E LE O OE O SE SULI MONI

Vaega 51

Na motu fa’afuase’i le fa’amatalaga a le tamaloa o Meki ina ua tau le mafai ona fai se upu i le maligi o ona loimata, ao ia vaavaai atu i le tu mai a le tagata pologa lenei ma ona foliga alofa, ae le iloa pe fa’afefea ona ia taui atu i ai. “Ou te le iloa pe o le a fa’apefea nei ona ou taui atu i lou agalelei, ua ou iloa lava o oe o se tagata na auina mai e le Alii e te faa’asao lo’u ola”, e fai lava tala a le tamaloa o Meki ma tu atu i luga, ona savali atu lea ma fusi mai le tagata pologa, ae o le tagata pologa i le taimi lea, ua na o le fa’atau pupula atu lava ia Meki e aunoa ma se upu na gagana atu i ai. O le tuneva o le po ma le vaivai o le tino ua oo mai, na mafua ai loa ona faia le tonu a le to’alua lea ina ia fai loa se la malologa e fa’atali ai le malama ane o le aso fou, ona fuafua ai loa lea o se isi la’asaga o le la solaaga.

Sei o tatou liliu atu lava i le teineitiiti pologa o Ianeta ma le fafine faiaoga o Lucy lea ua aga’i atu nei i le falema’i fa’aitumalo lea o loo latalata ane i le nofoaga o loo latou i ai, mo le tau sailiina o se lavea’i mo laneta, ona o le gasegase tuga lea ua fa’ailoa ane e teine tausima’i ua a’afia ai lona saogalemu, e mafua mai i le taimi sa fa’apologaina ai o ia i le nofoaga o tagata pologa i totonu o le malo. Manatua fo’i le aufaitau, o lea ua tuana’i le vaiaso atoa talu ona alu ese mai le teineititi mai totonu o le malo a le Tupu saua o Eteuati II, ae ua silia i le 2 masina o nofo ai ma fa’aaunuua ai o ia i le nofoaga e loka ma taofia ai tagata pologa o le malo. E malu ifo loa le afiafi o le aso lea, ae aga’i ese loa le fafine faiaoga o Lucy ma ana auauna e to’alua fa’atasi ai ma Ianeta mai le falema’i lea sa latou sulu atu i ai, ma le fa’amoemoe e tuliloa le falema’i fa’aitumalo o loo lata ane mo se fesoasoani. Ao aga’i ese atu le ta’avale, sa vaaia e le fafine faiaoga o Lucy tulaga fa’aletonu i foliga o le teineititi o Ianeta, e le gata ua le manogi se ‘ai ae ua amata fo’i ona vaaia le vaivai o lona tino, ua na o le moe fa’agaulua i luga o le nofoa o le ta’avale ma ona mata ua pupula sa’o lava e le emo. “Ianeta si a’u tama, afai o totoe sou malosi, ia e onosa’i ma fa’atali mai mo a’u, o lea o le a tatou aga’i atu e tuli le falema’i lata mai mo se togafitiga mo oe, fa’amolemole, ia e tumau ai iina ma onosa’i e le o toe umi se taimi ona tatou taunu’u lea”, o upu fa’amalosi ‘au atu lea a le fafine faiaoga o Lucy ia Ianeta, e ui na te iloa e silia i le 5 itula le umi lea o le alu ai le ta’avale mo le tuliloaina o le falema’i lata ane.

Pe tusa o le afa o le auala talu ona alu le malaga, ae tula’i mai loa le fa’aletonu i le ta’avale, ua mumu mai moli e fa’ailoa mai ai e le o toe tele se kesi o le ta’avale o loo totoe ona pe loa lea, ma o le taimi lava na logo ane ai e le auauna o loo ia fa’afoeina le ta’avale le tulaga lea i le fafine faiaoga o Lucy, o le taimi lea na pei ai o timuga toulu le maligi ifo i lalo o loimata o le fafine, ina ua ia iloa, o le taimi lava e pe ai le latou ta’avale ae lei oo i le falema’i, lona uiga o le iuga lava fo’i lea mo Ianeta. Ua punou le fafine o Lucy i lalo ona moeiini lea o ona mata ma fai lana tatala le leoa. “Lo’u Atua e, ia e alofagia mai a’u lau auauna agasala, ua e silafia lo’u naunau ina ia matou taunu’u i le falema’i mo se fesoasoani mo Ianeta si a’u tama, ua ou le iloa poo fea ua oo i ai si o’u to’alua o Meki, ae afai e tula’i mai se fa’alavelave ia Ianeta i lenei aso, o le a le aoga loa ona ou toe ola, ae sili ai loa lo’u mapu atu ai ma a’u i le nu’u e galo ai tiga o lenei olaga, aua o lea ua ave ese atu Meki si o’u to’alua pele, fa’apea ai Ianeta si a’u tama ... “ E lei uma le tatalo a le fafine faiaoga o Lucy, ae na muta ina ua le mafai ona ia toe gagana i se upu i le maligi o ona loimata, ae aga’i atu pea le ta’avale i le saoasaoa uiga ese i lalo o le ta’ita’iga a ali’i auauna e to’alua o loo laua fa’afoeina le malaga.