E ono molia tulafono latou na ulua’i galulue polokalame “Real ID Act”

Ua faamaonia e le Fa’atonusili o le Matagaluega o le Puipuiga o le Saogalemu Fa’alotoifale a le malo (ASDHS), afioga Samana S. Veavea i luma o le maota o sui i le vaiaso na te’a nei, e le o toe mamao ae molia loa i le tulafono i latou na ulua’i galulue i le polokalame lea na tu’uina mai ai se vaega tupe fesoasonai mai le feterale, e fa’atupe ai le polokalame o laisene ave ta’avale e fa’amalieina ai le tulafono o laisene ta’avale na pasia e le malo tele i le tausaga e 2005 (Real ID Act of 2005).

“Ua fai si umi o fa’agasolo mai su’esu’ega a lo’u Ofisa i le mataupu lenei e fa’atatau i le vaega tupe mai le feterale, lea na fa’amatu’u mai e fa’atupe ai le polokalame o le Real ID i lalo o le tautua a le Ofisa o Leoleo, ma ou te fia fa’ailoa atu, e le o toe umi se taimi ae molia loa i latou uma sa mua’i galulue i le taulimaina o le tupe lea sa aumai e fa’atupe ai lenei polokalame”, o le saunoaga lea a Samana i luma o le maota o sui, ina ua fesiligia o ia e afioga i Faipule i se tulaga ua o o i ai lenei polokalame.

O le tele ai o fa’asea mai le atunu’u i le leai ni laisene ave ta’avale o maua, ae o lo o fa’aaoga lisiti mai le Ofisa o Ta’avaleafi a le malo i Tafuna (OMV) e avea o laisene mo se taimi le tumau, e fa’atali ai le taimi e fa’aleleia ai le masini o lo o pu’e ai ata mo laisene ave ta’avale, na mafua ai loa ona valaau e le Komiti o le Puipuiga o le Saogalemu Lautele a le maota o sui lenei mataupu.

Na fa’aalia e le Komesina o Leoleo ia Le’i Sonny Thompson i se iloiloga sa faia i le vaiaso na te’a nei i luma o le maota o sui e fa’apea, talu ai le taugata o le tau e toe fa’atau mai ai se masini fou e pu’e ai ata o laisene ave ta’avale, a o lea fo’i o loo fa’aauau pea ona galulue lona Ofisa i le fa’amautuina o le polokalame o le Real ID Act, ua manatu ai loa e fa’aaoga pea mo le taimi nei lisiti mo ave ta’avale, e fa’atali ai le taimi e mautu ai fuafuaga ma amata aloaia ai loa le pu’eina o laisene ave ta’avale fou e pei ona fa’atupe mai e le feterale.

Ae na fa’amanino e Samana e fa’apea, e ui o lona Ofisa sa talosagaina le vaega tupe e fa’atupe ai le pu’eina o laisene ave ta’avale ina ia laina tutusa ma le tulafono a le fetarale, Real ID Act, peita’i o le Matagaluega o le Puipuiga o le Saogalemu Lautele sa ave i ai e le feterale le tupe e fa’agaioi ai le polokalame.

“Pau le tulaga fa’aletonu na tula’i mai, e le i fa’amaoni i latou sa tu’uina atu i ai le tupe mo le fa’atinoina o le polokalame, ona o tulaga na maua sa fa’aaoga le tupe e fa’atau mai ai masini, peita’i o le tele o ia masini e le i fa’apipi’iina mo le fa’aaogaina”, o le saunoaga lea a Samana.

O gaioiga e pei ona fa’agasolo i le taimi nei e le ASDHS e pei ona saunoa Samana, e aofia ai le fa’apipi’iina o masini e fa’atino ai le galuega, aemaise ai o le fa’apipi’iina o masini pu’eata e fa’aaoga, ma ua i ai fo’i le isi vaega tupe e tusa ma le $180,000 mai le feterale lea ua sauni e maua e fa’auma ai le galuega, ma le tuutuuga o le a galulue fa’atasi le latou ofisa ma le Ofisa o Leoleo i le fa’amae’aina o le polokalame.

“O le fa’afitauli e pei ona tula’i mai, ua tele le vaega tupe ua fa’aaoga ae leai se ripoti na tu’uina atu e fa’amaonia ai le fa’aaogaina o le tupe, peita’i o tulaga ia ua matou galulue fa’atasi ai nei ma le Ofisa o Leoleo, o le a fa’atonutonu atu e lo’u Ofisa le fa’aaogaina o le tupe atoa ai ma le tu’uina atu o le ripoti i le feterale i vaega uma sa fa’aalu i ai le tupe”, o le saunoaga lea a Samana.

O se tasi o ali’i sa galue i le Ofisa o Leoleo i tausaga ua mavae, lea fo’i e i ai lona tomai i tulaga o masini fa’aonaponei, lea ua fa’amaonia e Samana le fa’a faigaluegaina e lona Ofisa mo le fa’apipi’iina o masini nei, ina ia mafai ai ona fa’agaioi le polokalame ma fa’atinoina loa i se taimi lata mai.

O lo o fa’agasolo fa’atasi lava le polokalame i laisene ave ta’avale ma le polokalame o le fa’amalosia lea o puipuiga i le aumai fa’apologa o tagata mai fafo e galulue i galuega mamafa.

Na fa’amaonia e Samana le tele o talosaga mo ni fesoasoani e fa’aoo atu i lona Ofisa, ona o tagata mai fafo o lo o taua le aumai ma fa’apologa i galuega i Amerika Samoa nei, aemaise lava i tagatanu’u mai atunu’u e pei o Filipaina, Saina, Vietnam, Thailand.

“E leai lava ni fa’asea mai o tagata Samoa e fa’atatau i ni isi o faia i ai faiga faapologa, pau mataupu o loo taulimaina e lo’u Ofisa o talosaga mai tagata o atunu’u e pei ona taua o loo aumai ma faapologa, ma o loo mamafa ai fo’i a matou su’esu’ega, ae foliga mai o lo o mafuli lava i tulaga o mataupu tau Femalagaaiga”, o le saunoaga lea a Samana ina ua fesiligia i le mataupu o tagata mai fafo o lo o aumai ma fa’aaoga i galuega fa’apologa i le teritori.

Talu ona pasia le tulafono e faasala ai i latou e aumai tagata mai fafo ma faaaoga i galuega fa’apologa, e leai lava se isi ua molia i lea tulafono e pei ona saunoa Samana, ona o le tele o le lavelave o lo o maitauina i le tulafono o lo o i ai.

O le fa’afitauli numera tasi e pei ona saunoa le ali’i Fa’atonu, o tagata o lo o pito sili ona aafia i faiga nei, o tagata o lo o aumai i lalo o le vaega o le tulafono lea e sponsor ai e pisinisi tagata mai fafo e o mai e galulue i Amerika Samoa, ma o le mea moni, o le to’atele o tagata nei o lo o feoa’i e leai ni ID, e ese fo’i galuega na aumai e galulue ai, ae ese galuega ia ua ave i latou nei e fa’atino, ma o lo o galulue pea lona Ofisa i le sailia o ia tulaga ina ia taofia ma le fa’atupulaia soo.