E LE O OE O SE SULI MONI

Vaega 120

E lei faigata i le Ta’ita’i o le Vaega o Leoleo a le malo ona ia taliaina le talosaga a Meki mo se fesoasoani mai Leoleo a le malo, ina ne’i i ai se tulaga matuia e tulai mai i galuega a lana vaega o loo faatinoina i le taimi nei. Na ona tuu lava i lalo o le telefoni a le Komesina o Leoleo, aapa atu loa i lana telefoni feavea’i ma vili ai loa le numera a lana Supavaisa o loo fa’auluulu i ai le vasega o Leoleo ma faailoa i ai le manaoga, ina ia tapena ni Leoleo se to’a 20 ma a latou a’upega ma fa’anatinati atu loa e faalatalata i le vaega o loo fa’atinoina ai suesuega a Leoleonana a le malo, ina ne’i tula’i mai se manaoga ae o loo lava le taimi e tali atu ai. E lei atoa se 20 minute na tapena ai le vaega o Leoleo faapitoa ma a latou a’upega ae tulioso loa i a latou Van tetele e 4 ma aga’i atu loa i le nofoaga e latalata i le vaega lea o loo fa’atinoina ai suesuega a Leoleonana a le malo.

Sei o tatou liliu atu lava i le nofoaga o loo i ai Leoleonana a le malo. Na ona mae’a lava ona tuuina atu e Meki o le fa’atonuga i lana vaega i le gaioiga e tatau ona fai, gaioi loa ma lana vaega e fa’atino le fa’atonuga. O le isi to’atolu lea ua tofi ina ia aga’i i le pito i luma ma a latou aupega e fa’atali ai se osofaiga fa’afuase’i e alu ane, ae o le isi to’atolu o le a aga’i i le pito o le pa e sauni ai mo le tali atu, ma le to’atasi e gafa ma le eliina i luga o le vaega lea o loo masalomia o loo tanu ai le tino maliu o le Tamaloa meauli lea o loo nonofo ma lona aiga i le fanua ma le aiga o le fafine o Mekala ma lona to’alua o Pulusi. E lei umi ona pisi le fitafita lea e toatasi i le tau eliina i luga o le tuugamau ae faalogoina se leo, e foliga mai o se mea o loo lele i ona luga. Na tu le Leoleonana ma tau autilo poo fea le itu o loo alu atu ai le leo, ae na te’i ina ua vaai atu i tua atu o le laau tele lea o loo galue ai i lalo, o loo faapepe pepe mai ai se tama’i va’alele lanu pa’epa’e, e foliga mai o se masini pu’e ata o loo i le pito i luma. E lei fa’atali le alii Leoleonana lea ae na ona aapa atu lava i lana fana ma fana ai loa i lalo le tama’i masini lea. O le pa leotele o le fana na tau fai tepa atu ai isi sui o lana vaega i le fia iloa o le mea ua tupu, ae o ana faailoilo na faailoa ane i ana taga sa faia, na malamalama ai lana vaega i le mea ua tupu.

E lei umi ae faalogoina le aga’i ane o ‘au a le fili e osofa’i Leoleonana ona o lea ua manino i ata sa pu’eina atu e le latou tama’i vaalele ae lei fanaina i lalo, o loo i ai tagata i totonu o le fanua. Na ona taunuu ane lava o le osofaiga a ‘au o le fili ae osofa’i loa e Leoleonana a Meki sa leoleoina le pito i luma ma vaaia ai le toe solomuli. O le taimi foi lea na logoina ai Meki o lea ua alu le osofaiga, ma ua mana’omia fo’i sana fesoasoani mo se vaega faapitoa o Leoleo a le malo ina ia lagolago ane i taumafaiga e tete’e atu i le fili ma ana ‘au. E silia i le itula o faia fetauiga i le va o Leoleonana ma ‘au a le fili, ae taunu’u ane loa ma le vaega faapitoa o Leoleo a le malo, peita’i o le faafitauli lea ua tula’i mai nei, ua le mafai ona toe ulufale se isi i totonu o le fanua a le ulugali’i o Mekala ma Pulusi ona o lea ua poloka e le vaega fa’atupu faalavelave lea o loo lagolagoina taumafaiga a le ulugali’i. Na ona taunu’u lava o le vaega o Leoleo faapitoa a le malo, sui loa ma le polokalame o le osofaiga, o le a aga’i pea isi i le nofoaga o loo aga’i mai ai ‘au a le fili, ae o le a taamilo mai le isi vaega i le isi itu o le fanua ina ia mafai ai ona siomia i latou nei ma taofia faapagota loa ona o le latou fa’atupuina o faiga faatupu faalavelave. Na pei o le emo o le mata gaioiga a Leoleo faapitoa i le taimi lea, i le taumafai lea e siomia le nofoaga atoa lea o loo vevesi ai fetauiga ma ‘au a le fili. Ao pisi fetauiga, na fa’afuase’i ona tatagi le telefoni a le ali’i o loo fa’auluulu i ai le vaega o Leoleonana, o Meki lea ua fili ane. “Talofa Boss”, ae na te’i le alii lea i le faapena atu o Meki, “O lea ua ou maua mai le tala o loo tau saili si o’u afafine o Ianeta ma lona toalua poo fea ua ave i ai”.