E LE O OE O SE SULI MONI

E leai ma se isi o le tamaitai peresetene ma lana staff na toe gagana i le taimi na latou vaaia ai le sosolo malie atu o le ta’avale a Laneselota, lea e fa’afeao atu e le ta’avale a ana auauna e to’alua. E aga’i malie atu lava le ta’avale a le alii milionea ma lana manamea, ae o le taimi lea o lo o tusi tusi solo ai lima o le fafine peresetene, o loo faatonu lana staff ina ia tatala i lalo le ie o loo tautau i luma tonu lava o le faitotoa e ulufale ai i totonu o le fale lea ua faatumulia i malo ma tagata valaaulia, aemaise ai aig lima vaivai lea ua faapitoa i ai le polokalame. Na ona sosolo atu lava o le ta’avale a le tama ma lana manamea, ona fa’afuase’i lea ona tu i luma tonu lava o le vaega lea e pisi ai le fafine peresetene ma lana staff i le tau toe tatalaina i lalo o le ie sa tautau i luma o le faitoto’a o le fale. Na tau fai togi uma ane ulu o le peresetene ma lana staff i le ta’avale a Lanseselota lea ua tu atu i o latou luma, ma tulimata’i la latou vaai poo ai lea la’a muamua ona oso atu i fafo mai le ta’avale. E lei umi ona tu le ta’avale ae vaaia loa le matala o le faitoto’a, ma vaia ai Laneselota ua oso atu i fafo mai le ta’avale, ona savali lea i le isi itu o le ma tatala le faitoto’a, ma vaaia ai le oso mai i fafo o Ianeta. Na tago le ali’i i le lima o lana manamea ua u’u ma la savali to’alua atu i le vaega tonu o loo galulue mai ai le peresetene ma lana staff. “Talofa Laneselota ma Ianeta”, o le faafeiloa’i ane lea a le fafine peresetene i le ali’i milionea ma lana manamea, ona fa’apea fo’i lea ona tali atu Laneselota ma Ianeta i le fafine peresetene ma faailoa atu i ai o la foliga fiafia.

“Talofa Ianeta, e ese le matagofie o lou laei i lenei aso, e foliga mai ua leva ona tulimata’i lau vaai i lenei fa’amoemoe taua, e sa’o lea,” o le fesili atu lea a le fafine peresetene, ae sa na o le luelue o le ulu o Ianeta ma ona laufofoga fiafia e fa’ailoa atu i ai lona lagolagoina o lona finagalo. Na ese lagona o le fafine peresetene i le taimi lea, e ui i le tulaga le manuia e pei ona tula’i mai i gaioiga a lana staff, ae foliga mai o loo vaaia pea foliga fiafia o Laneselota ma lana manamea. “Ua lua sauni tatou te aga’i atu i totonu o le hall mo le amataina o le polokalame,” o le toe fesili fia iloa atu lea a le fafine peresetene ia Ianeta ma Laneselota, lea fo’i sa tali atu i ai le tamaita’i meauli, “Ioe lau susuga i le peresetene, ua leva ona tuli mata’i mai la maua vaai ma te fia auai i lenei faamoemoe matagofie, ae paga lea, ua suia atoa lagona fiafia ma le naunau sa ia te a’u, ina ua tau atu la’u vaai i faaupuga sa tusia i le ie sa faapipii i luma o le faitoto’a o le fale. Ae ui i tulaga faaletonu e pei ona maitauina, e le o aveesea ai lava lo maua naunau ma te fia auai e lagolago ma molimauina lenei fa’amoemoe, ona o ni isi nei o vaega o le olaga sa a’oa’oina ai i maua i totonu o aoaoga sa maua auai, ina ia aua nei fa’atauaina vaega vaivai o le olaga poo mea faaletonu e fai mai e tagata ia tei maua, a ia faailoa atu i ai uiga tausaafia atoa ai ma lagona o le loto maualalo ma le fa’amagalo, aua o le finagalo lea o le Atua mo i tatou lana fanau, ia fusia i tatou uma i le alofa, filemu ma le loto maualalo”. Sa na o le luelue ulu o le fafine peresetene ao talanoa ane Ianeta e fa’atatau i ona lagona e tusa ai o le tulaga sa tula’i mai. A o talanoa le fafine peresetene ma Ianeta, sa vaaia le aga’i atu o le ali’i o Laneselota ma talanoa atu i sui o le staff o loo galulue i le toe tatalaina i lalo o le ie sa tautau i luma o le faitoto’a “Aisea ua toe tatala ai i lalo le ie sa outou tigaina e fa’apipi’i i luga,” o le fesili atu lea a Laneselota ma ona foliga fiafia i sui o le staff, e aofia ai ma le tama’ita’i Failautusi sa ia faia le fa’atonuga o loo tu mai i le isi itu. E leai se isi na gagana, se’i vagana ai le tau fai punonou uma i lalo e foliga mai o i latou uma o ni tagata ua sauni e lau a latou fa’asalaga ina ua faamaonia le moliaga o le fasioti tagata. Na faliu Laneselota i le itu o loo tu mai ai le tamaitai Failautusi ma fesili atu i ai, “Aisea ua e faia ai lenei mea leaga ia te a’u.”