E LE O OE O SE SULI MONI

Vaega 124

E lei uma lelei atu le tala a le ali’i fitafita ae faafesalavei mai le fafine o Mekala ma fa’apea mai i ai, “Faalogo lelei mai lava ou taliga i la’u fa’atonuga, ou te le mana’o e tupu se mea faapena i matua o le alii milionea. Ia outou faia se auala e aumai ai i laua e aunoa ma se mea e tupu ia tei laua. Afai tatou te maua mai le olomatua ma le toeaina milionea, ona tatou fa’aaogaina loa lea o le auala lena e maunu mai ai lo la tamaoaiga mai o la aiga ma le malo, ona maua lea o le avanoa e mafai ai ona tatou fasiotia Ianeta ma lona to’alua mulimuli ane ai. Ia fai le galuega ma le fa’aeteete, aua ne’i tula’i mai se fa’aletonu e ono oo mai ai se tala fa’anoanoa i lo’u loto”. O le fa’atonuga lea a le fafine o Mekala i lana tama ta’ita’i ‘au fitafita lea sa la talanoa. “O fea lea ua i ai nei Ianeta ma lona to’alua”, o le toe fesili tuli tatao atu lea a Mekala. “O loo taofia pea i laua i la tatou nofoaga autu i le taulaga, se’i tuana’i ni nai aso ona fa’atoa aveese mai lea e ave sa’o loa i nofoaga o loo i ai tagata palota i luga o atumauga, o iina lea ua fa’amoemoe e ave i ai ma fasiotia ai lava i laua”. Na faalogoina e le ali’i fitafita lea le ataata lemu o lana olomatua fia keige leaga o Mekala, ona toe faapea atu lea o lana fa’amatalaga, “Vaai oe, a e lelei i le taumafaiga o le galuega lena, o le a milionea uma tatou, ae a e faatamala, tatou te toilalo popo uma lava”. Na ona uma lava o le tala mulimuli a le fafine o Mekala, tu’u loa i lalo ma lana telefoni ae savali atu ma oso i totonu o lana ta’avale ma aga’i atu ai loa i le taulaga. E lei toe fa’atali ali’i Leoleonana e to’alua o loo lalafi i totonu o le fanua i le taimi lea, ae ua la logo vave loa le la ta’ita’i, le tamaloa o Meki ma faailoa i ai fa’amatalaga uma e fa’atatau i le nofoaga lea o loo i ai Ianeta ma Laneselota, ma la talosagaina ai fo’i le tatau lea ona vave a latou gaioiga ina ne’i tuai ona oo lea o le oti i lana fanau.

“O lea fo’i ua sauni Mekala ma lana vaega e osofa’i le nofoaga autu o le aiga milionea. Ia fa’anatinati se vaega o Leoleo Faapitoa a le malo i le nofoaga o loo i ai le fale o le ulugali’i miliona, o matua ia o Laneselota, ina ia mautinoa e leai se faalavelave e tula’i mai ia tei laua i se taimi o lenei aso”. Na ona uma mai lava o le tautalaga a le Leoleonana, togi atu ai loa ma le fa’afetai a le tamaloa o Meki faatasi ai ma lana faatonuga, “Ia oulua mataala ao lua i ai i le nofoaga lena. Afai ae maua oulua e le vaega a Mekala ae lei maua la’u fanau, lona uiga ua tatou toilalo uma lava. Fa’amolemole, ia oulua mataalia ma fa’aeteete, a ia tuli mata’i uma gaioiga a Mekala e faia”. E lei uma lelei atu le faatonuga lea a Meki ae toe faapea mai lana Leoleonana i luga o le telefoni, “E te iloa alii Boss, e lei leva atu nei lava ona alu ese atu le ta’avale a Mekala mai le fale, o loo aga’i atu i le taulaga, ae toe o lona to’alua lea o loo i totonu o le fale i le taimi lenei”.  O le tomai fa’a Leoleonana sa aoaoina ai le tamaloa o Meki, sa ia faatonuina ai loa ana tama Leoleonana e to’alua o loo lalafi i totonu o le lotoa, ina ia osofa’i loa le fale ma aveese faamalosi mai le Tamaloa o Pulusi, tuu i totonu o le ta’avale o loo paka mamao mai i le isi itu. “Ua lelei Boss, o le a faia e tusa o lau fa’atonuga”. Na ona uma lava o le talanoaga a le to’alua lea, geno atu loa ma le ali’i lea i lana paga, “Sole, ia fa’atino loa le osofaiga mo Pulusi i le taimi lenei, aua ne’i ta faiaga ina ne’i toe fo’i mai Mekala ona maua lea o taua. A uma loa ona tuu Pulusi i totonu o le ta’avale, ona e alu loa lea e momoli ese atu ae ou fa’atali pea iinei ina ne’i toe i ai nisi talanoaga e faia i luga o le telefoni ma fitafita leaga a le fafine, ae tatou misia ona avea lea ma lape mo la tatou vaega”.