E LE O OE O SE SULI MONI - XXXIII

Ua ala valevale i luga le teineititi o Ianeta ona savali atu loa lea ua tatala le faitoto’a o le potu ae aumai le tusi na alu atu ma le auauna, ona ia fa’afetai lea i le auauna ma toe tapuni le faitoto’a, ae na te’i ina ua fa’apea atu le auauna ia te ia, “Ianeta, a i ai se isi mea e te mana’aomia, ona fa’afesoota’i atu lea o le Ofisa o auauna a le tupu”, o le tala lea a le auauna ma savali ese atu ma le potu a le teineititi pologa, ae o Ianeta i le taimi lea, ua ia tago atu ua uu mai le ipu meaai ona faanatinati atu loa lea o lana savali i luga o le laulau ma tu’u ai le ipu meaai, ae ua saofa’i i lalo ma tatala loa le tusi ae lau, ma o upu la lenei o le tusi. “Mo Ianeta si a’u tama peleina. Ou te iloa ua siliga tali i seu se fesoasoani mo oe e pei ona malaga atu ai lou Tama o Meki ma lana vaega faapitoa ina ia toe aveese mai oe mai le nofoaga lena ua avatu fa’a pologa i ai oe e le fafine saua o Mekala sa e nofo ai. Vaai oe si a’u tama pele, e le mafai lava ona ou malolo se’i vagana ua e toe fo’i mai i o’u lima, ae o le a ou taumafai ina ia saili lava se auala e toe fa’afo’i mai ai o oe i lo tatou aiga. Tofa o Lucy lou Tina faiaoga”.

Na pei o timuga le maligi ifo i lalo o loimata o le teineititi o Ianeta ina ua mae’a ona ia lauina le tusi, ma ua faigata ai ona fa’atulaga tonu lona mafaufau i se gaioiga e tatau ona faia, aua o lea ua ia folafola i le Tupu e tusa ai o lona manaoga o loo i ai, ina ia taofia pea o ia e avea ma pologa i totonu o le malo, ae tatala Meki ma ana auauna e toe fa’asa’oloto. E oo ane lava i le taeao ua tu’upoina e toe oo atu ai Ianeta i luma o le maota o le Tupu mo le la fonotaga mulimuli, e le’i mautu lava se filifiliga a le teineititi pologa, ona o lea ua toe suia uma ona lagona sa i ai i le tusi mai le fafine faiaoga o Lucy lea sa ia faitauina. E taunu’u atu le auauna e tatala mai le teineititi pologa mai le poto o loo fa’amautu ai o ia, ua leva na tutu mai ai Ianeta i luma o le faitoto’a ua uma ona sauni, ma la savavali atu ai loa i totonu o le maota o le Tupu, le nofoaga masani lea la te fono soo ai ma le Tupu o le malo. O le taeao ese lea i totonu o le maota, ua ese le auala ua fa’atulaga ai le potu fono a le Tupu, ua foliga mai o se fale fa’amasino, e ese lava le vaega lea ua fa’atulaga mai ai laulau ma nofoa, ese fo’i le pito i luma o le maota lea ua tu’u mai ai le laulau ma le nofoa o le Tupu, ae o se tasi o itu ua ese ai le vaai a le teineititi pologa, o se taimi muamua lea ua taunu’u atu ai i totonu o le maota, e le o alala mai le Tupu i lona nofoa masani.

E le’i umi ona taunu’u le teineititi i totonu ma saofa’i i luga o se tasi o nofoa e fa’atalitali ai le taunu’u ane o le Tupu, ae fa’afuase’i loa ona ia fa’alogoina se leo ua alaga leotele fai mai, “Tutula’i uma, ua afio atu le Tupu o le malo”, tau fai tutula’i ali’i auauna e to’alua o loo leoleo i le faitoto’a, fa’apea ai fo’i ma le teineititi pologa, ae ona vaaia loa le Tupu ua aga’i atu ma ona laei e pei o ni laei o se fa’amasino ma alala i luga o le nofoa. “Ianeta lo’u afafine e, alala mai i lou nofoa”, o le valaau ane lea a le Tupu i le teineititi pologa, ona amata ai loa lea o le la fonotaga. “O le aso lenei e tulaga mai lava i aso uma sa masani ona ta feiloa’i ma talisua ai, ona o le aso lenei o le a faia ai le fa’aiuga mulimuli e tusa ai o le mataupu sa e tatalo mai ai i le 2 vaiaso talu ai. Ua mae’a ona ou iloilo ma le toto’a i tulaga uma atoa ai ma fa’amaumauga e uiga i lenei mataupu, e le gata o le ripoti sa tuuina mai e a’u auauna e tusa ai o le taimi na ulufale mai ai Meki ma ana auauna, atoa ai ma lau talosaga ina ia fa’asa’loto i latou ae taofia pea oe i totonu o le malo e avea ma pologa. Ua ou iloa o oe o se teineititi lototele, ma ua ou manatu ai, o le fa’aiuga lenei o le mataupu, talu ai ua soli e Meki ma ana auauna tuutuuga fa’avae o le malo, o le mafua’aga lea, o le a oo ai le oti i se tagata se to’atasi o i latou, o le aso fo’i a taeao o le a faia ai le vili e saili ai le tagata o le a fasiotia mai ia Meki ma lana vaega”.