E LE O OE O SE SULI MONI

Vaega 57

“E i ai le fa’aletonu lea ua ou vaai atu i ai”, o le musumusu atu lea a le ali’i pologa i le tamaloa o Meki ma lana auauna, lea o loo lalafi i le isi pito o le mati’e o loo fa’afesaga’i ma le nofoaga autu o tagata pologa. “O le a lena fa’aletonu ua e vaai atu i ai, ae o se fa’aletonu e ono taofia ai la tatou taumafaiga e saili mai le vai e fofo ai le ma’i o si o’u afafine o Ianeta”, o le fesili fia malamalama atu lea a le tamaloa o Meki, ma ona foliga ua amata ona popole vale, ae na toe tali atu i ai le ali’i meauli pologa, “E le o se fa’aletonu matuia lea ua ou vaai atu i ai, pau lo’u popolega ua i ai ina ne’i tuai ai a tatou fuafuaga mo le osofaia o le nofoaga atoa lenei ma saili mai le vai mo le ma’i o si ou afafine”. O luma te isi atu o le mati’e lea o loo lalafi ai le osofaiga a le au ali’i e to’atolu ia o loo fa’asaga mai ai le pa u’amea e ulufale ai le faitoto’a e aga’i i totonu o le nofoaga mo tagata pologa, le nofoaga tonu lena o lea ua fa’atutu i ai le osofaiga a le tamaloa o Meki ma lana vaega, mo le tau sailiina mai lea o le vai e fesoasoani ai i le ma’i o si ona afafine meauli o Ianeta. “Ia oulua fa’atali lelei atu lava iinei, ae o lea o le a ou tolotolo e siaki luma o le faitoto’a, poo i ai ni fitafita o tiute ai, ina ne’i tatou o fa’atasi uma i ai ae fa’afuase’i ai ona osofaia tatou ma toe maua ai tatou e fitafita a le Tupu saua o le malo”, o le tonu lea a le ali’i meauli pologa na talia fo’i e Meki ma lana auauna, ona totolo loa lea o le ali’i pologa ma ana a’upega ae fa’atali ai Meki ma lana auauna i le isi itu o le mati’e lea e fa’afesaga’i ma le nofoaga autu o tagata pologa.

O le tamaloa o Meki ma lana auauna, o ni tagata ua lava lo la tomai i taua ma osofaiga fa’apenei, ua silia i le 20 tausaga o galulue i laua i le vaega o Leoleo nana a le malo, lea fo’i o loo avea ai le tamaloa o Meki ma ta’ita’i i le vaega o Leoleo nana. E alu ese atu la le ali’i meauli pologa mai le nofoaga lea o loo lalafi ai Meki ma lana auauna, ae o le taimi lea na aapa atu ai loa le tamaloa o Meki ua aumai le aufana o loo i totonu o le isi ato o loo fa’afafa i lona tua ua tu’u i ai le fulu a u, ona ia tu lea i luga ma fa’agatasi ma le isi pupuvao o loo i ona luma atu, ma sauni lana meme’i i soo se taimi na te vaaia ai se gaioiga ese i le ali’i meauli pologa lea ua aga’i atu e siaki le faitoto’a poo tiute ai ni fitafita a le tupu. E lei umi ona alu ese atu le alii pologa ae fa’alogoina loa e le tamaloa o Meki le gase solo mai o leo o filifili, e foliga mai e i ai le mea ua tupu, ae ina ua ia tu sa’o i luga ma autilo aga’i i lalo, na ia iloa atu ai ni manu feai se lua o loo nonoa i filifili u’amea o la ‘ua, ua la si’omia le ali’i pologa lea na tolotolo atu i luma o le faitoto’a. Na vaaia e Meki le leai o se gaioiga e mafai ona toe faia e le ali’i pologa, se’i vagana ai lona taoto pea i lalo i le vaega sa tolotolo atu ai, toe lava o le fa’atalitali o le taimi e osofa’i ai o ia e manufeai e lua ia ua li’oina o ia. E le’i toe fa’atali Meki ae ua tago atu loa i lana aufana ma tuu i ai fulu a u e 2 ma meme’i loa, ma e le’i misi lava ma muaulu o manu feai e 2 fulu a u sa tafana e le ali’i, ma vaaia ai le tau fai fiti solo o manu feai nei ma feei, ma fa’alogoina ai loa le papa mai o fana a fitafita a le tupu o loo lalafi solo mai i tua atu o le aupaga o loo si’omia ai le lotoa a tagata pologa.

E lei toe fa’atali Meki ma lana auauna i le taimi lea, ae ua la fa’asaga atu loa ua fai le osofaiga, ua fa’aaoga e le tamaloa o Meki fulu a u sa tu’u atu e le alii pologa ia te ia, ae o lana auauna ua siou i le fa’aaogaina o fana e fitafita sa fasiotia e le ali’i pologa e tafana ma osofa’i ai fitafita a le Tupu saua, ma ua vaaia fo’i le solomuli o fitafita a le Tupu seia oo lava ina laua fasiotia fitafita e to’a 4 sa tiute i luma o le faitoto’a, toe fasi mate atu ai ma manu feai e 2 sa taumafai e osofa’i le ali’i meauli pologa, ma ua maua ai loa ma le avanoa latou te sailia ai totonu o le aai mo le sailiina o le vai e fesoasoani ai i le ma’i o le teineititi meauli o Ianeta.