"E suamalie a niu a'ati" a na saunoaga tu'usa'o! - Faife'au Toeaina: Siaosi Mageo

O le mua'i sauniga o le tu'ua o le Malo e le Auauna Toeaina a le Atua, Siaosi Mageo sa iloga ona molimauina ai lona soifua galue, o ana saunoaga tu'usa'o e suamalie pu'upu'u ae o'ona ma a'ati i le fa'alogo, na toe fa'amanatu uma e le vasega o Failauga sa pa'au mai, aua o le a misia i le fa'alogo lana taulogologo ma le tima'i malosi, ia faia le mea sa'o ma le amiotonu.

O lea sauniga na ta'ita'ia e le Ta'ita'i Matagaluega AOG i Amerika Samoa Rev. Aifa Tanuvasa, ma sa mua'i tutula'i lava ma fa'afeiloa'ia le mamalu ua sasao i le malu, ina ua mae'a ona molimoli mai le Sa o le Faife'au Toeaina Siaosi Mageo i le Hall Tele i Ottoville Bible College.

O le na ta'ita'ia maia le solo e fa'ao'o mai ai lona Sa o Rev. Suli Failagi, o se tasi o Faife'au AOG i Amerika Samoa, ae o fa'afeagaiga uma fo'i o le Matagaluega sa latou fa'aitualalua ae momoli mai o ia mo lona sauniga amata.

"O ou pa'ia Samoa e afua mai Malaetele le malae na tauilo ai malo se'ia o'o i Analega o le a taoto, aua o lea ua tauo'oo'o le tai, ua tatau fo'i ona to'a i le Atua lo tatou aso, o lona vi'iga e le fa'aitiitia, aua na tatou o mai e vi'ia le Atua, ona o ana meaalofa ma ana fa'amanuiaga ua tele mo i tatou. Lea ua tatou fa'atasi, ua to'ai taunu'u mai uma ta'ita'i ma Fa'afeagaiga mai tatou malo tuaoi ma nu'u e mamao, fa'afetai i lona a'ao tausi ma lona a'ao ta'ita'i, ua tatou aofaga nei i le futiafu lava e tasi.”

O lana fa'afeiloa'iga sa ia mua'i fa'afeiloa'ia sui mamalu o Faife'au mai Ausetalia, Niu Sila, Samoa ma le tatou lotoifale i sui mamalu o le Malo, le Tina o le Atunu'u Cynthia Malala Moliga, le afioga le Failautusi o le Samoa Affairs Mauga Tasiaeafe Asuega, nisi o sui Faipule sa auai atu ma le tofa le Matua Togiola ma le Faletua Maryann, ae maise le to'atele o pa'aga fa'apisinisi sa auai, o nisi o auaunaga sa taua ia Rev. Siaosi Mageo, ona fa'aaogaina e ave ai le fe'au a le Atua i tagata lautele.

O se tautalaga amata lea, Rev Aifa Tanuvasa, na amata ai loa le sauniga i le vi'iga o le Atua "How Great Thou Art" na usuina e le Laulu Sisters, o se tasi o ulua'i aiga na maua i tala'iga amata a Rev. Siaosi Mageo i Amerika Samoa nei.

O le molimau a le atali'i, Poe Mageo, sa ia fa'ailoa ai, "E leai se molimau, aua o se tama e manatu ina ia faia ni molimau i maliu, aua o i tatou uma lava o Tusi Faitau a Keriso! O lau tautala, o au mea uma lava e fai, o lau molimau lena i aso ta'itasi."

"Peita'i o lo'u tama i lana tusi e matua matamata tetele mata'itusi o lana tusi. E pu'upu'u ana tautalaga, e tu'usa'o ma e ma'ama'ai fo'i. E te le iloa pe ete fiafia i ai, pe ete ita ai fo'i, aua o nisi mea, ua e ata ai, a'o nisi tala ua tiga ai le to'atele, ma ua foliga mai e leai ma sona taumafai e teuteu ni fa'aupuga, aua o lana tala, lauga sa'o mai le upu a le Atua aua e te fa'afiafia i tagata."

