Fa’a aupegaina Vaega Fa’apitoa Leoleo mo le sailia fualaau fa’asaina

O le Vaega Fa’apitoa o Leoleo lea ua tofia e gafa ma le sailia o fualaau fa’asaina, atoa ai ma le tali atu i ni fa’alavelave mata’utia e tutupu i le atunu’u, o le a fa’a aupegaina i latou i soo se taimi e fa’atinoina ai la latou galuega.

“O le vaega faapitoa lenei a Leoleo ua mae’a ona a’oa’oina i soo se auala e sailia ai fulaaau fa’asaina, o le a matou galulue fa’atasi i soo se taimi e ala i le fesoasoani a ta’ifau e 4 a le Ofisa o Leoleo o lo o i ai (K-9), o le a fa’a a’upegaina i latou nei i soo se taimi e fa’atino ai a latou galuega, ona o le fa’anaunautaiga lava ina ia saogalemu le atunu’u atoa”, o se saunoaga lea a le Komesina o Leoleo i se fa’atalatalanoaga ma le Samoa News i le vaiaso na te’a nei.

O le aso Faraile na te’a nei na sainia ai e le afioga i le ali’i Komesina o Leoleo ia Le’i S. Thompson sana poloaiga, e Fa’avae ai mo le taimi muamua i le tala fa’asolopito o le Matagaluega le Vaega e tali atu i fa’alavelave mata’utia e tutupu i totonu o le atunu’u (Tactical Response Team), aemaise ai o le toe Fa’avaeina o le Tautua a le Vaega e Suesueina Fualaau Fa’asaina i totonu o le Matagaluega (Vice & Narcotics Unit).

E to’a 8 ali’i Leoleo ua filifilia i totonu o lenei vaega fa’apitoa a Leoleo, lea ua tofia ai le ali’i Leoleo ia Captain Lima Togia na te ta’ita’iina. O lo o aofia ai i Leoleo e to’a 8 ali’i Leoleo fou e to’a 3 na fa’atoa fa’auu mai i le Vasega lona 25 a Leoleo i le tausaga nei.

O le Vaega Fa’apitoa a Leoleo e pei ona filifilia nei, o le a galulue i soo se vaega o le atunu’u o loo ulufale mai ai va’a, tagata malaga, uta ma soo se vaega i totonu o le atunu’u, mo le siakiina lea o fualaau fa’asaina e fa’aulufale fa’anana mai i le atunu’u, atoa ai ma nofoaga eseese o lo o masalomia le gaosi ma fa’atauina atu ai fualaau fa’asaina i totonu o le atunu’u e aofia ai ma luga o le alatele.

O le aso, Aokuso 14, 2017 e pei ona taua e le afioga i le Komesina o Leoleo, o le a amata aloaia ai loa le tautua a lenei Vaega Fa’apitoa, o le latou galuega muamua o le a fa’atinoina, o le siakiina lea o le taimi e taunu’u mai ai le malaga a le va’alele a le Hawaiian Airline i le po nanei, ma fa’aauau atu ai lava le tautua i totonu o le 24 itula o le aso mo aso e 7 o le vaiaso.

O le Vaega lenei e Suesueina Fualaau Fa’asaina, sa i lalo o le fa’amalumaluga a le Ofisa o Leoleo Su’esu’e (CID) i nofoaiga a ni isi o Komesina ua mavae, peita’i o le suiga e pei ona taua i le poloaiga a le Komesina, ua tu’uina atu ai le Vaega Fa’apitoa lenei i lalo o le vaavaaiga a le Ofisa a le Komesina o Leoleo.

“I le mae’a ai ona matou iloiloina ma le toto’a o le tulaga o lo o i ai le fa’afitauli o fualaau fa’asaina i totonu o le atunu’u, ua filifilia ai loa Leoleo e to’a 8 ua maualuga lo latou agava’a, atoa ai ma le lelei ona a’oa’oina i soo se auala e sailia ai fulaaau fa’asaina, e tautua i lenei vaega taua a le Matagaluega”, o se vaega lea o le poloaiga a le ali’i Komesina.

O galuega e pei ona galulue ai i latou nei i le Vaega o Leoleo Su’esu’e o le a fa’aleaogaina, ae o le a taula’i la latou tautua i le fa’atinoina o matafaioi fou e pei ona filifilia ai i latou.

O i latou nei e aofia ai Captain Togia; Lt. Tolia Solaita, o ia lea o le a fesoasoani ta’ita’i; Det. Ioane Paselio; Det. John Seumanutafa; PSO Justin Thomsen; PSO Satia Leulu; PSO Alwin ma Tala Mortenson o le sui mai le vaega a le K-9 Unit a le Ofisa o Leoleo.

O le mataupu i le fa’aaupegaina o Leoleo, o se tasi lea o mataupu na taua e le Komesina e le faigofie i le atunu’u, ma ua fa’atele fo’i taimi e fesiligia ai o ia e le Fono pe ua sauni Leoleo e tali atu i soo se fa’alavelave e ono a’afia ai le atunu’u aemaise lava i fualaau fa’asaina

“Ina ua fesiligia a’u e le Fono pe ua sauni Leoleo mo le fa’atinoina o lenei galuega, sa ou tali atu i ai e leai, ona o lo’u taofi sa i ai, e le faigofie le mataupu e fa’atatau i le fa’a aupegaina o Leoleo, ae mo le silafia e le atunu’u, e le fa’asaina e le tulafono le fa’a aupegaina o Leoleo, ua leva ona i ai le tulafono e fa’aaoga ai e Leoleo aupega mo le fa’atinoina o a latou tiute pe afai ua mana’omia”, o le saunoaga lea a Le’i.

Ae talu ai le fa’atupulaia o le fa’afitauli i fualaau fa’asaina, atoa ai ma le talitonuga o ta’ita’i o le atunu’u, soo se nofoaga e maua i ai fualaau fa’asaina e tatau fo’i ona i ai ma a’upega malolosi, ua manatu ai loa le Matagaluega ua tatau ona faia se auala e foia ai lenei fa’afitauli ma ia mautinoa ai le saogalemu o le atunu’u.

O le molimauina e le atunuu le tautua a le Vaega Faapitoa lenei i soo se vaega e pei o le malae va’alele, i le vaega o loo i ai pasese, mo le siakiina lea o uta e misi mai i le Ofisa o Tiute, o luga o le alatele, nofoaga eseese o loo masalomia le i ai o fualaau fa’asaina, faapea ai luga o le uafu i va’a e ulufale mai.

“O outou uma o lo o faia tulaga o fualaau fa’asaina, feoa’i onana i luga o le auala ma isi lava ituaiga amioga e le taupulea, o le a matou o atu e saili outou, o le a fa’aaoga ta’ifau, a’upega ma le tomai o Leoleo e saili mai ai oe ina ia fa’amasinoina ma fa’asalaina e tusa ma le tulafono”, o le lapataiga lea a le Komesina o Leoleo mo le atunu’u.