E FAI O LENEI AE O LENA

O LE ATUA TAGATA O MAUI

I se tasi aso, na fai atu ai le Atua Tagata o Maui i ona uso e to’afa, “Tatou o e fagota, ae tatou o i le moana e va’ai po o ai e sili ona tele lana i’a e maua.”

“Tatou o!” o le feosofi atu lea o uso a Maui.

Ona e fai mai lava uso a Maui, o latou lava faifaiva sili ona maoa’e i le lalolagi.

Ua alu le faigafaiva a Maui ma ona uso ma ina ua o’o lava i tai, ua le toe iloa mai le motu sa faapea loa ona tu le latou va’a.  Ma ua oso loa Maui i le pito i tua o le va’a ma se’i mai i luga lana matau.

O le matau lea a Maui, o se matau e sona malosiaga fa’ataulaitu.  Ma a’o tulimatai lava uso a Maui, agai i le mea o lo’o latou o iai, sa faapea ona togi e Maui lana matau i totonu o le sami ma pa’u atu ai i le loloto o le moana. 

E le’i umi lava, ae fa’alogoina loa e Maui le toso o lana matau.  “Oka, matua’i tele lenei i’a ua mau i la’u matau,” o le valaau mai lea a Maui i ona uso.

“Sole, o lea fa’ato’a amata le tatou faigafaiva ae na ua mau lau matau!” o le tauvala’au fa’amalo atu lea a ona uso.

“Alo agai i luma le va’a, se’i toso mai i luga si alii lea!” o le vala’au atu lea a Maui i ona uso.

Ua tau fai tofu uso e to’afa a Maui ma le foe, ae alo ma le malosi.  Ma o le alu o lo latou malosi ma le latou taula’i i le aloga o le va’a, sa le’i iloa mai ai e le  au uso a Maui,  e le o se i’a lea e latou te tosoina mai i luga, ae o se motu mai i le moana o le sami.

Sa tete’i le aualii ina ua toe tepa mai i tua, ua le o se i’a lea na latou tosoina mai i luga.

Ae ua le tasi foi se motu ua o latou tosoina mai i luga, ae e valu lelei motu na maunu ifo ai i luga, i le matau fa’ataulaitu a le alii o Maui.

Ma o motu ia e valu, lea ua fa’aigoaina i lenei vaitaimi, o motu e valu a Hawaii.

[IA MANUIA FUAFUAGA UMA O LENEI VAIASO]