E LE O OE O SE SULI MONI

Vaega 122

“Ia maua pea e oe le Ta’ita’i o le Vaega o Leoleonana a le malo le lototele, ao fa’agasolo ai galuega a Leoleo Faapitoa mo le tau sailiina o si au fanau. O le a matou logoina atu lava oe i soo se taimi matou te mauaina ai ni fa’amatalaga faaopoopo e uiga i lau fanau.” O upu faamalosi ma faalototele atu lea a le Ta’ita’i o Leoleo Faapitoa i le tamaloa o Meki, e tusa ai o le tulaga ua i ai si ana fanau. Na ona oso lava o le tamaloa o Meki i lana ta’avale ua fa’aola, ma aga’i atu loa i le fale, ua leai ma se lagona e toe fia fo’i e asi lana vaega lea o loo i ai i totonu o le lotoa o le fanua a le fafine o Mekala. Ua ese lava uiga fa’aalia o le tamaloa o Meki i lea aso, ma ona uiga fa’aalia i soo se taimi e manava atu ai mai lana galuega i le tele o aso. Na fiafia le loto o le fafine o Lucy ina ua ia vaaia le afe atu i totonu o le ta’avale a si ona to’alua ua manava, peita’i na fiu le fafine e fa’atali le taimi e ulufale atu ai Meki i totonu o le fale e pei ona masani ai i le tele o aso, na ona manava lava, ona oso lea i fafo ma le ta’avale ae savali telea’i atu i totonu o le fale. Na vaaia fo’i e le fafine o Lucy, ua ese le vaega lea ua paka mai ai le ta’avale a lona to’alua. E masani lava ona paka le ta’avale a le tamaloa o Meki i totonu o le fale ta’avale, o se taimi muamua lea ua paka ai le ta’avala e le tamaloa i autafa o le pa laau lea sa toto e si ona afafine o Ianeta ao lei aga’i ese atu ma nonofo fa’atasi ma lona to’alua, le ali’i milionea o Laneselota.

E lei mamafa tele i le manatu o le fafine o Lucy le tulaga ma suiga e pei ona ia molimauina, ae sa fa’aauau pea ona pisi o ia e tau tapena faamae’a le laulau mo le taumafataga o le afiafi. Ae ina ua fai si umi e le o ulufale lava le tama o le aiga, na mafua ai loa ona savali mai i fafo le fafine o Lucy ma aga’i sa’o atu loa i le ta’avale a lona to’alua, i lona fia iloaina pe ua i ai se mea ua tupu. Na iloa mamao atu lava e Lucy le faagaulua mai o si ona to’alua i luga o le foeuli o le ta’avale, ae o loo ola pea le ta’avale e lei tapeina. Na ona taunuu atu lava o le fafine i le vaega o loo paka mai ai le ta’avale, ona aapa atu loa lea o lona lima ma tatala le faitoto’a, peita’i e lei matala le faitoto’a, o loo loka. Na tu’itu’i e le fafine le tioata o le ta’avale ma fa’afuase’i ai loa ona te’i i luga le tamaloa o Meki sa fa’agalegalemoe, ona ia vili lea i lalo o le fa’amatala o le faitoto’a ina ua ia vaaia si ona to’alua o loo tu’itu’i atu. “E i ai se mea ua tupu ua e moe faagaulua ai i totonu o le ta’avale. Sa ta o i le fale e te taoto ai”. O le saputu atu lea o tala a le fafine o Lucy, ma aapa atu lava ua uu mai le lima o si ona to’alua, ma taumafai e ta’ita’i mai la te o i le fale. Na aapa le tamaloa o Meki ma tape le ta’avale, vili i luga le tioata ona oso loa lea i fafo ae tapuni le faitoto’a, ma la savavali to’alua atu loa ma Lucy e aga’i atu i totonu o le fale. Na lagona e le fafine o Lucy i lona tino e i ai le mea o loo tupu ua mafua ai ona suia fa’apea uiga o lona to’alua.

“Ua ou vaaia suiga ia te oe i lenei afiafi, afai o ni fa’afitauli i le galuega, fa’amalolo lou mafaufau ae sauni e fai le ta meaai o le afiafi, ae afai ua e ma’i, e sili pe a e taoto ae se’i fa’ainu sau fualaau, a le o lena fo’i, e sili ai loa le ta o i le falema’i. E i ai se mea ua tupu ua e mata fa’anoanoa ai”. O le tau fai saputu atu lea o le mau fesili a le fafine o Lucy isi ona to’alua, ae sa na o le nofo lava o le tamaloa e le gagana i se upu e tasi. E lei umi, ae vaaia loa e Lucy le maligi ifo i lalo o loimata o si ona to’alua, ma ua ia vaaia lona mafatia tele. “Meki si o’u to’alua, ta’u mai pe i ai se mea ua tupu ua mafua ai one a fa’anoanoa. E i ai se taimi ua tupu i le ta aiga ua mafua ai ona e tagi fa’apena”. Na tau maua mai loa sina to’a i le tamaloa o Meki, amata loa ona ia talatalanoa atu isi ona to’alua. “Vaai oe si o’u to’alua, o ananei lava i le afiafi na ou maua ai le telefoni mai le Vaega o Leoleo Faapitoa a le malo, o Ianeta ma lona to’alua ua aveese e ni tagata leaga”.