E LE O OE O SE SULI MONI

Vaega 72

O le vave o gaioiga a le tamaititi foma’i meauli na mafai ai ona sao i fafo mai le fale a le fafine saua o Mekala ma tamo’e atu ai loa ma oso i lana ta’avale ma alu ese loa ma le lotoa a le ulugali’i, ae o le fafine o Mekala i le taimi lea, ua tatope atu lana savali i le telefoni ma ia fa’afesootaiina ai loa ana tama faapitoa ia sa latou ave faamalosia le teineititi meauli o Ianeta, ina ia oo vave atu i lona fale mo sa latou feiloaiga fa’anatinati, ona e i ai le mataupu o loo fia talanoa atu ai, ae o le tamaititi foma’i i le taimi lea, e lei alu sa’o i lona aiga, ae na muamua afe i le Ofisa o le vaega o Leoleonana a le malo e logo i ai lana mataupu, ma fa’atoai lana tagi fa’asaga i le fafine saua o Mekala, i upu tau fa’amata’u ma folafolaga sa fai atu ia te ia, atoa ai ma lana talosaga ina ia faia se su’esu’ega i tagata pologa sa nonofo i le fale o le ulugali’i lenei talu mai le 30 tausaga talu ai. O fa’amaumauga uma a le Ofisa o Leoleonana mai galuega sa fa’atinoina i tua atu o taimi faigaluega, fa’atoa mafai lava ona iloilo ma fa’amaonia e le tamaloa o Meki o loo avea ma ta’ita’i i le taeao fou e sosoo ai. O le taeao o le aso na sosoo ai na iloilo ma faitau ai Meki i le ripoti mo galuega o le po ua mavae, ae tau ai lana faitau i le talosaga sa faila e se ali’i foma’i meauli, lea o loo taua ai le fale o le ulugali’i saua o Mekala ma Pulusi, lea ua talosagaina ai le faia o se su’esu’ega fa’asaga i tagata pologa sa nonofo i le fale o le ulugali’i lenei.

O le aoauli o le aso fou na sosoo ai ina ua oo i le taimi o taumafataga, na tago ai loa Meki i lana telefoni ma fa’afesootai loa le telefoni a le tagata sa ia talosagaina le faia o suesuega fa’asaga i le ulugali’i o Mekala ma lona to’alua o Pulusi, mo se avanoa la te feiloa’i ai i lona Ofisa i se taimi talafeagai, mo le tu’uina atu o ni isi fa’amatalaga o loo ia silafia e fesoasoani ai i le latou su’esu’ega lea o le a amataina, ma malie ai loa le ali’i foma’i e feiloa’i ma Meki, ma o le feiloaiga lea na manino atu ai lava Meki i le tala’aga o le ulugali’i o Mekala ma Pulusi, ina ua fa’amatala uma e le ali’i foma’i le la talanoaga sa faia ma le toeaina o Pulusi i le taimi o le la ti’eti’ega, lea sa ia fa’ailoa ai i le ali’i foma’i le fafine meauli pologa sa nofo ma fai ma la auauna, ae na la tuliesea ina ua mae’a ona fanauina e le fafine meauli lana fanau e to’alua, e ulumatua le tama ma le teine. Na motu fa’afuase’i le fa’amatalaga a le ali’i foma’i lenei ina ua oso fa’alava le fesili a le tamaloa o Meki ma ia fa’apea atu, “Na fa’ailoa atu e le Tamaloa o Pulusi ia te oe poo feola mai lava i le taimi nei le fafine meauli ma lana fanau e to’alua”, na tali le ali’i foma’i, “Na pau le fa’amatalaga a le Toeaina ia te a’u, e eseese tagata na foa’i i ai le fanau a le fafine meauli sa nofo pologa i lo la aiga, ona e lei manana’o i laua e i ai ni tamaiti i totonu o le aiga, na pau le vaega na manino i la’u fa’alogo, o le mae’a ai ona fanau o le tama lona lua a le fafine pologa na maliu ai loa o ia i le falema’i”.

E lei toe fo’i le ali’i foma’i i lona ofisa i le aoauli o le aso sa la talanoa ai ma le tamaloa o Meki, ae na manava ai lava ma toe fo’i i lona aiga, e mafua mai i le umi o le la talanoaga, ma ua nofo fo’i le tamaloa o Meki ma fa’amatalaga uma e fa’atatau i le ulugali’i o Mekala ma Pulusi, lea o le a autu i ai le su’esu’ega tele o le a galulue i ai lana vaega o Leoleonana, i le tau sailiina mai lea o fa’amatalaga uma e uiga i tagata sa fai ma pologa i lo la aiga. O le fo’i atu ai o Meki i lona aiga i le afiafi lea ae tamo’e mai le teineititi pologa o Ianeta lea ua avea nei ma ona afafine ma fa’afeiloa’i o ia, na vave ai lava ona toe tau le mafaufau o le tamaloa i le la talanoaga ma le ali’i foma’i meauli i lona Ofisa, e fa’atatau i le fanau e to’alua a le fafine pologa sa nofo ia Mekala ma Pulusi. “Tama, malo mo galuega i lenei aso, e foliga mai o lo o i ai se mea o lo o mamafa i lou mafaufau”, o le oso fiafia atu lea a le teineititi o Ianeta atoa ai le mau fesili i lona Tama, ae na ata le tamaloa o Meki ma fa’apea atu isi ona leo malu, “Ianeta, o loo lelei lava mea uma, ae ona o le pisi lava i galuega o lenei aso ua mafua ai ona lagona le vaivai”.