E FAI O LENEI AE O LENA

O LE MAFUA’AGA NA TA’E AI LE PAPATUA A LE LAUMEI

I aso a la ua leva, a’o feoa’i ma tautatala manu o le fanua, e pei o tagata, sa iai se laumei.  Ma o lenei laumei, e le pei o laumei i nei vaitaimi, e fai o le telegese o le alu, ae ua ta’eta’ei lona papatua.

Ae o lenei laumei, e fai o le molemole o lona papatua, sa sili atu le i’ila o lona papatua, i lo so’o se laumei o le malo.  Ma e to’atele tagata ma manu, e fiafia e matamata i le papatua o lenei laumei.  

O le igoa o le laumei o Falani.

Ma o se laumei e atamai tele.  E le o se tulaga e tau nana e lenei laumei.

Ua lauiloa lenei laumei i lona atamai ma lona fa’aaogaina o lona atamai, e saili ai ana ‘oa mai i tagata ma manu.  O isi manu, e latou te fa’aaoga o latou atamai e tausi ai le filemu.  Ae o le laumei lenei o Falani, e na te fa’aaoga lona atamai e maua ai ana mea, e tusa lava pe na te faia i se auala taufa’asese.

Ae peitai, sa iai se aso na toe lavea ai lava i lona atamai.

Sa auina mai e tagata o le lagi, ia se feau i le lalolagi.  O le a faia se fiafia tele i luga o ao, ma ua o’o mai se vala’aulia i manu uma o le lau’ele’ele, ina ia auina atu so latou sui e toatasi, e auai i lenei fiafia.  O se valaaulia taua tele lenei valaaulia.

Ua potopoto ia manu e saili so latou sui.  Na mana’o le liona e alu, ona o ia o le tupu o manu o le togavao.  Ae na mana’o le Aeto, e alu e fai ma sui o manu uma, ona o ia o le tupu o manu o le vateatea.

Sa tula’i mai le laumei o Falani ma ia faapea mai, e ui ina e le malosi e pei o le liona ma le aeto, ae o lo’o tele sona atamai ma e lelei foi lana failauga.  Ma o le a mafai ona avea o ia ma fofoga mo manu uma o le lau’ele’ele ma le vateatea.

I le fa’ai’uga o le sailiiliga a manu, na ‘autasi uma loa, e alu ia le Laumei o Falani.

Sa faapea ona gaosia e manu felelei uma, ia se nofoa, i fulufulu o manu ma la’au sosolo, ina ia mafai ona faafeao atu ai le susuga ia Falani.  

Ua o’o i le aso o le fiafia tele i le lagi ma ua saunia Falani e aveina atu i luga o ao.  Ae ua toe fa’apea mai lava Falani…Ou te mana’o e sui lo’u igoa.

Sa tete’i uma manu i le mana’o o le alii o Falani ma o latou fesiligia le laumei, i le mafua’aga ua fia sui ai lona igoa.

Fai mai le tali a Falani, i luga o le lagi e iai mana i igoa.  Ma o le a suia lona igoa ia “O outou uma”.  E iloa ai, o a lava ni mea e tu’uina atu ia te ia, o lona uiga, ua tu’uina mai mo outou uma.

Ia malilie uma manu i le manatu o Falani – ia po o “O outou uma” – ma ua si’itia atu nei o ia i luga o ao.

Sa matua’i ofo le laumei o Falani po o Outou Uma, ona o tapenapenaga o le aiga tele lea sa faia i le lagi.  Ma na avatu ia Falani po o Outou Uma ma ua fa’asaofa’i i le ogatotonu o le fale.

Ma o so’o se taimi lava e laulau ma ina ua aumai le taumafataga muamua, sa faapea mai le fofoga o le aso, “O le aiga lenei e mo Outou Uma.”  Ua ‘ata’ata le alii o Laumei.

Ae o le mea ua tupu, ua fa’asaga atu le alii o Laumei ma ‘ai uma mea’ai sa laulauina i ona luma.  Ua le toe kea mai i manu ia o lo’o fa’atalitali atu i lalo ma fia ‘a’ai atu, ae ua matua’i faasaga lava ia le alii o Falani po o Outou Uma, e fai lona fiafia.

Ina ua mae’a le aiga sa faapea ona ia valaau atu i manu felelei ia sa faatalitali mai i leisi itu o ao, e o mai loa e toe momoli atu o ia i lalo.  Ae e le’i iloa e le laumei, ua leva na fa’amata tasi mai se tasi o lupe, i leisi itu o ao, i lana mea sa fai, ma alu atu ma ta’u i manu ia le mea a Falani lea ua fai.  

Ua le o toe “Outou Uma”, ae ua “Na’o A’u Lava”.

O le mea lena, ina ua vala’au atu ia Falani i manu, e o mai loa e avatu o ia i lalo.  Na tali mai manu, “Su’e sou auala i lalo.”

Ua fiu Falani e tagi ma ‘ai’oi mai i manu felelei, ae ua matua’i le toe ano atu lava iai se manulele.  

O le mea lea ua su’e ai e Falani se vaega o le ogasami e fa’apa’u mai ai i lalo.  Ae paga lea, ai ona o le mamao o le pa’u a le Laumei ma le malosi o le matagi, sa misi ai le sami, ae pa’u sa’o mai lava ia le Laumai ma tau lona papatua, i luga o se ma’a ma ta’e ai lona papatua.

[IA MANUIA TOE FUAFUAGA O LENEI VAIASO]