E LE O OE O SE SULI MONI

Vaega 44

O le fa’amatalaga fa’aumiumi lea a le tama’ita’i o Ianeta na fa’ateia ai le auauna o loo la talanoa, ma ia tu’i fesiliina loa le tama’ita’i. “O oe tonu lava lea o loo matou o mai e saili atu, atoa ai ma Meki le ta’ita’i o le vaega o Leoleo nana i totonu o le atunu’u o Sepania”, e fai lava tala a le auauna ma tago atu ua ta’ita’i mai le lima o Ianeta ma la savavali aga’i atu loa i le ta’avale lea o loo fa’atali mai ai Ianeta ma le isi auauna. Ao savavali atu le auauna ma Ianeta, sa faigata i le fafine faiaoga o Lucy ona ia mateina le teineititi pologa, ona ua matua o ia ma ua sui fo’i ona foliga. “Lucy, o Ianeta lea o loo tatou tau sailia nei”, o le fa’amatalaga lea a le auauna ma ia fa’atonu i le teineititi e oso i totonu o le ta’avale, ae o le fafine o Lucy i le taimi lea, ua oso atu ma fusi mai le teineititi pologa ma tagi, atoa ai ma le tele o le mau fesili ua saputu atu i ai, ae sa na o le punou lava o le teineititi pologa ma tagi e aunoa ma se upu na gagana atu ai. “Ianeta, aisea ua e nofo to’atasi ai na o oe i lenei togavao. O ai na aumaia oe iinei, ae o le a se tala e uiga ia Meki”, o mau fesili ia sa fesiligia ai e le fafine faiaoga o Lucy ia Ianeta, ae sa na o le tagi o le teineititi pologa e aunoa ma se tali, ma ua lagona fo’i ona foliga vaivai e atagia mai ai lona fia maua o se mea’ai, ona ua fai si umi o nofo na o ia i le togavao e aunoa ma se meaai sa ia mauaina.

O le molimauina e ali’i leoleo faapitoa atoa ai ma le fafine faiaoga o Lucy i tulaga mafatia i le teineititi pologa o Ianeta, na faia ai loa le fa’aiuga fa’anatinati e sili pe a latou toe fo’i atu i le taulaga, se’i tau saili se nofoaga e maua ai se mea’ai mo le teineititi pologa lea ua latou vaaia tulaga fa’aletonu. E lei toe fa’atali le fafine faiaoga o Lucy ma lana aumalaga, ae ua toe fa’atutu atu nei le afi o le latou ta’avale i le taulaga mo le tau sailiina o se fesoasoani. Ua fiu fo’i e tau fa’atalanoa le teineititi pologa ae ua vaaia lava tulaga fa’aletonu i lona malosi. “Ianeta! Ianeta! e i ai se mea e mana’omia”, o le talanoa atu lea a le fafine faiaoga o Lucy i le teineititi pologa, ae ua na o le ta’atia lava o Ianeta i luga o le nofoa o le ta’avale ua le gagana i se upu, ma ona foliga faaletonu ua atagia mai ai le ono tula’i mai o se fa’alavelave. O le popole tele o le fafine faiaoga o Lucy i le saogalemu o Ianeta na mafua ai loa ona ia fa’atonu auauna poo ali’i leoleo nana e to’alua o loo latou malaga ina ia aga’i sa’o loa le ta’avale i se falema’i lata ane lava se’i tau saili ai se fesoasoani mo Ianeta manu e le’i tula’i mai se isi fa’alavelave matuia. Pe tusa o le itula talu ona alu ese mai le ta’avale mai atumauga ae taunu’u loa i le falema’i pito ane lava i se tasi o nu’u tua, ma fa’anatinati atu ai loa le teineititi o Ianeta i totonu o le falema’i, peita’i o le fa’afitauli ua tula’i mai, ua maua le falema’i, maua le teine tausima’i e maua mai ai le fesoasoani muamua, ae le o i ai se foma’i e mafai ona ia faia se suega faapitoa e iloa ai le tulaga o le soifua maloloina o Ianeta.

“Se faamolemole lau susuga i le tausima’i, e i ai se isi falema’i lata mai se’i o matou faanatinati atu i ai, ae o le a fo’i se tulaga o le malosi o si a’u tama o i ai”, o le fesili fia iloa atu lea a le fafine faiaoga ia Lucy i le teine tausima’i, ae na fa’ailoa ane i ai e le teine tausima’i, “E silia i le 2 itula e alu ai le ta’avale fa’atoa maua le isi falema’i lata mai, peita’i o le tulaga lea ua maua mai i le suega sa faia mo lau tama, ua le o toe tele se malosi o lona tino o i ai, ona ua tau leai se toto i lona tino, ua manaomia fo’i le fafaga o lona tino i paina toto ina ia vave ai ona toe fa’afo’i lona malosi”.