"O ia o se tusi faitau matala pea, e le tapunia sona laupepa e tasi, ma afai ou te saili i ai, ou te taumafai e fa'amalosi mai ia te a'u i se mea faigata e o'o mai, ma e avea o se puna'oa i lou ola taumafai ai e auauna i le Atua, ma ou malamalama a'ia'i ai i ona ala."

E tolu tama'ita'i i lona soifuaga, Malaea le tina sa la mafuta ma maua ai lana fanau, o le tina sa fesoasoani i lana a'oga o se Faife'au ma fefa'asoa'i i le Upu a le Atua i lo la'ua tofi o le Auauna a le Atua ma le faletua. Lona lua o Tama'ita'i o le tama'ita'i o lo'o i le ata tifaga o le "I love Lucy" o Hollywood. E fiafia tele o ia i lea ata tifaga e matua mautu lava lana ata lea e matamata ai i le tele o taimi. E o'o lava fo'i i lona toe aso, sa maimoaina lava lana ata lea, a'o le malaga i le falema'i.

Lona tolu o tama'ita'i o le tama'ita'i o "Lady Esther" o lona va'a fagota." A tu'u i nei tama'ita'i uma, e sili ona tele tupe e fa'aalu ia Lady Esther, e fa'ataele ma fufulu ia mama, ae fa'alua lava ona fagota lea tama'ita'i i le sami, na'o Oketopa ma Novema o tausaga ta'itasi e saili mai se Palolo. A le maua se palolo i na malaga e lua, e matua le mailoa le gagana e tautala ai Siaosi Mageo, e na'o figota ma i'a o le sami latou te malamalama ai."

O Lady Esther, o le lona lua lea o ona va'a. Peita'i o le va'a muamua, fautuaina e Malaea Mageo le Faife'au, "Ia filifili nei oe, po'o le Atua i lou tofi, po'o le alu e fagota i lou va'a lena, ua tele taimi e fa'aalu e te fagota ai i lou va'a, ae tu'u le laugaina o le upu a le Atua. Na filifili ai lea e fa'atau ese atu le va'a muamua, peita'i, o Lady Esther fou lea, ua na'o le ta'ele ma teuteu, ae tele taimi ua fa'agauloto i le matou tama ona faiva. E leai ni i'a se tele e maua ai!"

"E leai ni molimau e faia i sauniga mo e pele ua maliu, e le talitonu o ia i molimau ola, se'i vagana ua muamua soli oe i se ta'avale ae ua e le oti ai, ona e ola mai lea e faia se molimau. Tau ina mautinoa sa vi'ia le Atua i mea sa faia e le sui ua maliu. E sili ai le taimi ua maliu ai nai lo le taimi na ola ai."

"E le talitonuina e ia sisiva ma pepese i sauniga. Afai e te fia pese, ia saunia lelei ma a'o lelei, ae le mafai ona e fa'aulu maia sau pese i le taimi o sauniga. E le mogeoso le upu a le Atua, e tamau i lou loto ma e ola ai."

Na tula'i fo'i le uso Fa'afeagaiga Rev Fa'atui Laolagi, mo sana molimau ona sa vavalalata fo'i latou augatupulaga ae maise o Auauna a le Atua uma e ui ina eseese tapua'iga. E tele mea e aga tutusa ai i la'ua i o latou vaitau, o lea fo'i ua maliu o ia ma o le a falelauasi sa'o lava lona uso Auauna i le aso e fa'amanatu ai lona 87 tausaga.

"O Siaosi Mageo o le Toa Manumanu o le Galuega a le Atua! O lana folafola fo'i e pu'upu'u, e suamalie ae a'ati. O lana auupega o le Pelu a le Atua e taufai ma'ai ona itu, e ma'ai le mata o lana pelu i taimi uma. O lena e lavea ai le to'atele aua e fa'aiila ma fa'ama'ai i taimi uma i le Tatalo ma le anapogi. E le solomuli pe fefe i le taimi o le taua! E le tulali le mata o lana pelu ae ma'ai, E le elea pe tulali fo'i le lau o lana pelu, ae i'ila ma e le elea lava! E tau mai luma ae le tau mai tua aua e le iloa solomuli, e le fefe fo'i! O le tau lena a le Toa Manumanu."

