E LE O OE O SE SULI MONI

E le o se tala fiafia na fa’afeiloaia le taunu’u ane o Meki ma lona to’alua i le falema’i i le afiafi lea, ma ua avea lea ma itu ua fa’ateteleina ai le loto popole o le ulugali’i e fa’atatau i le teineititi meauli. O le mae’a ai o le pisi o tama’ita’i tausima’i ma le foma’i e to’atasi o loo tiute i le tau togafitiina o Ianeta i le afiafi lea, na maua mai ai loa le fa’amatalaga, o loo manaomia se toto i lona tino ae o le fa’afitauli ua toe tasi lava le paina toto o loo totoe a le falema’i, e le iloa fo’i pe gafatia e le paina toto lea e tasi ona tali le manaoga o loo i ai i le po atoa. “Na i ai ni isi na mafai ona maua mai ai se fesoasoani mo si a’u tama”, o le fesili fia iloa atu lea a le fafine o Lucy i le teine foma’i sa la talanoa, ae na fa’ailoa ane i ai e le teine foma’i, e leai ma se isi e tutusa o la toto ma le ituaiga toto o loo mana’omia mo Ianeta. Sa i ai fo’i ni nai tagata uli na manatu e fesoasoani ane, peita’i e i ai lava si eseesega laititi i o latou toto ma le toto o loo mana’omia. “O le taimi nei, toe tasi lava le paina toto o loo totoe a le falema’i e mafai ona fesoasoani ai mo ia, ae afai e mana’omia pea e Ianeta ni isi paina toto i se taimi o lenei po poo taeao fou, lona uiga ua tupu le fa’alavelave, aua e le o i ai se isi toto o totoe mo ia”, o le fa’amatalaga lea a le teine foma’i ia Lucy na vaaia ai le maligi o loimata o le fafine ona o le alofa isi ana tama, ma ua atili ai ona oso lagona o le fia vaai atu ia te ia, ae faigata ona e le o mafai ona fa’ataga e foma’i se isi e vaai ia Ianeta i le taimi lea, ona o lo o fa’agasolo togafitiga mo ia.

Pe tusa o le 10 i le po lea, ae logoina loa le ulugali’i i le tulaga manuia ua vaaia ia Ianeta, se’i vagana ai le mana’omia pea o nisi paina toto e fesoasoani ai mo ia pe a toe mana’omia isi taimi oi luma, ma ua mafai fo’i ona la aga’i atu i totonu o le potu e vaai le la tama, ma o lagona fiafia na maua e le ulugali’i ina ua la vaaia foliga malosi ma le sagisagi fiafia mai o Ianeta, ma ua manino fo’i le ulugali’i i le gasegase tuga lea ua a’afia ai si a laua tama, o le mafua’aga lena e mana’omia ai lava le sapalai o le toto mo ia, ona o le taimi lava e maualalo ma le lava ai le toto i lona tino, o le taimi fo’i lea e tigaina ai o ia ma i’u ina fa’aletonu atu ai. Ao talanoa le ulugali’i ma Ianeta i totonu o le potu, sa fa’afuase’i ona maua e teine tausima’i se telefoni mai le ta’ita’i o le Sifi o le afiafi, o loo i ai paina toto e 3 ua mae’a ona tui mo Ianeta, o loo teu i totonu o le Fale Tui Toto a le Falema’i, pe afai e mana’omia i se taimi. E lei toe fa’atali le teine tausima’i ae ua aga’i atu loa i le Fale Tui Toto ma aumai le pusa o loo i ai paina toto ua mae’a ona teu malu mo le fa’aaogaina i le taimi e mana’omia ai, ona ia si’i lea ma aga’i atu i le ofisa o lo o fa’agasolo ai le fa’atulagaina o a latou tiute ma galuega mo le Sifi o le po. E pisi lava le aufaigaluega a le falema’i i le fa’atinoina o a latou tiute e aofia ai le togafitiina o isi gasegase i totonu o isi potu, ae o loo talatalanoa to’atolu lava le ulugali’i o Meki, o lona to’alua ma laneta i luga o le moega o le tama’ita’i, ma taumafai le ulugali’i e mata’itu ni isi mea e mana’omia e Ianeta, aemaise ai lava lana paina toto o loo tui.

E fetaui lava le tau fa’agale moe o le fafine o Lucy ae eueu loa e lona to’alua e alu e logo teine tausima’i o lea ua uma le paina toto o loo tui a Ianeta, pe mafai ona toe faia se isi siaki pe ua i ai se suiga, ae ina ua mae’a ona siakiga a le teine tausima’i na iloa ai, e mana’omia ona toe tui se isi paina toto ona e lei malosi lelei le toto i totonu o lona tino. “O fea la e toe aumai ai se isi paina toto mo si a’u tama”, o le fesili fia iloa lea a le fafine o Lucy ma ona foliga ua tau oso lona popole, ae na fai atu i ai le teine tausima’i, “Vaai oe Tina, aua e te popole, o lo o i ai le paina toto ua mae’a ona tuiina mo ia”, e fai lava tala a le teine tausima’i ma tago atu i totonu o le pusa ua aumai i fafo le paina toto o le a fa’apipi’i, ae tau lona lima i le tusi o loo fa’a tuatusi ia Ianeta.