E LE O OE O SE SULI MONI

E savali fua le teineititi pologa o Ianeta i le la matamata ma le auauna, ae o ona mata o loo feoa’i solo i le mata’ituina lea o galuega o loo fa’atino e tagata pologa, ma le ofo o lona loto pe na fa’afefea ona oo mai nei tagata pologa ma galulue i lenei nofoaga. “Ianeta, o lea ua mae’a lau maimoaga i le nofoaga oloo galulue ai tagata pologa, ae o lea o le a ta aga’i at ui le fale o loo nonofo ai, se’i e matamata ma iloa ai le ituaiga olaga o loo latou ola ai i aso ta’itasi”, o le fa’amatalaga lea a le auauna, ae sa na o le luelue ulu lava o Ianeta e le gagana i se upu. O le ta’avale lea o loo feoa’i ai le teineititi pologa o Ianeta ma le auauna mo le la matamataga, e uli uma tioata ma e faigata ona iloa mai fafo tagata o loo i totonu o le ta’avale. E lei umi ona fa’agasolo le matamataga ae vaaia loa e Ianeta le afe o le ta’avale i se tasi o auala palapala ma aga’i atu ai loa i se vaega o le togavao, o le popole o Ianeta poo fea le nofoaga lea ua ave i ai e le auauna o ia, na ia fai atu ai loa i le auauna, “Se fa’amolemole poo fea lea ua aga’i i ai le ta matamata”, ae na tali le auauna, “Ianeta, o lea ua ta aga’i atu i le nofoaga lea o loo fa’amautu uma ai tagata pologa o le malo, o se tama’i nu’u e te lei vaai muamua i ai, ae onosa’i mai pea e le o toe umi se taimi ona taunu’u lea o le ta’avale”.

Na tau puni le manava a Ianeta ina ia fa’ateia lana vaai i le taimi na afe atu ai le la ta’avale ma le auauna i lalo o ni laau tetele lava, ma ia vaaia ai loa ni fale e ato i tapoleni ma pepa o loo fa’atali’oli’o mai i totonu o se tama’i nu’u e lilofia uma luma ma autafa i le palapala. O le vivili o pa’u o le ta’avale ua tau le mafai ona alu na mafua ai loa ona fa’atu e le auauna le ta’avale, ae valaau ane ia Ianeta o loo nofo i le pito i tua, “Ianeta, o le nofoaga lea o loo fa’amautu uma i ai tagata pologa o le malo, ou te iloa o iinei fo’i lea o le a e nofo ai pe a oo i le taimi e avea ai oe ma se tasi o i latou nei”, o le fa’amatalaga lea a le auauna na matua fa’ateia ai lava Ianeta. “E a lau fa’amatalaga ali’i auauna, lona uiga o lau tala o galuega ia sa ta matamata i ai, o galuega ia o le a ave a’u ou te galue ai, fa’apea ai ma le nofoaga lenei e fai ma o’u nofoaga mautu”, o le toe fesili atu lea a Ianeta ae sa na o le nofo lava o le auauna ua le gagana, ae ua amata ona oso a’e lagona fefe ma le popole o le teineititi pologa, ina ne’i moni ma fa’amaoni tala a le auauna, ona le toe mafai loa lea ona toe faia se isi ana gaioiga e alu ese mai ai i le nofoaga lenei.

Na iloa e le auauna ua le mautonu le mafaufau o Ianeta, o lea na ia savali mai ai ma tatala le faitoto’a pito i tua o le ta’avale, ma ia fai atu ia Ianeta e oso mai i fafo se’i o la ta’amilo e matamata i le aai o loo nonofo ai tagata pologa. O se itu na matua maligi ai loimata o le teineititi pologa le vaaiga sa ia molimauina, o pepa atigi pusa o loo fola i lalo e momoe ai tagata pologa, ae o ogalaau o loo avea ma o latou aluga. O ni isi o fale e matua le talafeagai lava ona nonofo ai ni tagata ola, e fai o le auleaga o foliga ae o le palapala ma le manogi leaga. O tua o fale lauvao nei o loo tafe ai se vaitafe e le malosi tele lona tafe, o iina o loo avea ma nofoaga e taeele ai tagata pologa, o isi fo’i taimi latou te fa’aaoga vai mai le vaitafe e kuka ai a latou meaai. O le umukuka o loo kuka ai meaai a tagata pologa na matua ofo ai le teineititi o Ianeta, ona e fa’aaoga apa e kuka ai meaai. Na umi se taimi o fa’atau pupula Ianeta i vaega eseese o le nofoaga ma lulu lona ulu, ona ia fa’apea atu loa lea i le auauna, “Fa’amolemole lau susuga i le auauna, pe mafai lava ona ta toe fo’i atu i le maota o le Tupu i le taimi lava lenei, se’i fai atu i ai la’u fesili lea ua ou manatu e fesiligia ai o ia”, ae na tali le auauna, “Vaai oe Ianeta, e le faigofie ona toe maua sou avanoa lona lua i le maota o Tupu, se’i vagana ua mana’o mai ai o ia”, peita’i na toe augani atu le teineititi i le auauna ma fai atu i ai, “Vaai oe, ua uma ona ave la’u talosaga i le Tupu, ina ia toe fa’afo’i a’u i lo’u aiga, e sili atu lena nai lo lo’u nofo i lenei nofoaga eleelea ma le mataga”.