E LE O OE O SE SULI MONI

Vaega 55

E lei toe fa’atali le ali’i pologa ae ua tamo’e atu nei i le vaega tonu o loo fiti solo mai ai ali’i fitafita e to’alua a le tupu saua o Eteuati II ina ua pasasa tonu ai lava ana fulu a u i o la muaulu. Na iloa e le ali’i pologa ua lava ma totoe fulu a u ia ua lavevea ai fitafita nei e feoti ai lava, aua o le tino o le fulu a u ua uma ona nini i se vailaau oona, le vailaau lea e fa’aaoga e tagata pologa i taimi o a latou tuliga manu, ina ia fa’a faigofie ai ona tape ni manu mo a latou meaai. Na fa’alogoina e le ali’i pologa le tau fai feei o ali’i fitafita i le fia feola ae o lalo o le laau o loo ta’atia mai ai le ali’i lea sa laua saisaiina, o loo au tilo solo ona mata pe na te tai iloa atu se tagata. “Sole, o ai oe ae aisea fo’i ua e oo mai ai i lenei vaomatua”, o le fesili atu lea a Ie ali’i pologa i le tagata lea na pu’e fa’apagota e fitafita, peita’i o le taimi lea, ua matua fefe lava le tagata lenei ina ua ia vaaia le tulaga mata’utia lea ua faia e le ali’i meauli pologa lenei i fitafita e to’alua sa laua pu’e fa’apagota o ia, lona uiga o le iuga fo’i lea e o o i ai o ia. Na fai si umi o fa’atali le ali’i pologa mo se tali a le tagata lenei, ae o le taimi lea ua na o le taoto lava o le tagata i lalo ma pupula to’a i le tagata pologa ma le fefe tele, ina ne’i sosoo atu ai ma ia i tua o ali’i fitafita ia ua ta’atitia mai i ona tafatafa ua feoti. Na aapa atu le tagata pologa ua fuli fa’ataliaga ali’i fitafita o loo ta’atitia mai i ona tafatafa, ona ia tase’i ese lea o a laua fana o loo fusi i o laua tino, fa’apea ai ma a laua toniga o loo ofu, ona ia toso lea o tino o ali’i fitafita aga’i atu i le isi pupu vao ma fa’ata’atitia ai, ae ua toe savali mai ma tatala ese le filifili o loo saisai ai vae ma lima o le ali’i lea na pu’e fa’apagota e fitafita a le tupu saua o Eteuati ina ia fa’asa’oloto ia te ia. E fai lava nei mau gaioiga e aunoa ma se tala na gagana i ai le ali’i meauli pologa lenei, ae o le ali’i lea na saisai ona lima, poo ia fo’i lea o le auauna a le fafine faiaoga o Lucy, ua amata ona tau to’a lona mafaufau ina ua ia vaai atu, e foliga mai o lo o fesoasoani atu le tagata meauli pologa lenei ia te ia.

“Fa’afetai lava mo lou fa’asaoina o lo’u ola”, o le tali atu lea a le auauna lea i le ali’i meaauli, ae sa tago le meauli ma tu’u atu i ai fana ma toniga a fitafita ma fai atu i aia, “Ta savavali te isi atu i lalo o le laau le la o loo tu mai i le isi itu, e i ai se tagata ou te mana’o e te feiloa’i i ai manu ou te le i fa’aooina atu le oti ia te oe”, o le tala atu lea a le tagata meauli pologa lenei na matua fefe ai lava le ali’i lea, ma ua amata ona tau sau lona popole, ae sa tago le ali’i pologa ma tu’u atu ia i fana ma toniga a ali’i fitafita ia ua mae’a ona ia fasiotia i le ali’i lea ma fai atu i ai, “O fana ia e puipui ai oe i soo se taimi e toe osofa’i ai oe e le fili i totonu o le vaomatua, ma toniga ia e pule oe pe e te ofu ai pe leai”, e fai lava tala a le ali’i pologa ma ia tu’u atu fana ma toniga i le ali’i lea, ona ia faliu lea ma savali aga’i atu i le itu lea o lo o fa’atali mai ai le tamaloa o Meki. Pe tusa o le 10 o la’a a le ali’i meauli, na ia toe faliu mai ai i tua ma ia iloa ai, e le o mulimuli atu i ona tua le tagata lea sa ia fa’asaoina lona ola, ae o loo tu mai pea lava i lalo o le laau na la tutu ai, e lei toe fa’atali le ali’i pologa i le taimi lea, ae ua ia tago atu loa ua se’i mai lana aufana o loo fusi i lona papatua ma tuu i ai le fulu a u, ona ia ta’i loa lea i le ulu o le tagata lenei, ma na avea lea tulaga ma itu na fefe ai loa le ali’i lea ma vaaia ai le savali aga’i mai ai le vaega o lo o tu atu ai le ali’i meauli ma fa’apea atu i ai, “Fa’amolemole lau susuga, aua e te fasiotia a’u, e i ai se feau taua na mafua ai ona ou oo mai i lenei vaomatua”. Ae na toe tali atu i ai le ali’i meauli e fa’apea, “Afai e i ai se feau taua na mafua ai ona e oo mai i le vaomatua lenei, ona e fa’alogo lelei mai lea i fa’atonuga uma ou te fai atu ai, ae afai e leai, o lou iuga lava lenei”, e fai lava tala a le ali’i meauli ma ia fa’alala atu i ai le fulu a u i le ali’i sa ia fa’asaoina lona ola.