E LE O OE O SE SULI MONI

Vaega 125

Na ona uma lava o talanoaga sa faia a Leoleonana ia e to’alua ma le la Ta’ita’i, le tamaloa o Meki, tapuni loa ma le telefoni ae amata loa ona totolo lemu atu i se vaega saogalemu e mafai ai ona la aga’i sa’o atu i le fale a le ulugali’i o Mekala ma Pulusi. Ao lei ulufale ali’i Leoleonana ia e to’alua i totonu o le fale a le ulugali’i, na la toe taumafai lava e siaki muamua pe ua latalata mai le ta’avale Leoleo lea ua fa’amoemoe e tuu ai i totonu le tamaloa. E siaki atu, ae fa’ailoa ane e ali’i Leoleo Faapitoa e to’alua o loo malaga mai i le ta’avale, o laua lea ua leva ona paka i le pa vao lea e tuaoi ma le pa o loo si’omia ai le fanua a le ali’i ulugali’i o Mekala ma Pulusi. “Aga’i mai loa i totonu o le lotoa i le taimi lava lenei, aua ne’i toe fa’atuai”. O le fa’atonuga lea sa tuuina atu i Leoleonana e to’alua o loo i totonu o le lotoa. E lei toe fa’atali ali’i Leoleonana ia e to’alua, ae ua ulufale fa’amalosi loa i totonu o le fale, ma o la vaaia ai le tamaloa o Pulusi o loo taoto i luga o lona moega o loo moe gase. Na ona tulioso lava i totonu o le au ali’i ia, tuu atu loa ma le ie pa’epa’e lea ua uma ona uu i le pauta e vave ai ona fa’amoe le tagata, ma ufi ai loa ona foliga ina ia taofi ai o ia mai le ee i luga. O le malosi o le tamaloa o Pulusi na tau fai ai sina umi o fai tauiviga a le to’alua lea ma le tamaloa. Peita’i, na avea le malosi o le pauta lea e fa’amoe ai le tagata na fa’afuase’i ai ona gase le malosi o le tamaloa ma fa’agofie ai loa ona moe ua le toe gaioi, ma fetagofi atu ai loa au ali’i ia ma toso fa’atata loa i fafo le tamaloa mai le fale, ae o le taimi lea ua leva ona paka i fafo le ta’avale a Leoleo Fa’apitoa, ma tuu ai loa i totonu le Pulusi ma aveese atu loa.

O le atamamai tele o ali’i Leoleonana i le fa’atinoina o osofaiga fa’apenei, na la tau fai tulioso uma ai i totonu o le ta’avale ma o ese atu loa. Talu ai e le o mautinoa e ali’i Leoleonana poo i ai ni masini pu’eata i totonu o le fale ma le lotoa, na mafua ai ona la faia le gaioiga lea. Afai e i ai ni mea pu’eata i totonu o le lotoa ma le fale, ia mafai ai ona vaaia i laua ua la o ese atu ma le fanua. Na ona taunuu lava o le ta’avale i luma o le faitoto’a o le pa, fa’afuase’i loa ona toe oso i fafo le isi Leoleonana e to’atasi ao alu ai lava le isi to’atasi o i laua i le ta’avale, mo le momoliina atu o le tamaloa o Pulusi i le nofoaga autu a Leoleonana lea o loo fa’atali mai ai le latou ta’ita’i, le tamaloa o Meki. Na ona oso lava i fafo o le Leoleonana mai le ta’avale, pei loa o le emo o le mata lona toe aga’i vave atu i le vaega o le lotoa lea sa la lalafi ai ma lana paga, e fa’atalitali ai le toe fo’i ane o le fafine o Mekala i lona fale. Sei o tatou liliu atu lava i le malaga a le fafine o Mekala lea ua fai si umi talu ona alu ese mai ma le fale. Talu ai e fesootai uma masini i totonu o le fale a le fafine ma lana ta’avale, na fa’afuase’i ai ona i i le masini o loo i luma o le faitoto’a o le fale ina ua ulufale fa’amalosi ali’i Leoleonana i totonu, ma fa’afuase’i ai ona ee le ‘alarm’ o loo i totonu o le ta’avale, ma iite ai loa le fafine e i ai le mea lea ua tupu i lona fale.

Na ona maua lava e le fafine o Mekala o le fa’ailoilo fa’afuase’i loa ona afe i tua lana ta’avale ma malolo ai i luma o se tasi o faleoloa, ae vili lana telefoni i lana vaega fa’apitoa. “BOSS, e i ai se mea ua mana’omia ua e vili fa’afuase’i mai ai i lenei aso”. O le tali ane lea a le isi tama faapitoa a le fafine o Mekala. “Ioe, o lea ua i i mai la’u ‘alarm’ e faailoa mai ai, e i ai le mea o loo tupu i lo’u fale. O lea o le a ou toe fo’i i lo’u fale i le taimi lenei, pe a ma le 30 minute le umi ona ou taunu’u lea, ae ou te mana’omia se Van e mulimuli mai i o’u tua ina ne’i tula’i mai ni faaletonu ae leai se isi ou te tua i ai. Manatua, ia toe faaoo atu le fa’atonuga lenei i la tatou vaega, aua ne’i fasiotia Ianeta ma lona to’alua, se’i vagana ua manuia uma fuafuaga e pei ona tatou taumafai atu i ai”.