E LE O OE O SE SULI MONI

E lei uma atu le talosaga a le teineititi pologa ae aapa atu le auauna ua aofa’i mai le kola o lona ofu ma uu lona ua ma e e atu i ai, “Fa’alogo mai ou taliga, ia e malamalama lelei i lou tulaga, o oe o le teineititi pologa, e le o oe o se suli moni o le aiga sa e nofo ai”, na ona uma atu lava o le tala a le auauna, ona ia una’i ese loa lea o le teineititi ae ua savali aga’i i le ta’avale ma ona foliga saua ma le ita tele, ae o Ianeta i le taimi lea, ua oso lona fefe atoa ai ma lona popole, ina ne’i fai e le tagata lenei se mea leaga ia te ia. “E te toe fia alu i tai i le aai pe leai”, o le valaau ane lea a le auauna ia Ianeta ina ua uma ona oso i totonu o lana ta’avale ma fa’aola le ta’avale. Ua savali atu le teineititi ma tatala le faitoto’a o le ta’avale, ona oso lea i le nofoa pito lava i tua ua nofo mai ai ma tagi.

Sei o tatou tuli tatao atu lava le tulaga lea ua oo i ai sailiga a le tamaloa o Meki ma lona to’alua faiaoga ia Lucy, lea ua aga’i mai nei e saili le nofoaga lea na ta’u atu e le fafine o Mekala ia te i laua, o lea ua aumai aga’i i ai le teineititi meauli e tu’u ai. Na ona mae’a lava ona tapena o ta’avale a Meki ma lana aufaigaluega, tulioso loa i totonu ma aga’i ese mai loa mai le latou nofoaga autu. E tasi lava le fa’anaunauga o loo i le tamaloa, o le toe fia maua atu lea o le teineititi pologa o Ianeta, ona ua alofa tele i ai lona to’alua ma ua naunau fo’i lona to’alua e avea Ianeta ma ana tama. E malu ane loa le afiafi o le aso lea, ae taunu’u loa ta’avale a Meki ma lana vaega i le vaega tonu o le atumauga lea o lo o alu ai le auala e aga’i atu i le nofoaga lea ua fa’amautu ai nei Ianeta, peita’i o le fa’afitauli lea ua vaaia e Meki ma lana vaega, e 3 auala eseese o lo o aga’i i totonu o le lotoa, ma e le iloa poo fea tonu le auala e tau sa’o lava i le nofoaga.

Na ona taunu’u lava o ta’avale a le tamaloa o Meki ma lana vaega i luma o le faitoto’a, ona latou malolo ai loa lea mo sina taimi ae sei tau vaavaai pe i ai se tagata latou te vaaia i le nofoaga lea, se’i fesili atu i ai mo se tali sa’o, e lei umi ae vaaia loa e Meki ma lana vaega se ta’avale o loo aga’i mai i le isi auala, o lo o tutu mai ai i autafa o le ta’avale ni ali’i fitafita ma a latou a’upega. Na ona iloa mai lava o i latou e fitafita nei, aga’i sa’o mai loa ma le latou ta’avale ma tu tonu lava i luma o le ta’avale a le tamaloa o Meki, ma vaaia ai loa le tau fai fa’alala mai o fana a ali’i fitafita nei ia Meki ma lana vaega, ae na na o le tutu lava o le tamaloa ua leai se isi e gagana.

“Fa’amolemole, o lea matou te tau sailia poo fea o auala ia e aga’i sa’o lava i le nofoaga lea o lo o i ai tagata pologa”, o le fa’amatalaga lea a le tamaloa o Meki, ma vaaia ai loa le ali’i o loo saofa’i i le nofoa o loo i tafatafa o le ave ta’avale ua si’i i luga lona lima ma pei e talo i lalo, ma vaaia ai loa le tau fai tu’u uma i lalo o fana a fitafita o loo tutu i le pito i tua o le ta’avale. “E i ai se mea e mafua ai ona outou naunau e fia iloa le nofoaga lenei”, o le fesili ane lea a le Ta’ita’i o fitafita ia Meki, ae na tali le tamaloa o Meki, “O i matou o Leoleo nana o loo matou sailia le mataupu e fa’atatau i se teineititi pologa na aveese fa’anana mai e ni tagata mai lona aiga, o le mafua’aga lena o lo matou oo mai iinei”, e lei uma atu le tala a Meki ae fa’apea mai loa ma le fa’amatalaga a le Ta’ita’i i lona leo saua ma le leotele, “Ua lelei, o le taimi lava e sopo mai ai le tagata o outou i totonu o le lotoa lea, oti loa”