E FAI O LENEI AE O LENA

O LE MOA NA KUKA AE E LE ‘AI

I aso a la ua leva, na vala’aulia ai e se Povi ia manu uma o le fanua, i se pati tele lava o le a faia i lona fale  Sa faapea atu le Povi i manu, e leai lava sana mea e faia i le pati, ae ua ofoina mai lona fale tele e fai ai le pati.

Ua oso mai le Ta’ifau ma faapea mai, “Ia ua lelei, o lea o le a ou alu atu ma le ponaivi lea sa ou mauaina, o lo’o totoe ai nai ‘a’ano.”

Ae faapea mai Solofanua, “O lo’o iai se fasi sisi o lo’o ta’atia i totonu o la’u pa, e mafai ona ou alu atu ma avatu.  E ui na manogi mafu, ae la e lelei.”

Ua liliu uma atu manu i le Moa.  E leai lava se tala a le Moa.  Ona i’u lea i lona faapea mai, “Ia ua lelei, faitalia a’u ma avatu ia fafie e fai ai le afi e kuka ai le mea’ai, ma le alaisa.  Ia ma o lea o le a ou kukaina le tatou meaai.”

Ua o’o mai le aso o le pati tele ma na usupo atu lava ia le Moa i le fale a le Povi ma amata loa ona pisi i le kukaina o le mea’ai.  E ui i le tigaina o si Moa ae na le fa’atalale lava i lona tiute o le Kukaina o meaai  ma sa tu’uina uma iai lona malosi ma lona agaga i lana vaega.

Ua o’o i le taimi o le pati ma ua aga’iga’i uma atu Manu o le fanua i le fale o le Povi.  

O le pisi tele lava la o si Moa, sa tau ai lona apa’au i le masima, ma masa’a atu ai i totonu o le mea’ai.  Ma na alu lena po o ula ma fai pona ia manu i le o’ona o le mea’ai.

Se’i vagana ai le Povi, sa le’i amanaia e ia le o’ona o le mea’ai, ona e fiafia i le masima.

Ua fai fai ulaga a Manu i le mea’ai a si Moa, na i’u ai lava ina toe faatopetope atu le Moa i lona fale, ma toe tope mai leisi mea’ai, ae na ia fa’aeteete lava i le fa’aaogaina o le masina.

Na uma ai lava iina le pisa o Manu ae ua ‘a’ai ma le fiafia.

Ua mae’a le pati, ae sa le’i uma ai le gaioi a le Moa.  Ua uma ona kuka, ae ua tu nei i le fa’atanoa ipu e fufulu uma ipu ma fa’amama le umukuka ma totonu o le fale a Povi.  Ae ua ta’itasi ma tu’ua e manu uma ia le fale o Povi, e aunoa ma se tasi e ofo mai e fesoasoani i le Moa ma lana tapenaga fale sa fai.

E mae’a ifo le galuega fita a Moa, ua leai ma se meaai o totoe mai i le pati.

Ma e le’i gata ai iina ia pati na faia.  Ua toeititi lava vaiaso uma, ma fai pati a Manu.  Ae o le mea lava lea e tasi e tupu ai.  Ua na’o si Moa e pisi i le kuka ma le tapenaina o le mea e fai ai le pati.  Ma e uma ane lava, e leai lava seisi e nofo e fesoasoani i le Moa, ae leai foi se mea’ai e tu’u mo Moa.

Ona o’o lea i leisi aso, ua toe fai foi leisi pati.  

Ae peitai, e taunu’u atu uma le ‘au vala’aulia, e fai o le leai o ni mea’ai o le pati, ae e leai foi se tapenapenaga na faia, e pei ona masani ai.

“O fea o iai Moa?” o le fesili lea a le au fai pati.

Ua alu nei le sailiga o Moa.  Ma tau atu manu i se ana, ma na o latou fa’alogoina ai i totonu le leo o Moa o faapea mai, “Faamagalo mai a’u Mom…sa ou mana’o e puipui le tatou aiga…”

Ae na fiu manu e saili ia le mea o sau ai le leo o Moa, ae na latou le’i mauaina ia Moa.

Sa faapea loa ona o latou faatopetope atu i le fale a le ‘Oti, ona o lea manu, sa lauiloa i totonu o le fanua, i le atamai.  Ma o latou fesiligia ia ‘Oti pe aisea na nofo ai Moa i totonu o le ana ma pe leai sona aiga.

Na tilotilo mai ‘Oti i manu o le fanua ma le fa’anoanoa ma ia faapea mai, o Moa sa iai lona aiga, ae o se tasi aso na osofa’ia ai lona aiga e se gata.  A’o sosola ese lona aiga, sa na’o Moa na nofo ma fusu ma le gata, ma mafai ona fa’asao ai lona aiga.  Ae peitai sa afaina ai le tino o Moa i le la fusuaga ma le gata.

Ma na avea lea ma tulaga na fulitua ai lona aiga ia te ia, ma o latou tuli ‘esea ia Moa mai lo latou fale.  Ae e pei ona outou va’ai iai, e ui lava i lena avega mamafa o lo’o tau’aveina e Moa, ae sa le’i tu’ua ai lava lona alofa ma lona fai mea lelei mo isi.

[IA MANUIA FUAFUAGA O TOTOE O LENEI VAIASO]