai ma Amerika Samoa.

O le afioga i le alii kovana ia Lolo Matalasi na saunoa i le ulua’i saunoaga o le polokalame, ae taualuga ai i le malelega fa’apitoa o le aso, lea na saunoa i ai le Ao Mamalu o le Malo Tuto’atasi o Samoa.

Saunoa le ali’i kovana e fa’apea, ua mafua ona a’e se manatu e fa’ataua tupulaga talavou i le fa’amanatuina o le fu’a o lenei tausaga, ina ia momoli atu ai i le atunu’u le agaga atoa o le malo o loo i ai, o le ave lea o le fa’amuamua mo ana tupulaga, aua o i latou ia o le lumana’i o le atunu’u i le lumana’i.

“E ui ina matagi taumuaina la tatou folauga le atunu’u i le tele o taimi, ae le mafai ai ona taofia le agaga maualuga o le malo, o le fa’ataua lea o ana tupulaga talavou, o le lumana’i lea o le atunu’u ma aiga uma”, o se vaega lea o le saunoaga a le ali’i kovana.

Sa ia toe fa’amanatu i le aofia atoa ai tupulaga talavou le taua o le galuega sa taumafai mai e matua ua lagomau mai i Tia Sa, lea sa latou asaina mai le gasu o le galuega, ona o le naunau ina ia i’u manuia fanau a le atunu’u.

“O lea ua tatou tofo i fa’amanuiaga sa asaina mai e tatou tuaa, o le mafua’aga fo’i lena ua manatu ai le malo ina ia toe momoli atu se matua palapala mo tupulaga, ina ia latou lagonaina ai le taua o lo outou sao i le atina’eina o le malo”, o le saunoaga lea a le ali’i kovana.

O se tasi o ata fa’ata’ita’i o le fa’alagolago o le malo i ana tama fanau, o le mataupu lea sa finauina i luma o le fa’amasinoga feterale i le masina ua tuana’i atu, lea na fai ai le loia sili o le malo ma ni isi o lona ofisa ma sui o Amerika Samoa e finauina lea mataupu, lea ua i’u manuia ai le fa’aiuga sa tu’uina mai, ma fa’amanino ai le taua o le Feagaiga sa osia e tuaa ua mavae ma ta’ita’i o le malo tele, o le sootaga moni lea o Amerika Samoa ma le malo tele o Amerika.

Na taua e Lolo suafa o alo o le atunu’u sa gafa ma lea galuega e pei o le loia sili ia Talauega Eleasalo Ale, ma alii loia e to’alua ia Aitofele Sunia ma Alema Leota.

“Tupulaga e o Amerika Samoa, o le lu’itau moni lena o loo naunau i ai ta’ita’i o le malo, ia avea outou ma tupulaga e tua i ai le malo i le lumana’i, ina ia avea ai outou ma ta’ita’i mo le atunu’u ma ona tagata”, o le isi lea saunoaga a le ali’i kovana

O le te’a laititi o le itula e 9:00 na mae’a aloaia ai loa le sauniga ma fa’agasolo ai loa le solo o savali fa’aaloalo mai vaega taitasi sa auai i le sauniga, e aofia ai savali mai autalavou, aoga, fa’alapotopotoga, atoa ai ma le savali pito umi mai le kamupani apa a le StarKist Samoa, lea e silia i le 2,000 le aofa’i o le savali e pei ona fa’alauiloa i le taimi o le polokalame.

O le mae’a ai o savali na alo atu ai loa i le amataina o fa’afiafiaga i siva ma pese fa’aleaganu’u, lea na tatala e le autalavou a le Ekalesia EFKAS i Amerika Samoa, lea e pei ona saunia e le Pulega a Ituau, sosoo ai le fa’afiafiaga a le Ekalesia Katoliko, sosoo ai le Ekalesia Metotisi, ae taualuga e le au valaaulia mai le afioaga i Sapunaoa i Samoa.

O le mae’a ai o sauniga o le fu’a na alo atu ai loa le Komiti mo le tufatufaina o fa’ailoga mo polokalame sa fa’agasolo i le vaiaso o le fu’a, e pei o fa’ailoga o ta’aloga kirikiti i le va o ali’i ma tama’ita’i, ae o fa’ailoga mo le tuuga fautasi ua fa’amoemoe fa’atoa maua siaki i se taimi o le aso, i le Ofisa o Mataupu Tau Samoa, e pei ona fa’aalia e le tofa Malemo Tausaga, o ia lea o le fofoga o le polokalame, ae o le sui failautusi fo’i o le Ofisa o Mataupu Tau Samoa.