E LE O OE O SE SULI MONI - Vaega X

Na umi se taimi o nonofo le ulugali’i milionea ma fa’asaga le isi i le tasi e aunoa ma se upu na la toe gagana ai, ona o le fa’ateia o i laua i le asiasiga faafuase’i a le tamaloa o Meki na alu atu. O le le mautonu tele o le mafaufau o le fafine o Mekala na mafua ai ona tu i luga ma savali aga’i atu i le fa’amalama o le fale, ma tilotilo mai i lalo i le malae, ma ia iloa mai ai le teineititi o Ianeta o lo o pisi lava i le fa’atinoina o ana feau, ae o le taimi lea ua amata ona goto atu le la i lona tauafiafi, o le taimi fo’i lea e manava ai galuega o le aso mo soo se tagata faigaluega i totonu o Ofisa ma Kamupani i le aai. Na vaaia e le fafine le alofa o Mekala le fiafia o le teineititi o Ianeta i lana galuega o lo o fa’atino i le taimi lea, e le gata o lo o pisi i le la’uina o lana lapisi ae o lo o ia vaaia pea fo’i le pese o le teineititi ma fai ana galuega. E ui i le tele o taimi e vaaia ai e le fafine le teineititi o lo o pisi i le fa’atinoina o ana galuega, e leai lava se taimi e mafai ai ona ia alu atu ma fa’afetai atu ia te ia e tusa ai o galuega lelei o lo o ia fa’atinoina mo le aiga.

E malu ane loa le afiafi ae saofa’i loa ma Ianeta i luma tonu lava o le tama’i fale o lo o nofo ai ua mae’a lana galuega, ua mama uma fo’i totonu o le lotoa fa’apea ai ma le togalaau sa fa’atonu o ia e le fafine le alofa o Mekala e tapena ona fa’amama, ma ua leai lava se vaega o le fanua atoa e toe vaaia ai ni lapisi poo ni otaota e ta’atitia solo. Ua aapa atu le teineititi pologa i lana faguvai o lo o fa’atu i tua tonu o le pou lea ua fa’alagolago ai lona tua, ona ia aumai lea ma tatala ae inu, e toomaga i ai lona galala i le fiainu ma le fia’ai lea ua oso ane, ae o nai vai sa totoe i le fagu na ia sa’asa’a i luga o lona ulu ma ona foliga, se’i tau maua ai sina malulu mai le vevela o le aso. Ua lagona e Ianeta lona vaivai ma le lelava, ae a mafaufau atu i le leai o se meaai o i ai e tua i ai le afiafi, ona lagona lea o lona fa’anoanoa. Ua mapu atu le La i lona nofoaga mau ae ua fotua’i mai le pogisa, ma ua puaina mai ai le malu o le afiafi, lea na taia ai le tino vaivai ma le lelava o le teineititi o Ianeta, ma i’u ina taoto atu ai lava i le vaega tonu o lo o nofonofo ai ma ua fa’agalegale moe, seia oo lava ina moe gase. Talofa i le olaga pologa ma le upu esea, e tiga lava ona tele ma faula’i mea’ai e totoe i le aiga o Mekala i po uma ma aso uma, ae le taitai manatu le fafine na te fa’ama’imauina sina meaai mo Ianeta.

Sei o tatou liliu atu i le tamaloa o Meki lea ua toe fo’i atu i lona aiga ina ua mae’a lana asiasiga. Na ona taunu’u atu lava o le tamaloa i le fale, ona ia faanatinati atu loa lea i tua i le umukuka o lo o pisi mai ai si ona to’alua o Lucy, ona o lona mana’o e fa’asoa i ai le tala e uiga i lana asiasiga sa alu, atoa ai ma le vaaiga sa ia vaaia i le aiga o Ianeta. Sa na o le fa’alologo o taliga o le fafine o Lucy ma ona loimata ao fa’amatala e Meki le mamafa ma le pologa o galuega sa faatinoina e Ianeta i le taimi na ia taunu’u atu ai, ma ua ia sauni e tu’uina atu sana ripoti i le latou Ofisa e tusa ai o le vaaiga sa ia molimauina, ina ia mafai ai ona faia se fa’aiuga e aveese mai ai Ianeta mai le aiga o lo o nofo ai. O le naunau tele o le tama’ita’i faiaoga o Lucy e fia vaai ia Ianeta i le po lea, na ia tauanauina ai lona to’alua la te toe o e asi Ianeta ma ave i ai sana meaai, ai o nofo fia ‘ai na o ia i lona fale. Ua tapena le ulugali’i ma aga’i atu loa i le pitonu’u o lo o nofo ai Ianeta, e le mamao mai le vaega o le taulaga lea o lo o la nonofo ai.  Na taunu’u le ulugali’i i luma o le lotoa ma vaaia ai le pa o lo o matala, ona ulufale loa lea o le la ta’avale i totonu, ma aga’i sa’o atu loa i le tama’i fale lea na fa’asino e Meki ia Lucy, o le fale lena o lo o nofo ai Ianeta, ae o se itu na matua fa’ateia ai le ulugali’i, ina ua taunu’u atu le la ta’avale i luma tonu lava o le tama’i fale lea, ae o la vaaia ai le teineititi pologa o Ianeta o lo o fa’agaulua mai i fafo o le fale o lo o moe vaivai ai.