I le vasega o Fa'afeagaiga o lana Ekalesia sa amata atu iinei o latou olaga taumafai i le galuega, e leai se tasi e ese sana molimau,"E ote tele lenei tama! O lana ote lea e fa'asa'o ai fa'aiuga fai, ia le fa'afiafia i tagata, ae lauga sa'o le Upu a le Atua. Aua le fefe, aua le pala'ai, ae toa le loto, e lauga sao i tagata. Pe le fiafia mai ai ia te oe tagata, ae o lo'o fiafia le Atua o lo'o e faia le mea sa'o!"

I le Ekalesia ua fautuaina e ia nisi o ana faife'au talavou ua tula'i mai, "Fa'afoi le lotu i le lotu a le Atua! Ua ese mea ua i ai nei le aluga, ae tu'u le ala tonu e ave ai le upu a le Atua i le ekalesia. E le fiafia o ia e faia le fa'asamoa e avatu Ietoga ma taofiofi ae aumai tupe, ona le iloa lea po'o le a se aoga o le toga i le aiga, ae sili lava le meaalofa tupe, e aoga mo le tausiga o aiga, e iloga ai fo'i o e fia fesoasoani i le aiga pagatia."

O lona taofi, ua i ai le aganu'u ua taofiofia ai le soifua atina'e o tagata o le atunu'u. Ae sili pe a fa'aitiitia le fa'amuamua i na ie toga, ae fa'amuamua mai le alofa ma le foa'i atu o le mea sili ua maua e feoasoani i nai aiga pagatia.

O mea e manatua ai lenei tama, e ote ma lauga tu'usa'o i tagata, ina ia faia le Upu a le Atua, ae le o loto o tagata ae silisili ona alofa i Ekalesia. "E leai lava se malumalu o lenei Ekalesia e fa'atu, e le o'o atu i ai sana foa'i."

"O lea se mau e matua fa'ailo ai, le agaga moni o le tama i le galuega. Ua tatou molimauina fa'atasi, e moni ai le upu o le Tusi Pa'ia, "E fiafia le Atua i le oti o ona tagata amio Atua. I taimi o Iesu sa ia fafagaina le anoanoa'i o motu o tagata, sa ia fa'amaloloina fo'i gasegase tuga mai nisi, ae na'o le to'atolu lava tagata sa ia toe fa'atutuina mai le Oti!" 

"I le taimi nei, e leai se avanoa e toe fia fo'i mai ai ia i tatou Siaosi, aua o ai e toe fia fo'i mai i le tiga ma le tele o nei ma'i? Ua fiafia nei o ia aua ua toe mafuta atu ia Malaea ma le to'atele o tatou tagata o pelega na muamua atu ia te ia."

"Ua leva ona sauni o ia mo lana malaga, ua leva fo'i ona faitau i tatou uma i lana tusi, sa ia faia lava le galuega a le Atua ma le fiafia, e le fefe pe fa'atuai, ae toa le loto e fa'atino ona tiute, e o'o lava i le fautuaina ma le malosi o Failauga o le Upu a le Atua i le tatou atunu'u atoa e ala i lana polokalama fa'asalalau i luga o alaleo o Leitio ma alaata o le Televise i Amerika Samoa." O toe upu ia a le ta'ita'i o le sauniga Re. Aifa Tanuvasa, ona fa'ai'u ai lea i le tatalo ma mae'a ai le sauniga mamalu.

E lua isi sauniga e mulimuli mai, o le faigaleo i le po atoa e afua i le afiafi o le aso Tofi, Ianuari 18, 2018, ona fa'ato'a faia lea o lona sauniga mulimuli ma lagomau ai i lona Oliolisaga tumau i lona aiga i Petesa Uta, Amerika Samoa, i le aoauli Ianuari 19, 2018.